ۇلتتىق قوعامدىق سەنىم كەڭەسىنىڭ ءبىرىنشى وتىرىسى 2019 جىلعى 6 قىركۇيەكتە نۇر-سۇلتان قالاسىندا قاسىم-جومارت توقاەۆتىڭ توراعالىعىمەن وتكەن ەدى.
پرەزيدەنت القالى جيىننىڭ باسىندا ءوز جولداۋىندا حالىقتىڭ تالاپ-تىلەگى ەسكەرىلگەنىن, ەلدىڭ الداعى دامۋ باعدارىن ايقىنداعان باستى قۇجاتتا كورسەتىلگەن باستامالاردى وسى ۇلتتىق كەڭەس شەڭبەرىندە پىسىقتاۋعا جانە دامىتۋعا بولاتىنىن ايتتى.
– ەلىمىز ءۇشىن وسىنداي سىندارلى پىكىر الماسۋ الاڭى وتە قاجەت. بۇكىل قوعام ءبىزدىڭ جۇمىسىمىزدى ءجىتى باقىلاپ وتىر. ءبارىمىز وزەكتى ماسەلەلەردى كەڭىنەن تالقىلاپ, ناقتى ۇسىنىستاردى ازىرلەۋىمىز كەرەك. پرەزيدەنت رەتىندە ءتيىستى شەشىمدەر قابىلدار كەزدە سول ۇسىنىستاردى قاپەردە ۇستايمىن. ۇلتتىق كەڭەستەگى جۇمىس باعىتىمىز بىرقاتار وڭ فاكتورعا نەگىزدەلگەن. بىرىنشىدەن, پىكىر الۋاندىعى. بۇل كەڭەستە ءارتۇرلى الەۋمەتتىك جانە كاسىبي توپتار, سونىمەن قاتار ەكونوميكالىق, ساياسي كوزقاراستار مەن ۇستانىمداردىڭ كەڭ اۋقىمدى سپەكتورى شوعىرلانعان. ەكىنشىدەن, قوعامدىق ديالوگتى ينستيتۋتتاۋ. ءبىزدىڭ جۇمىلا جۇمىس ىستەۋىمىز ءۇشىن بارلىق جاعداي جاسالعان. ۇشىنشىدەن, تۇڭعىش پرەزيدەنت – ەلباسى نۇرسۇلتان نازارباەۆ نەگىزىن قالاعان جاڭعىرۋ ۇدەرىسىن ء«بىر ەل, ءبىر حالىق» بولىپ جالعاستىرۋ, – دەدى قاسىم-جومارت توقاەۆ.
جيىن بارىسىندا كەڭەس مۇشەلەرى قوزعاعان قوردالانعان ماسەلە مەن كوكەيگە قونىمدى ۇسىنىستاردى بايىپپەن تىڭداپ بولعان سوڭ مەملەكەت باسشىسى قاسىم-جومارت توقاەۆ ۇلتتىق قوعامدىق سەنىم كەڭەسىنىڭ العاشقى وتىرىسىن قورىتىندىلادى.
– ۇلتتىق كەڭەس مۇشەلەرىنىڭ ينتەللەكتۋالدىق دەڭگەيى وتە جوعارى. سوندىقتان بۇگىن وتە ءتيىمدى, قىزىقتى ۇسىنىستاردى تىڭدادىق. جالپى, بۇل ۇسىنىستاردى مەن قولدايمىن. كەلەشەكتە اماندىق بولسا, ءبارىمىز ءبىر ۇجىم بولىپ, ىسكە اسىرامىز دەپ ويلايمىن. ءبىز ءۇشىن ەڭ قۇندى ماقسات-مىندەت, ۇعىم – بۇل ەلىمىز, مەملەكەتتىلىك. ءبارىمىز وتانىمىزدى سۇيەمىز. بىراق جاي ۇراندار تاستاماي, ناقتى قادامدار جاساۋىمىز كەرەك. وسىندا ايتىلعان پىكىرلەردىڭ كوبىمەن كەلىسۋگە بولادى. ولاردى ءبىر قۇجاتقا جيناپ, ساراپتاما جاساپ, تەز ارادا ىسكە اسىرۋىمىز كەرەك. الداعى ۋاقىتتا وسى ورتادا باسقا دا ازاماتتاردىڭ سوزىنە قۇلاق تۇرەمىز, – دەدى پرەزيدەنت.
