قازاقستاندا شارل پەررونىڭ امبەگە ايان ەرتەگىسى العاش رەت بالەت ساحناسىندا قويىلىپ وتىر. قويۋشى-حورەوگراف نادەجدا كالينينا, كوپتەگەن حالىقارالىق بايقاۋلار مەن فەستيۆالدەردىڭ لاۋرەاتى ءارى جۇلدەگەرى.
«سەرگەي پروكوفەۆتىڭ وتە كۇردەلى مۋزىكاسىنا «كۇلشە قىز» بالەتىن قويۋ تۋرالى تەاترىڭىزدىڭ ۇسىنىسىن زور جاۋاپكەرشىلىكپەن قابىلدادىم. «كۇلشە قىز» بالەتى كومپوزيتور ايتقانداي ءۇش ەمەس, ەكى كورىنىستى. كەيبىر عاجايىپ مۋزىكالىق يىرىمدەردى تۇتاس الىپ تاستاۋىمىزعا تۋرا كەلدى. دەكوراتسيا كولەمى, قاتىسۋشى ارتىستەردىڭ سانى تۇرعىسىنان الار بولساق, وسى تەكتەس سپەكتاكل بۇرىن-سوڭدى قويىلماعان», دەيدى, حورەوگراف.
سۋرەتشى سەرگەي نوۆيكوۆتىڭ اسەرلى دەكوراتسيالارى مەن كوستيۋمدەرى, جارىقپەن بەزەندىرۋ جانە بەينە كەسكىن ارقاسىندا, وسى قويىلىمداعى ءاربىر ساحنا, شىن مانىندە دە, عاجايىپ ەرتەگىلەر كىتابىن پاراقتاپ وتىرعانداي كۇيگە تۇسىرەدى.
«تەاتر وراسان جۇمىس اتقاردى. سەبەبى, سپەكتالدى بەزەندىرۋدىڭ باستى يدەياسى – كىشكەنتاي قىزدىڭ كۇندەلىگىن, ونىڭ قيال الەمىن كورسەتۋ كەرەك بولدى», دەيدى سەرگەي نوۆيكوۆ.
اتالعان قويىلىمعا بالەت ترۋپپاسى باستان-اياق, قازاق ۇلتتىق حورەوگرافيا اكادەمياسىنىڭ وقۋشىلارى مەن ستۋدەنتتەرى قاتىستى. كۇلشە قىز پارتياسىن تاتيانا تەن مەن نازەركە ايمۇحامەتوۆا, حانزادانى – قازبەك احمەدياروۆ پەن سۇندەت سۇلتانوۆ ورىنداپ شىقتى.
ايتا كەتەيىك, كوپ ۇزاماي, عاجايىپ بالەتتى ەلىمىزدىڭ وزگە قالالارىنىڭ تۇرعىندارى دا تاماشالاي الاتىن بولادى. اقپاننىڭ 20, 22 جانە 23 كۇندەرى «استانا بالەت» تەاترى الماتىعا گاسترولدىك ساپارمەن بارادى.
