5 ميلليونىنشى جولاۋشىنىڭ ەسىمى ەسەپتەۋ جولىمەن انىقتالعان. نۇرسۇلتان نازارباەۆ حالىقارالىق اۋەجايى باسقارماسىنىڭ توراعاسى رادىلبەك ءاديمولدا جەڭىمپازعا اۋەجاي اتىنان باعالى سىيلىق تابىس ەتىپ, جينالعانداردى اۋەجايدىڭ جەتىستىگىمەن تانىستىردى. نۇر-سۇلتان قالاسىنا نەمەرەلەرىمەن ۇشىپ كەلگەن زەينەپ بەيسەنبەكقىزىنا اۋەجاي اتىنان جول شابادانى, «Fly Arystan» اۆياكومپانياسى اتىنان كەز كەلگەن باعىت بويىنشا ۇشۋعا سەرتيفيكات بەرىلدى.
بۇل بيىلعى جاڭادان اشىلعان ىشكى جانە حالىقارالىق اۋە باعىتتارى ارقىلى جۇزەگە اسىپ وتىر, ونىڭ ىشىندە پراگا, ۇلان-باتور, توكيو جانە «S7 Airlines» جاڭا اۆياكومپانياسىنىڭ باعىتتارى بار.
ىشكى باعىتتار بويىنشا جولاۋشىلار اعىنىنىڭ ۇلعايۋى «FlyArystan» جاڭا اۆياكومپانياسىنىڭ الماتى, شىمكەنت, تاراز, سەمەي, پاۆلودار, قوستاناي جانە ماسكەۋگە رەيستەر اشۋى ناتيجەسىندە جۇزەگە اسىپ وتىر.
2019 جىلعى 11 ايداعى كورسەتكىش بويىنشا, جولاۋشىلار اعىنى 4,7 ملن جولاۋشىعا جەتكەن. بۇل وتكەن جىلعى وسى كەزەڭمەن سالىستىرعاندا 9,2 %-عا كوپ. ال ۇشۋ باعىتى بويىنشا رەيستەر سانى 19 مىڭنان اسىپ, 2018 جىلعى وسى كەزەڭمەن سالىستىرعاندا 3,7 %-عا ۇلعايدى.
ايتا كەتەيىك, نۇرسۇلتان نازارباەۆ حالىقارالىق اۋەجايى – ورتالىق ازيا ءوڭىرىنىڭ ەڭ زاماناۋي اۋەجايلارىنىڭ ءبىرى بولىپ سانالادى, ونىڭ تاريحى 1931 جىلدان باستاۋ الادى. 2017 جىلدىڭ 5 ماۋسىمىنان باستاپ حالىقارالىق اۋە قاتىناسى رەيستەرىنە قىزمەت كورسەتەتىن ت1 تەرمينالى پايدالانۋعا بەرىلدى. سونداي-اق ت2 تەرمينالى – ىشكى باعىتتارعا قىزمەت كورسەتۋگە ارنالعان.
نۇرسۇلتان نازارباەۆ حالىقارالىق اۋەجايى – تاۋلىگىنە 200-گە دەيىن رەيس قابىلداپ, شىعارىپ سالادى, 14 مىڭنان استام جولاۋشىعا قىزمەت كورسەتەدى. 2018 جىلى 30 مىڭ رەيسكە قىزمەت كورسەتىلىپ, جولاۋشىلار اعىنى 4,5 ملن-نان استام جولاۋشىنى قۇرادى.
قازىرگى ۋاقىتتا ەلوردا اۋەجايى حالىقارالىق ازاماتتىق اۆياتسيا قاۋىمداستىعىنىڭ IIIA ساناتىنا يە, سونداي-اق ۇشۋ ماسساسى شەكتەلمەي, بارلىق ۇلگىدەگى اۋە كەمەلەرىن قابىلدايدى جانە ولارعا قىزمەت كورسەتەدى.
