الەمدىك تالاپتارعا سايكەس تۇرعىزىلعان نىسان ءتيىستى جابدىقتارمەن تولىق قامتاماسىز ەتىلگەن. عيماراتتىڭ قاسبەتىندە كوزدىڭ جاۋىن الاتىن اسەرلى بەينەلىك ديسپلەي ورناتىلعان. قالانىڭ ىرگەسىندە جاڭادان سالىنىپ جاتقان قاراعايلى شاعىن اۋدانىندا بوي كوتەرگەن كەشەندە ءبىر مەزەتتە 120 ادامدى قابىلداي الاتىن وليمپيادالىق باسسەين مەن 55 ادامعا ارنالعان ساۋىقتىرۋ باسسەينى, زاماناۋي سۋبۇرقاق تا بار.
سەمەيدىڭ اجارىنا اجار قوسقان عيماراتتىڭ اشىلۋ سالتاناتىنا پرەمەر-ءمينيستردىڭ ءبىرىنشى ورىنباسارى ءاليحان سمايىلوۆ ارنايى قاتىسىپ, ءوڭىردىڭ دامۋ كورسەتكىشتەرىنە, اتقارىلىپ جاتقان جۇمىستارعا جوعارى باعا بەردى. «وسى دامۋ قارقىنىن ودان ءارى جالعاستىرا بەرىڭىزدەر. قاسيەتتى سەمەي جەرىندە, ۇلى اباي تۋعان توپىراقتا وسىنداي كەشەننىڭ اشىلۋى قۇپتارلىق دۇنيە. بۇل – شىعىسقازاقستاندىقتارعا جاسالعان ۇلكەن تارتۋ» دەگەن ۇكىمەت باسشىسىنىڭ ءبىرىنشى ورىنباسارى ەڭبەگىمەن ەلەنگەن بىرنەشە شىعىسقازاقستاندىق ازاماتقا مەملەكەتتىك ماراپاتتاردى سالتاناتتى تۇردە تابىس ەتتى.
وبلىس اكىمى دانيال احمەتوۆتىڭ ايتۋىنشا, ەندى بۇل نىساندا قالا تۇرعىندارى سپورتپەن عانا شۇعىلدانبايدى, حالىقارالىق دەڭگەيدەگى ءارتۇرلى مادەني جانە سپورتتىق شارالاردى دا قىسىلماي وتكىزۋگە بولادى.
ورايى كەلگەندە ايتا كەتەيىك, قۇرىلىسى ەكى جىلعا سوزىلعان سپورتتىق نىساننىڭ جالپى اۋماعى – 33,8 مىڭ شارشى مەتر, جوبانىڭ باس مەردىگەرى – «فيرما ازيا» جشس, جوبانىڭ جالپى قۇنى – 26 ملرد تەڭگە.
سەمەي
