كونگرەسسمەندەر پرەزيدەنتكە بيلىكتى شەكتەن تىس قولداندى جانە كونگرەسس جۇمىسىنا كەدەرگى كەلتىردى دەگەن ايىپ تاعۋدا. ساياساتكەرلەر ەكى ماسەلەنى داۋىسقا سالىپ, العاشقى ايىپ بويىنشا 230 ادام يمپيچمەنتتى قولداپ, 197-ءسى قارسى بولدى. كونگرەسس جۇمىسىنا قاتىستى ايىپپەن 229 كونگرەسسمەن كەلىسىپ, 198-ءى قارسى بولدى. وكىلدەر پالاتاسى بۇل شەشىمدى سەناتقا جىبەردى. ەندىگى كەزەكتە سوت پروتسەسى باستالادى. مۇندا كونگرەستەگى وكىلدەر ايىپتاۋشىلار بولسا, سەناتورلار القا بيلەر رەتىندە قاتىسادى. ءىستى جۇرگىزۋ اقش-تىڭ جوعارعى سوتىنا مىندەتتەلگەن. يمپيچمەنت جاريالانۋى ءۇشىن سەناتورلاردىڭ ۇشتەن ەكىسىنىڭ كەلىسىمى كەرەك, بۇل شامامەن 67 داۋىستى بىلدىرەدى. وسى جەردە كونگرەستىڭ جوعارعى پالاتاسىنداعى 100 ورىننىڭ 53-ءى رەسپۋبليكاشىلارعا تيەسىلى ەكەنىن ەسكەرسەك, يمپيچمەنتتىڭ جاريالانۋى ەكىتالاي. ال دەموكراتتار بۇل ءىستى سوڭىنا دەيىن جەتكىزەتىنىنە سەنىمدى. الايدا اقش زاڭىنا سايكەس, پرەزيدەنتتىڭ كەلەسى سايلاۋعا قاتىسۋعا قۇقى بار.
كونگرەستەگى دەموكراتتار بۇل ىسكە جاقسىلاپ دايىندالعان سىڭايلى. ولار وتكەن دۇيسەنبىدە 658 بەتتەن تۇراتىن بايانداما دايىنداپ, تاراتتى. قۇجاتتا پرەزيدەنتتى پارا الدى, ۋكراينا مەملەكەت باسشىسىن اقش-تىڭ بۇرىنعى ۆيتسە-پرەزيدەنتى دجو بايدەنگە قاتىستى تەرگەۋ باستاۋعا ۇگىتتەدى دەگەن ايىپتار كورسەتىلگەن.
بۇعان دەيىن كونگرەستىڭ زاڭ كوميتەتى بيلىكتى شەكتەن تىس پايدالانۋ مەن قۇرىلىم جۇمىسىنا كەدەرگى كەلتىرۋ دەگەن تارماقتارىمەن كەلىسكەن بولاتىن. بۇل جەردەگى بيلىككە قاتىستى داۋ بيىل 25 شىلدەدەگى ۋكراينا پرەزيدەنتى ۆلاديمير زەلەنسكيمەن اڭگىمەسىنەن تۋىنداپ وتىر. دونالد ترامپتىڭ ايتۋىنشا, بۇرىنعى ۆيتسە-پرەزيدەنت بايدەننىڭ ۇلى حانتەر بايدەن ۋكرايناداعى بىرنەشە زاڭ بۇزۋشىلىققا قاتىسقان. ناقتى ايتقاندا, پرەزيدەنت ونى 2014-2019 جىلدار اراسىندا ۋكراينالىق Burisma كومپانياسىنىڭ ديرەكتورلار كەڭەسىنىڭ قۇرامىندا ءجۇرىپ پارا الدى دەپ ەسەپتەيدى. بۇعان نەگىز جوق ەمەس. ويتكەنى ءدال وسى كەزدە دجو بايدەن پرەزيدەنت اكىمشىلىگىندە ۋكراينا بويىنشا اكىمشىلىك باسشىسى بولىپ قىزمەت اتقارعان-دى. ونىڭ ۋكراينا قۇقىق قورعاۋ قىزمەتكەرلەرىنىڭ جۇمىستان بوساتىلۋىنا قاتىسى بارىن كونگرەستەگى رەسپۋبليكاشىلار دا ايتىپ جۇرگەن.
وزىنە تاعىلعان ايىپتارمەن دونالد ترامپ كەلىسپەيدى. پرەزيدەنت وكىلدەر پالاتاسىنىڭ توراعاسى نەنسي پەلوسيگە حات جولدادى. وندا تاعىلعان ايىپتاردىڭ مۇمكىن ەمەستىگىن ايتىپ, پەلوسيدى امەريكا دەموكراتياسىنا سوعىس اشتى دەپ كىنالايدى.
جوعارىدا ايتىپ وتكەنىمىزدەي, اقش تاريحىندا بۇعان دەيىن ەكى پرەزيدەنتكە يمپيچمەنت جاريالانعان. وكىلدەر پالاتاسى 1868 جىلى ەندريۋ دجونسونعا, 1998 جىلى بيلل كلينتونعا قاتىستى ءىس قوزعاعان. دەگەنمەن, سەنات ەكى پرەزيدەنتتى دە اقتاپ شىققان بولاتىن. نەگىزىندە پرەزيدەنت سايلاۋى جاقىنداعان كەزدە يمپيچمەنت جاريالاۋ مەملەكەتتەگى دەموكراتتار ءۇشىن دە قاۋىپتى. ويتكەنى دونالد ترامپتى قولدايتىن ايماقتاردىڭ كونگرەستەگى دەموكراتتاردىڭ قايتا سايلانۋىن قيىنداتۋى مۇمكىن. مۇنداي ستراتەگيانى قولدانۋىنىڭ سەبەبى كوبىنە ءالى دە تۇسىنىكسىز بولىپ وتىر.
ەلدەگى جاعدايعا قاتىستى حالىق تا ەكىگە جارىلعانداي. وتكەن اپتادا Washington Post پەن ABC جۇرگىزگەن ساۋالدامالارىنىڭ ناتيجەسىن جاريالادى. قاتىسۋشىلاردىڭ 49 پايىزى يمپيچمەنتتى قولداپ, ترامپ بيلىك باسىنان كەتسىن دەسە, رەسپوندەنتتەردىڭ 46 پايىزى تاعىلعان ايىپتارمەن كەلىسپەيدى. دجوردج ۆاشينگتون ۋنيۆەرسيتەتىندەگى ساياسي مەنەدجمەنت باعدارلاماسىنىڭ ديرەكتورى, پروفەسسور تودد بەلت ءوز سۇحباتىندا سەناتورلاردىڭ كوبى دونالد ترامپتى قولدايتىنىن ايتا كەلە, يمپيچمەنت جاريالانبايدى دەپ بولجام جاسايدى. ال كونگرەسسمەن دەۆيد سكيسيللين «ەگەر پرەزيدەنت جاۋاپكەرشىلىككە تارتىلماسا, سەناتتاعى ارىپتەستەرىم ءوز مىندەتتەرىن ورىنداماسا, وندا بۇل جاعداي دەموكراتيامىزعا قاۋىپ تونگەنىن بىلدىرەدى», دەدى.
