قوعام • 26 جەلتوقسان، 2019

سمايىل ماقىشوۆ Phillips Exeter Academy مەكتەبىن بىتىرەتىن تۇڭعىش قازاق بالاسى

110 رەتكورسەتىلدى

قازاقستاننان شىققان وقۋشى-كاسىپكەر سمايىل ماقىشوۆ بيىل Phillips Exeter Academy مەكتەبىن بىتىرەدى. بۇل مەكتەپ Niche رەيتينگىسىنىڭ باسىندا #1 بولىپ تۇرعان اقش-تاعى ايگىلى وقۋ ورنى. ماسەلەن، Facebook الەۋمەتتىك جەلىسىنىڭ نەگىزىن قالاعان مارك تسۋكەربەرگ تە وسى مەكتەپتىڭ ماقتانىشى.

ال سمايىل ماقىشوۆ New Hampshire شتاتىنداعى اتالمىش مەكتەپتىڭ قازاقستاننان شىققان تۇڭعىش تۇلەگى. ەكىنىڭ بىرىنە بۇيىرمايتىن مۇنداي مەكتەپكە قازاق بالاسى قايدان تاپ بولدى دەسەك، سوڭعى جىلدارى سمايىل ءۇش ستارتاپ اشىپ، ونىڭ بىرەۋى بۇكىل الەمنىڭ وقۋشىلارى قاتىسقان ستارتاپتار كونكۋرسىندا ۇزدىك دەپ تانىلعان 20 ستارتاپتىڭ ساناتىنا ىلىككەن. سونداي-اق سمايىل اقش-تاعى كومپيۋتەرلىك عىلىم وليمپياداسىنا  (USA Computing Olympiad) دا قاتىسادى. بۇل اقش-تاعى كومپيۋتەرلىك باعدارلامالار بويىنشا ەڭ بەدەلدى جارىس بولسا، سمايىل وسى وليمپيادانىڭ التىن ديۆيزياسىنا دەيىن جەتىپ (Gold Division)، 2019 جىلى New Hampshire Science and Engineering Expo وليمپياداسىندا ساندار تەورياسى جوباسى بويىنشا ماتەماتيكادان 1 ورىندى يەلەنگەن.

مۇنان دا بولەك، قازاق بالاسى اتالمىش مەكتەپتىڭ بەلسەندى كوشباسشىسىنىڭ ءبىرى. ستۋدەنتتىك كەڭەس، حالىقارالىق ستۋدەنتتەر اليانسى،  جاس كاسىپكەرلەر كلۋبى، Exeter LaunchX Club سياقتى كوپتەگەن كلۋبتارعا جەتەكشىلىك ەتەدى.

ەندەشە 10 جاسىنان باستاپ وزىنە ءور ماقساتتار قويعان سمايىل بۇل مەكتەپتى قايدان ءبىلدى جانە قالاي ىرىكتەۋدەن ءوتتى؟

– مەن كىشكەنتاي كۇنىمنەن وزىمە  جوعارى ماقساتتار قويدىم. 10 جاسىمنان باستاپ اتا-انامنان جىراقتامىن. ءوز قىزىعۋشىلىعىما سايكەس مەكتەپتەر اۋىستىرا وتىرىپ، كومپيۋتەرلىك عىلىم مەن ماتەماتيكادان كۇردەلى، جەتىلدىرىلگەن كۋرستارى بار جانە بىرىككەن جوبالار مەن يدەيالاردى بىرگە جۇزەگە اسىرا الاتىن قاتارلاستارىم بار مەكتەپ تابۋعا شەشىم قابىلدادىم.  جانە ىزدەۋگە كىرىستىم دە.

وسىنداي مەكتەپتەردىڭ قاتارىندا جانە تىزىمدە ءبىرىنشى بولىپ، نەگىزى 1781 جىلى قالانعان Phillips Exeter Academy تۇردى. جەكەمەنشىك مەكتەپتىڭ ستۋدەنتتەر قالاشىعىنا 11 جاسىمدا كەلدىم. ول مەنىڭ جۇرەگىمدى بىردەن جاۋلاپ الدى. زەرتتەي كەلە، ىزدەپ جۇرگەنىم وسى مەكتەپ ەكەندىگىن ءتۇسىندىم. بۇل مەكتەپكە بارلىق مەملەكەتتەردەن حالىقارالىق وليمپيادالاردىڭ جەڭىمپازدارى، عىلىمي جوبالاردىڭ جۇلدەگەلەرى، حالىقارالىق دەڭگەيدەگى سپورتشىلار مەن ەڭ تالانتتى مۋزىكانتتار، قىسقاسى ءوز مەكتەپتەرىنىڭ كوشباسشىلارى بولا العان، №1 وقۋشىلارى قابىلدانادى ەكەن. مەن امەريكادا جوعارى ءبىلىم العان اعامنىڭ جەتەكشىلىگىمەن جوسپار تۇزە وتىرىپ، Phillips Exeter Academy-گە عانا ەمەس، اقش-تىڭ ەڭ ۇزدىك توپ-مەكتەپتەرىنە دە قاتار قۇجاتتار تاپسىردىم. بۇل مەكتەپتەردىڭ بارلىعىنا اقش ۋنيۆەرسيتەتتەرىمەن بىردەي دەرلىك ىرىكتەۋلەر جۇرەدى. ۇزىن-سونار انكەتا تولتىرىپ، ءوزىڭ تۋرالى ومىرلىك ماقساتتارىڭدى، جەتىستىكتەرىڭدە تۇگەل تىزە وتىرىپ، ەسسە جازاسىڭ جانە SSAT تەستىن تاپسىراسىڭ. 

Phillips Exeter ەندوۋمەنت مەكتەبىنىڭ قورى 1،3 ميلليارد اقش دوللارىن قۇرايدى جانە الەمدەگى ەڭ ءىرى مەكتەپ سانالادى. جانە دۇنيەجۇزىندەگى ەڭ ءىرى مەكتەپ كىتاپحاناسى دا وسىندا. مەنى تاڭداندىرعانى، كۋرستاردى تاڭداۋدىڭ اسا اۋقىمدى مۇمكىندىكتەرى بولدى. مەن بۇل جەردە دەڭگەيى مەن كۇردەلىلىگى ءوز قابىلەتىمە سايكەس جوسپار  قۇرىپ، كۋرستاردى تاڭداي الامىن، –  دەيدى Phillips Exeter Academy مەكتەبىن بىتىرەتىن تۇڭعىش قازاق بالاسى.

 

سوڭعى جاڭالىقتار

ۇقساس جاڭالىقتار