كونتسەرتتە مەرەيتوي يەسىمەن بىرگە حالىقارالىق كونكۋرستاردىڭ لاۋرەاتى ەلەنا زارەمبا (ليۋكسەمبۋرگ), وزبەكستاننىڭ حالىق ءارتىسى, بيبىگۇل تولەگەنوۆا اتىنداعى حالىقارالىق ۆوكاليستەر كونكۋرسىنىڭ گران-پري يەگەرى راميز ۋسمانوۆ (وزبەكستان), سونداي- اق بيبىگۇل تولەگەنوۆا اتىنداعى حالىقارالىق ۆوكاليستەر كونكۋرسىنىڭ لاۋرەاتتارى مەن شاكىرتتەرى اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ سيمفونيالىق وركەسترىنىڭ سۇيەمەلدەۋىمەن (ديريجەرى ەربولات احمەدياروۆ) اۋەلەتە ان سالىپ, ونەرسۇيەر كورەرمەنگە ەرەكشە كوڭىل كۇي سىيلادى.
قازاقتىڭ بۇلب ۇلى بيبىگۇل تولەگەنوۆانىڭ 90 جىلدىعىنا ارنالعان شىعارماشىلىق كەشكە قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى رايىمقۇلوۆا دا قاتىسىپ, جۇرەكجاردى قۇتتىقتاۋىن جەتكىزدى.
- وسىدان تۋرا 19 كۇن بۇرىن ەلىمىزدىڭ ورداسى, نۇر-سۇلتان قالاسىندا تاماشا كەش بەردىڭىز. مادەنيەت جانە سپورت مينيسترلىگى ۇيىمداستىرعان «استانا وپەرا» تەاترىندا وتكەن مەرەكەلىك شارادا قازاقستاندىق تانىمال وپەرا انشىلەرى, ءىزباسارلارىڭىز, بيبىگۇل تولەگەنوۆا بايقاۋىنىڭ لاۋرەاتتارى ءان شىرقاپ, مەرەيىڭىزدى تاسىتتى. مىنە, بۇگىنگى مەرەيتويلىق كونتسەرتىڭىز دە سونداي جوعارى دارەجەدە وتەرىنە سەنىمدىمىن. ءاردايىم وسىلاي ابىروي بيىگىندە بولىڭىز, اپاي. ءسىز اسقار شىڭعا شىعۋدىڭ, شىققان سوڭ سول بيىكتە ماڭگىلىككە قالۋدىڭ وزىق ۇلگىسىن كورسەتكەن ءبىرتۋار تالانت يەسىسىز! ءسىز تاعدىر تالايىڭىزدا سان ءتۇرلى قيىندىقتى كورگەن, قانداي ساتسىزدىكتى بولسىن پاراساتتىلىقپەن, اقىلمەن ەڭسەرە بىلگەن كەمەڭگەر اڭىز ادامسىز. ەندى سول بەينەتىڭىزدىڭ زەينەتىن كورىپ, ورتامىزدا ءجون سىلتەر, باعدار بەرەر اقىلمانىمىز بولىپ امان ءجۇرىڭىز,-دەدى اقتوتى رايىمقۇلوۆا.
