- بيلىكتىڭ ديالوگ ورناتۋعا جانە رەفورما جاساۋعا مۇددەلى ەكەنىنە ەشكىمنىڭ كۇمانى جوق. سىزدەردىڭ كوپشىلىگىڭىزبەن جەكە-دارا كەزدەستىم. ۇسىنىستارىڭىزدى, باستامالارىڭىزدى مۇقيات قاراستىرىپ, بىرقاتار ماسەلە جونىندە پىكىر الماسقان ەدىك. ۇلتتىق كەڭەس مۇشەلەرى جۇمىس بارىسىندا قىزۋ پىكىر-تالاسقا ءتۇسىپ, ماڭىزدى جاعدايلاردى تالقىلادى. سونىڭ بارىسىندا بىرقاتار تۇيتكىلدى ماسەلە بويىنشا ورتاق ۇستانىمعا كەلدىك. بۇل دەموكراتيانى نىعايتۋعا جانە قوعامنىڭ بيلىككە دەگەن سەنىمىن ارتتىرۋعا ۇلكەن سەرپىن بەرەتىن جۇمىس دەپ سانايمىن. ءبىزدىڭ تاجىريبەمىز حالىقارالىق ۇيىمدار تاراپىنان جوعارى باعالانىپ وتىر. كوپشىلىك ونى جاۋاپتى ءارى سىندارلى ديالوگ ۇلگىسى رەتىندە قابىلدادى. ەڭ باستىسى ۇلتتىق كەڭەس قوعامنىڭ سەنىمىن اقتاي الاتىنىن دالەلدەدى, - دەدى پرەزيدەنت قاسىم-جومارت توقاەۆ.
