CGT كاسىپوداقتار ۇيىمى فرانتسيا بويىنشا مانيفەستانتتاردىڭ جالپى سانى 1,8 ملن دەپ بولجاپ وتىر. ولاردىڭ 24,7 پايىزى تەمىر جول جۇمىسشىلارى, 12 پايىزى باستاۋىش مەكتەپ مۇعالىمدەرى, 19 پايىزى وقۋ ورىنداردىڭ قىزمەتكەرلەرى دەگەن دەرەك بار. مەديتسينا, سوت قىزمەتكەرلەرى, پوليتسەيلەر دە نارازىلار قاتارىندا. ادام قاراسىنىڭ كوپتىگى سونشا, ساراپشىلار مۇنى بىلتىرعى «سارى كەۋدەشەلەر» ميتينگىلەرىنەن اسىپ ءتۇستى دەگەندى ايتادى.
ال حالىقتىڭ باس كوتەرۋىنە ەل پرەزيدەنتى ە.ماكروننىڭ زەينەتكەرلىك رەفورماسىن جاساۋى سەبەپ. فرانتسيادا زەينەتكەرلىككە قاتىستى 10-عا جۋىق باعدارلاما بار. ساياساتكەرلەردىڭ ايتۋىنشا, ولاردى قاراپايىم حالىقتىڭ ءتۇسىنۋى قيىن. پرەزيدەنت باعدارلامالاردى بىرىكتىرىپ, ءبىر جۇيە ازىرلەۋدى ۇسىنعان. ناقتى ايتار بولساق, مەملەكەت باسشىسى بالدىق جۇيەنى ۇسىنىپ وتىر. ياعني, رەفورما قابىلدانعان جاعدايدا, زەينەتاقى ۇپايلارعا سايكەس تولەنبەك. ال بۇل كوپتەگەن ماماندىق يەلەرىنىڭ جاعدايىن قيىنداتپاق. بۇل تىزىمگە تەڭىزشىلەر, زاڭگەرلەر, ءتىپتى وپەرا ارتىستەرى دە ەنىپ وتىر. جالپى, فرانتسيادا سوڭعى 10 جىلدا زەينەتكە شىعۋ جاسى 60-تان 62-گە ۇلعايتىلعان. بۇل – وزىق ەلدەردىڭ اراسىنداعى ەڭ تومەن كورسەتكىشتەردىڭ ءبىرى. ماسەلەن, ۇلىبريتانيادا حالىق 66 جاستا زەينەتكە شىعادى. ماكرون ۇسىنىپ وتىرعان رەفورما بارا-بارا زەينەتكە شىعۋ جاسىن دا ۇلعايتپاق. ونىڭ ايتۋىنشا, جاڭا ەرەجەلەرگە سايكەس, 62 جاستا زەينەتكە شىعۋ ءتيىمسىز بولىپ, حالىق 64 جاسىندا اتالعان يگىلىكتى كورەتىن بولادى.
بەلسەندىلەر جۇرگىزگەن ساۋالدامانىڭ ناتيجەسىنە قاراساق, حالىقتىڭ 75 پايىزى رەفورماعا قارسى. ءبىر قىزىعى, بۇعان الاڭداتۋشىلىق تانىتقاندار 18-34 جاس شاماسىنداعى ازاماتتار.
فرانتسيا پرەمەر-ءمينيسترى ەدۋارد فيليپپ زەينەتكە شىعۋدىڭ تومەنگى جاسىن ساقتاپ قالاتىنىن حابارلادى. «بۇل تاڭداۋ قۇقىعى. ءبىز ازاماتتارىمىزعا 62 جاسىندا دا جۇمىسىن توقتاۋعا مۇمكىندىك بەرەمىز. دەگەنمەن, فرانتسۋز حالقىن ۇزاق ءارى كوپ جۇمىس ىستەۋگە ۇگىتتەۋىمىز كەرەك», دەدى. رەفورما قابىلدانسا, دەپۋتاتتار, قۇقىق قورعاۋشىلار, تەمىر جول جۇمىسشىلارى ءبىر ەرەجە بويىنشا زەينەتاقى الماق. ال جاڭا جۇيەگە سايكەس زەينەتكە شىعاتىنداردىڭ ءبىرىنشى لەگى 2004 جىلى تۋعاندار دەپ جوسپارلانعان. پرەزيدەنت بۇل رەفورمانى پارلامەنت اقپاندا قارايتىنىن ايتتى.
