جەەك وتىرىسى بارىسىندا ەۋرازيالىق ەكونوميكالىق وداق اياسىنداعى مەملەكەتارالىق ىنتىماقتاستىقتىڭ باستى ماسەلەلەرى تالقىلاندى.
باسقوسۋدا ۇيىم جۇمىسىنىڭ ارالىق قورىتىندىلارى جاسالىپ, تاراپتار الداعى جىلدارداعى ينتەگراتسيالىق قارىم-قاتىناستىڭ پەرسپەكتيۆالارى تۋرالى پىكىر الماستى.
جيىندا رەسەي پرەزيدەنتى ۆلاديمير پۋتين قازاقستاننىڭ تۇڭعىش پرەزيدەنتىنە ۇيىمنىڭ قۇرىلۋى مەن نىعايۋىنا قوسقان ۇلەسى ءۇشىن العىس ايتتى.
– مەن وسى قاۋىمداستىقتى قۇرۋعا باستاماشى بولعان جوعارى ەۋرازيالىق ەكونوميكالىق كەڭەستىڭ قۇرمەتتى توراعاسىنا ريزاشىلىعىمدى بىلدىرگىم كەلەدى. ەاەو جاقسى جۇمىس اتقارىپ كەلەدى. ءبىز ءسىزدى سانكت-پەتەربۋرگتە جاڭا مارتەبەدە قارسى العانىمىزعا قۋانىشتىمىز, – دەدى رەسەي پرەزيدەنتى.
شاعىن جانە كەڭەيتىلگەن قۇرامداعى كەزدەسۋلەردىڭ قورىتىندىلارى بويىنشا كەڭەس مۇشەلەرى ەكونوميكالىق ينتەگراتسيانى ودان ءارى تەرەڭدەتۋ ءۇشىن بىرقاتار ماڭىزدى شەشىمدەر قابىلدادى.
