پرەزيدەنتتىڭ ءباسپاسوز حاتشىسى بەرىك ءۋالي ءسوز باسىندا جۋرناليستەردى كەلە جاتقان جاڭا جىلمەن قۇتتىقتاپ, 2019 جىلدىڭ ايتۋلى وقيعالارعا تولى بولعانىن اتاپ ءوتتى.
– شىمىلدىعى جابىلاتىن جىل ەل جىلناماسىندا ايتۋلى وقيعالارىمەن ەستە قالدى. بۇل, ەڭ الدىمەن, ەگەمەن ەلىمىزدىڭ قالىپتاسىپ, دامۋىنا زور ەڭبەك سىڭىرگەن قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ەل باسقارۋ تىزگىنىن قاسىم-جومارت توقاەۆقا تاپسىرعان ساتتەن باستاۋ الادى. ودان كەيىنگى ەلىمىزدىڭ ساياسي ومىرىندە ماڭىزى زور وقيعا – پرەزيدەنت سايلاۋى. بيلىكتىڭ اۋىسۋى, سايلاۋ ناۋقانى اتا زاڭىمىزعا سايكەس جۇزەگە اسىرىلدى. قاسىم-جومارت كەمەل ۇلى حالىق الدىندا انت بەرگەننەن كەيىن مەملەكەت باسشىسى رەتىندە بىردەن جۇمىسقا بىلەك سىبانا كىرىسىپ كەتتى. ەلىمىزدىڭ بۇكىل ءوڭىرىن ارالاپ, حالىقتىڭ الەۋمەتتىك-ەكونوميكالىق احۋالىمەن تانىستى. كوپتەگەن حالىقارالىق كەزدەسۋ وتكىزىپ, شەت- ەلدەرگە رەسمي, مەملەكەتتىك ساپارلار جاساپ, ماڭىزدى كەلىسسوزدەر جۇرگىزدى, – دەدى بەرىك ءۋالي.
ونىڭ ايتۋىنشا, مەملەكەت باسشىسىنىڭ قاتىسۋىمەن 462 ءىس-شارا ءوتتى. ەلىمىزدىڭ ايماقتارىنا 25 رەت جۇمىس ساپارىمەن باردى. 31 ەلدىڭ باسشىلارىمەن تەلەفون ارقىلى سويلەستى.
قاسىم-جومارت توقاەۆ حالىقارالىق ءىس-شارالار بويىنشا 12 ەلگە ساپارمەن باردى, 9 حالىقارالىق جيىنعا قاتىستى. پرەزيدەنت حالىقارالىق جانە وڭىرلىك قاۋىپسىزدىكتى قامتاماسىز ەتۋ, مەملەكەتارالىق بايلانىستار مەن ءوزارا ىنتىماقتاستىقتى نىعايتۋ ماقساتىندا الەمدىك دەڭگەيدەگى ساياسي تۇلعالارمەن 100-گە جۋىق حالىقارالىق كەزدەسۋ وتكىزدى. مەملەكەت باسشىسى 23 شەتەلدىك ەلشىدەن سەنىم گراموتالارىن قابىلداپ, قازاقستاننىڭ شەتەلدەردەگى 30 ەلشىسىن تاعايىندادى. سونىمەن قاتار قازاقستاننىڭ 6 مەملەكەتتەگى ديپلوماتيالىق ميسسيالارى ەلشىلىك رەتىندە قايتا قۇرىلدى.
جالپى, بيىلعى 20 ناۋرىزدان بەرى 45 زاڭعا, 226 جارلىققا, 68 وكىمگە قول قويىلدى. پرەزيدەنتتىڭ قاتىسۋىمەن وتكەن جيىندار بويىنشا 49 حاتتاما تولتىرىلعان. پرەزديەنت بيىلعى 9 ايدا 112 796 شاقىرىم جول ءجۇردى. وعان 181 ساعات 36 مينۋت ۋاقىت كەتكەن.
پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمى مەن پرەزيدەنتتىڭ ۆيرتۋالدى قابىلداۋىنا ازاماتتاردان 1 تامىزدان بەرى 15 669 ءوتىنىش كەلىپ تۇسكەن. ونىڭ 4025-ءى پرەزيدەنتتىڭ ۆيرتۋالدى قابىلداۋى ارقىلى قابىلدانعان.
سونىمەن قاتار ءباسپاسوز حاتشىسى مەملەكەت باسشىسىنىڭ «حالىق ۇنىنە قۇلاق اساتىن مەملەكەت» تۇجىرىمداماسىنىڭ ورىندالىپ جاتقانىن ايتىپ, حالقىمىزدىڭ ءال-اۋقاتىن ارتتىرۋ ماقساتىندا ماڭىزدى باستامالار قولعا الىنعانىنا نازار اۋداردى. وسى رەتتە ول قيىن جاعدايعا تاپ بولعان وتباسىلارعا الەۋمەتتىك كومەك كورسەتۋ ماقساتىندا 500 مىڭنان اسا ازاماتتىڭ 300 مىڭ تەڭگەگە دەيىنگى نەسيەلىك قارىزى مەن ۇستەمە تولەمدەرى كەشىرىلگەنىن, بۇل جالپى العاندا 107 ملرد تەڭگەنى قۇراعانىن مالىمدەدى.
بۇعان قوسا سيرياداعى وتانداستارىمىزدى قاقتىعىس الاڭىنان الىپ شىعۋ ماقساتىندا قولعا الىنعان «جۋسان» وپەراتسيالارى ءساتتى ىسكە اسىرىلدى.
مەملەكەت باسشىسىنىڭ وتاندىق جانە شەتەلدىك باق وكىلدەرىنە بەرگەن 16 سۇحباتى جاريالاندى. قاسىم-جومارت توقاەۆتىڭ قازاقستان پرەزيدەنتى رەتىندە اتقارىپ جاتقان جۇمىستارى تۋرالى جالپى 26 دەرەكتى فيلم ءتۇسىرىلىپ, رەسپۋبليكالىق تەلەارنالاردا كورسەتىلدى.
سونداي-اق بەرىك ءۋالي جاستار جىلى اياسىندا ۇيىمداستىرىلعان ءىس-شارالارعا توقتالىپ, مەملەكەت باسشىسى ۆولونتەر جىلىنىڭ تۇساۋىن كەسكەنىن ايتتى.
