«كوكەيكەستى ماسەلەنىڭ ءبىرى – جەر جانە ونى ءتيىمدى پايدالانۋعا قاتىستى. جاقىندا اقمولا وبلىسىنا جاساعان ساپارىمدا اۋىل شارۋاشىلىعى ماقساتىنداعى جەردى ءتيىمسىز پايدالانۋ جايىن بايقادىم. بۇل باعىتتا مەنىڭ ۇستانىمىم بەكەم. جەردى يگەرە الاتىن ادام عانا ونىڭ يەسى بولۋعا لايىق», دەدى پرەزيدەنت.
مەملەكەت باسشىسىنىڭ ايتۋىنشا, جەردىڭ ءتيىمسىز پايدالانىپ جاتقانىن انىقتاۋ وتە قيىن. سوندىقتان زاماناۋي تەحنولوگيالار ارقىلى باقىلاۋ ەنگىزىلەتىن بولادى.
«اۋىل شارۋاشىلىعىن ءتيىمدى پايدالانۋ ماسەلەسىن زاماناۋي تەحنولوگيالار ارقىلى باقىلاۋدى ەنگىزۋ كەرەكتىگى كورىنىپ تۇر. ۇلتتىق كوميسسيا مۇشەلەرى پايدالانىلماي جاتقان جانە ءتيىمسىز پايدالانىلىپ جاتقان جەردى باقىلاۋ ءۇشىن عارىشتىق مونيتورينگكە كوشۋدىڭ قاجەتتىگىن اتاپ ءوتتى. قازان ايىندا مەن جەردى قاشىقتىقتان باقىلاۋ ءۇشىن اگروونەركاسىپتىك كەشەندى رەتتەۋ ماسەلەلەرى جونىندە زاڭعا قول قويدىم. ءبىرىنشى قادام ناقتى زاڭنامالىق نەگىز بولدى. ەندى عارىشتىق سۋرەتتەر ارقىلى جەر يەسىمەن شارتتى بۇزۋ مۇمكىن بولادى», دەدى ق.توقاەۆ.
سونداي-اق پرەزيدەنت جەردى سوت ارقىلى الىپ قويۋدىڭ ءتيىمدى جانە جەدەل تەتىكتەرىن قاراستىرۋ ماڭىزدىلىعىن ايتتى.
«يگەرىلمەي جاتقان جەر تەلىمىن قايتارىپ الۋ كەزىندە ىستى سوزبالاڭعا سالۋدىڭ ءتۇرلى امال-ايلاسى, وكىنىشكە قاراي, ورىن الاتىنى بولدى. وسىنداي جاعدايدا جەردى ەشكىم پايدالانا الماي, بوس قالادى», دەدى ق.توقاەۆ.
