ءماس جۇرگىزۋ قاعيدالارىنا وزگەرىستەر مۇگەدەكتەردى الەۋمەتتىك قورعاۋ سالاسىنداعى ۇيلەستىرۋ كەڭەسىنىڭ ۇسىنىمدارىنا سايكەس ەنگىزىلدى, ونىڭ قۇرامىنا مۇگەدەكتىگى بار ادامداردىڭ قوعامدىق بىرلەستىكتەرىنىڭ وكىلدەرى كىرەدى. ولار وڭالتۋ بولجامى قولايسىز اۋرۋلار بويىنشا قايتا كۋالاندىرۋدان ءجيى ءوتۋ قاجەتتىگىنە بايلانىستى بىرنەشە رەت قولايسىزدىقتاردى اتاپ ءوتتى.
وسىعان بايلانىستى دەنە فۋنكتسيالارىنىڭ اۋىر بۇزىلۋىمەن, وڭالتۋ بولجامى كۇماندى نەمەسە قولايسىز 19 اۋرۋدىڭ تىزبەسى جاسالدى, وعان سايكەس مۇگەدەكتىك 5 جىلعا بەلگىلەنۋى مۇمكىن. ولاردىڭ ىشىندە ينتوكسيكاتسيا ايقىن بىلىنەتىن قاتەرلى ىسىكتەر, پسيحيكا ايقىن بۇزىلعان شيزوفرەنيا, ورگاندار مەن ورگانيزم فۋنكتسيالارىنىڭ ايقىن بىلىنەتىن ءبىرشاما بۇزىلۋىمەن قانت ديابەتى, V ساتىداعى سوزىلمالى بۇيرەك اۋرۋلارى بار.
وسى بەلگىلەرى بار مۇگەدەكتەر 5 جىلدا ءبىر رەت قايتا كۋالاندىرۋدان وتەدى. بۇرىن 18 جاستان اسقان ادامدارعا مۇگەدەكتىك 1 جىلعا, 2 جىلعا نەمەسە مەرزىمسىز بەرىلدى.
سونىمەن قاتار, ەمدەۋگە كەلمەيتىن اناتوميالىق دەفەكتىلەر تىزبەسى كەڭەيتىلدى. سونداي دەفەكتىلەرى بار 18 جاستان اسقان ادامدارعا مۇگەدەكتىكتىڭ ەكىنشى توبى قايتا كۋالاندىرۋدان وتپەستەن بەلگىلەنەدى. تىزبەگە قان ديابەتى مەن لەريش سيندرومى اياسىنداعى ەكى اياقتىڭ امپۋتاتسياسى, 16 جاسقا دەيىن بالاعا مۇگەدەكتىكتى العاش بەلگىلەگەن كەزدە ورتاشا اقىل-وي كەمىستىگى (يمبەتسيلدىلىك) جانە ءتۇرلى گەنەزدەگى اقىل-وي كەمىستىگىنىڭ ءتيىستى دارەجەسى, ەكى اياقتىڭ تۇراقتى بىلىنەتىن پارەزدەرىمەن جانە بىلىنەتىن شوعىرلانعان گيپەركينەزدەرمەن قوزعالۋداعى بۇزىلۋلار (گەميپارەز, پاراپارەز, تريپارەز, تەتراپارەز) قوسىمشا ەنگىزىلدى.
بۇدان باسقا, 16 جاسقا دەيىنگى بالا مۇگەدەك دەپ تانىلاتىن مەديتسينالىق كورسەتىلىمدەردىڭ تىزبەسى كەڭەيتىلدى. ماسەلەن, مۇگەدەكتىكتى 5 جىل مەرزىمگە بەلگىلەۋ ءۇشىن قولدانىستاعى كورسەتىلىمدەر تىزبەسىنە بالالار ءاۋتيزمى, اسپەرگەر سيندرومى, اتيپيكالىق اۋتيزم, سونداي-اق قايتا كۋالاندىرۋ كەزىندە 1 جانە 2 ءتيپتى قانت ديابەتى جانە ت. ب. قوسىلدى. 16 جاسقا دەيىنگى مۇگەدەكتىك تەرىنىڭ تۇقىم قۋالايتىن اۋرۋلارى, داۋن جانە رەتت سيندرومدارى, ۇدەمەلى بۇلشىقەت ديستروفياسى, تۋا بىتكەن ميوپاتيامەن جانە اۋتيزممەن, اسپەرگەر سيندرومىمەن, اتيپتىك اۋتيزممەن اۋىراتىن بالالاردى قايتا كۋالاندىرۋ كەزىندە بەلگىلەنەدى.
سونداي-اق, دەنساۋلىق جاعدايى وزگەرگەندە بۇدان بۇرىن بەلگىلەنگەن مۇگەدەكتىك مەرزىمى مەن ەڭبەك ەتۋ قابىلەتىنەن ايىرىلۋ دارەجەسىن قايتا كۋالاندىرۋ ءتارتىبى رەگلامەنتتەلدى. ەندى مۇگەدەكتەر دەنساۋلىق جاعدايى ناشارلاعان, سونداي-اق جاقسارعاندا دا قايتا كۋالاندىرۋعا جىبەرىلەتىن بولادى.
تاعى ءبىر جاڭالىق – مەديتسينالىق-الەۋمەتتىك ساراپتاما ءبولىمىنىڭ وتىرىستارىن وتكىزۋ بارىسىندا اۋديو-جانە بەينەجازبا قۇرالدارىن پايدالانۋ. بۇيرىق 2020 جىلعى قاڭتاردا كۇشىنە ەنەدى.
