قازاق جەرىندە ساق مادەنيەتىن بايانداۋ, دالىرەك ايتساق, سول كەزەڭنىڭ ارحەولوگيالىق ەسكەرتكىشتەرىنىڭ زەرتتەلۋى اسا قىزىقتى قۇبىلىس سانالادى. ەرتە كوشپەلىلەر مادەنيەتىنىڭ ايشىقتى كورىنىسى دالالىق زەرتتەۋلەردەن تابىلعان بىرەگەي جادىگەرلەر ەكەنى انىق. سونىمەن قاتار, وسىناۋ زەرتتەۋلەر نەگىزىندە ولكەلەردەگى ساق مادەنيەتتەرىنىڭ شىعۋ تەگى, ەسكەرتكىشتەردىڭ ەرتە تيپتەرى جانە ولاردىڭ ارحايكالىق ەرەكشەلىكتەرى, مادەنيەتتەردىڭ ءوزارا الىس-جاقىندىعى انىقتاۋ وزەكتى تىقىرىپ.
سەمينار بارىسىندا اتالعان ماسەلەلەرمەن تىڭ زەرتتەۋلەر جاڭاشا قورىتىندىلار جاساۋعا مۇمكىندىك بەردى. وسىعان وراي ساق مادەنيەتى بويىنشا زەرتتەۋ جۇمىستارىن زاماناۋي ادىستەر نەگىزىندە قايتا قاراستىرۋ تۋرالى ماسەلەلەر قوزعالدى.
سەمينارعا ت.ع.ك., ارحەولوگ-عالىم ا.ز. بەيسەنوۆ, مەملەكەتتىك ەرميتاجدىڭ شىعىس ەۋروپا جانە ءسىبىر ارحەولوگيا ءبولىمىنىڭ اعا عىلىمي قىزمەتكەرى ت.ع.ك., مەتالل زەرتتەۋشى تەحنولوگ-مامان ە.ا. شابلاۆينا, قر ۇلتتىق مۋزەيى «حالىق قازاناسى» عزي باشىسى ت.ع.ك., ا. وڭعار قاتىستى.
شارا بارىسىندا ارحەولوگيا سالاسى بويىنشا جۇيەلى زەرتتەۋلەر نەگىزىندە باياندامالار جاسالدى. سونىمەن قاتار ت.ع.ك., ارحەولوگ-عالىم ا.ز. بەيسەنوۆ ورتالىق قازاقستان وڭىرىنەن تاپقان ەرتە تەمىر داۋىرىنە ءتان جۇزدەن استام قۇندى جادىگەردى ۇلتتىق مۋزەي قورىنا تاپسىردى.
