بۇل جوبانى تىكەلەي اۆتورى ايجاني نۇرلانوۆا جەرگىلىكتى اتقارۋشى ورگانداردىڭ قولداۋىمەن جۇزەگە اسىرۋدا. ول وبلىس اكىمى ناۋرىزباي بايقاداموۆپەن ءتيىستى مەموراندۋمعا قول قويدى. جالپى ۇيلەستىرۋدى ەڭبەك جانە حالىقتى الەۋمەتتىك قورعاۋ مينيسترلىگى جۇزەگە اسىراتىن بولادى.
جوبا اۆتورى مۇقتاج ازاماتتارعا ءۇي كاسىبىن جۇرگىزۋگە قايتارىمسىز نەگىزدە قاجەتتى ينۆەنتارلار, جابدىقتار مەن ماتەريالدار ۇسىنۋ تۇرىندە كومەك كورسەتەدى.
ايجاني نۇرلانوۆانىڭ ايتۋىنشا, وسى الەۋمەتتىك باعدارلانعان جوبانىڭ قاتىسۋشىلارى ۇيدەن شىقپاي-اق نەسيە, كەپىلسىز جانە تابىسىن راستاماي-اق ءوز ءىسىن اشا الادى. بۇل ۇيدە نان ونىمدەرىن ءپىسىرۋ, كيىم جانە ءۇي ماتالارىن تىگۋ جانە تاعى باسقالار بولۋى مۇمكىن. قاتىسۋشىلارعا قويىلاتىن باستى تالاپ – تابىس تابۋعا ۇمتىلۋ جانە بيزنەسكە جاۋاپكەرشىلىكپەن قاراۋ.
ايجاني نۇرلانوۆا وسىنداي جوبانى پيلوتتىق رەجيمدە ماڭعىستاۋ وبلىسىندا ءساتتى جۇزەگە اسىردى, وندا 250-گە جۋىق ادام جەكە كاسىپكەرلىكتى جۇرگىزۋدىڭ نەگىزگى داعدىلارىنا وقىتىلىپ, ءوز ءىسىن اشتى.
قازىرگى ۋاقىتتا «مەنىڭ كاسىبىم» جوباسى الماتى جانە تۇركىستان وبلىستارىندا, الماتى جانە شىمكەنت قالالارىندا ىسكە اسىرىلۋدا. الداعى ۋاقىتتا ونى ىسكە قوسۋ بويىنشا مەموراندۋمدار بارلىق وڭىرلەردىڭ اكىمدىكتەرىمەن جاسالاتىن بولادى.
