سپيكەرلەر ۇلتتىق كەڭەس وتىرىسىندا پرەزيدەنتتىڭ ايرىقشا ءمان بەرگەن ماسەلەلەرىنە توقتالىپ ءوتتى. بەكبولات تىلەۋحان پرەزيدەنتتىڭ لاتىن الىپبيىنە ءوتۋ تاقىرىبىنا باسا نازار اۋدارعانىن ايتتى. «بۇل ماسەلەدە ەشقاشان اسىعۋعا بولمايدى» دەگەنىن جەتكىزدى. «مەملەكەت باسشىسى عالىمداردىڭ پىكىرىنە سۇيەنىپ, ساراپتاما جاساۋ كەرەكتىگىن ايتتى», دەدى ول.
سونداي-اق ول پرەزيدەنت قاسىم-جومارت توقاەۆتىڭ قازاق ءتىلىن رەفورمالاۋ كەرەكتىگىنە قاتىستى پىكىرىنە توقتالىپ ءوتتى. «اتاپ كورسەتكەن تاعى ءبىر ماڭىزدى ماسەلە – قازاق تىلىنە رەفورما جاساۋ. بۇل ماسەلە بويىنشا عالىمدار تاراپىنان ەكىۇداي پىكىر قالىپتاسۋى مۇمكىن. مىسالى, تۇرىك تىلىنە رەفورما جاساۋ ارقىلى جالپى تىلدەردى يگەرۋ جاعىن قاراستىرعان. شىعارماشىلىق ءتىل – ءبىر باسقا, كۇندەلىكتى قولداناتىن اۋىزەكى ءتىل – باسقا. ءتىلدى ساقتاۋ تەك زاڭمەن جۇزەگە اساتىن نارسە ەمەس قوي. مۇنىڭ ماڭىزدىلىعىن ەستىگەن بويدا تۇسىنە قويماۋىمىز مۇمكىن, بىراق تۇبەگەيلى ءبىر قادام جاسالاتىن بولسا, ءتىلدىڭ كوكجيەگى اشىلادى. پرەزيدەنتىمىز ايتقانداي, بۇل – جەڭىل-جەلپى قارايتىن نارسە ەمەس. عالىمداردىڭ ەڭبەگى, قوعام تاراپىنان كومەك, رەفورما قاجەت بولىپ تۇر. بۇل – ۇلت تاعدىرىنا قاتىستى ماڭىزدى قادام», دەدى بەكبولات تىلەۋحان.
ال ۇلتتىق قوعامدىق سەنىم كەڭەسىنىڭ مۇشەسى جامبىل احمەتبەكوۆ ءوز كەزەگىندە: «ۇلتتىق كەڭەس وتىرىسىندا ءۇش جۇمىس توبى قۇرىلعان بولاتىن. سول توپتاردىڭ جۇمىس قورىتىندىسى حالىققا اقپارات رەتىندە تاراتىلدى. ۇلتتىق كەڭەستىڭ ەكىنشى وتىرىسىندا پرەزيدەنت قاسىم-جومارت توقاەۆ العا قويعان ماقساتى مەن كەڭەستىڭ العاشقى وتىرىسىندا ايتىلعان ماسەلەلەردىڭ شەشىلۋ بارىسى تۋرالى بايانداما وقىدى. قوعامنىڭ كوڭىلىنەن شىعىپ وتىرعانى وتە كوپ, سەبەبى ايتىلعان ماسەلەلەردىڭ شەشىمى تابىلىپ جاتىر», دەدى.
سونىمەن بىرگە ول ساياسي رەفورما ماسەلەسىنە توقتالىپ ءوتتى. «بۇعان دەيىن حالىق ساياسي رەفورما كەرەك ەكەنىن ايتىپ كەلە جاتقانمەن, ول بيلىك تاراپىنان ەشقانداي شەشىمىن تاپقان جوق. ەندى ۇلتتىق قوعامدىق سەنىم كەڭەسى قۇرىلعاننان كەيىن بۇل ماسەلە شەشىمىن تاباتىنداي كورىنەدى. مىسالى, پرەزيدەنت ساياسي رەفورما حالىقتى دۇربەلەڭگە اكەلمەيتىن, بىرتىندەپ جاسالاتىن رەفورما ەكەنىن ايتتى», دەپ ويىن ءبىلدىردى.
وعان قوسا ميتينگىنىڭ قالاي ءوتۋى كەرەكتىگى تۋرالى جاڭا زاڭ قابىلداناتىنىن مالىمدەدى. ول مۇنىڭ جاي عانا ادام قۇقىعى ەمەس, جاۋاپكەرشىلىك ەكەنىن ايتا كەلە, «جۇرگىزۋشى», «قاتىسۋشى» مارتەبەسى پايدا بولعانىن حابارلادى. «ەندى ميتينگ وتكىزەر كەزدە بۇرىنعىداي رۇقسات الۋ ماسەلەسى ەمەس, ميتينگىنىڭ قايدا وتەتىنىن, قانشا ادام جينالاتىنىن جانە قانداي ماسەلە قارالاتىنىن ەسكەرتۋ ماڭىزدى بولماق. ميتينگىنىڭ ءوتۋى زاڭناماعا قايشى بولماۋى جانە قوعامدىق ءتارتىپتى بۇزباۋى كەرەك», دەپ تۇيىندەدى ج.احمەتبەكوۆ.
ءوز كەزەگىندە ۇلتتىق قوعامدىق سەنىم كەڭەسىنىڭ مۇشەسى ساياسات نۇربەك مەملەكەت باسشىسىنىڭ ءبىلىم ماسەلەسىنە قاتىستى ايتقان ويلارى توڭىرەگىندە پىكىرىن ورتاعا سالدى.
