مەديتسينا • 19 جەلتوقسان، 2019

تاجىكستاندا قازاقستاننىڭ جەتەكشى كارديولوگتارى شەبەرلىك ءدارىسىن وتكىزەدى

39 رەت كورسەتىلدى

بۇگىن تاجىكستاندا ەكى كۇندىك قازاقستان مەديتسيناسىنىڭ كۇندەرى باستالدى. وسى شارانىڭ اياسىندا دۋشانبە قالاسىندا دەنساۋلىق ساقتاۋ مينيسترلىگى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ باسقارما ءتورايىمى روزا قۋانىشبەكوۆا مەن كورشى ەلدىڭ رەسپۋبليكالىق جۇرەك-قانتامىر حيرۋرگياسى عىلىمي ورتالىعىنىڭ ديرەكتورى دجوماحون راحمونوۆ ءوزارا ىنتىماقتاستىق تۋرالى مەموراندۋمعا قول قويدى.

تاراپتار كارديولوگياعا زاماناۋي تەحنولوگيالاردىڭ ەنگىزىلۋىنە، ءبىلىم مەن داعدىلاردىڭ كەڭ تارالۋىنا، بىرلەسكەن عىلىمي زەرتتەۋلەردىڭ ورىندالۋىنا جاعداي جاساۋعا، ءبىلىم بەرۋ باعدارلامالارىن ازىرلەۋ جانە جۇزەگە اسىرۋ بويىنشا تاجىريبەمەن الماسۋعا، ۇيىم قىزمەتكەرلەرىنىڭ باياندامالارى مەن عىلىمي ماقالالارىن جاريالاي وتىرىپ كونفەرەنتسيالار، سەمينارلار، سيمپوزيۋمدار، شەبەرلىك كلاستار، دوڭگەلەك ۇستەلدەرجانە باسقا دا ءىس-شارالاردى بىرلەسىپ ۇيىمداستىرۋعا كەلىستى.

قازاقستان رەسپۋبليكاسىنىڭ دسم كارديولوگيا جانە ىشكى اۋرۋلار عزي جۇرەك ىرعاعى جانە وتكىزگىشتىگىنىڭ بۇزىلۋى بولىمشەسىنىڭ باسشىسى، اريتمولوگ دارىگەر، جۇرەك ەلەكتروفيزيولوگى روين رەكۆاۆا «پاتسيەنتتىڭ مۇددەسى بارىنەن دە جوعارى: قازاقستاندىق مەديتسينا» پانەلدى سەسسياسىندا جۇرەك فۋنكتسياسىنىڭ سوزىلمالى جەتكىلىكسىزدىگى بار پاتسيەنتتەردى ەمدەۋگە ارنالعان يمپلانتتالاتىن قوندىرعىلار تۋرالى ايتىپ بەردى.

تاجىكستان رەسپۋبليكالىق جۇرەك-قانتامىر حيرۋرگياسى عىلىمي ورتالىعىنىڭ بازاسىندا 20 جەلتوقسان كۇنى روين رەكۆاۆا «جۇرەك ىرعاعىنىڭ كۇردەلى بۇزىلىسىنا راديوجيىلىكتى ابلاتسيا جاساۋ» (حيرۋرگيالىق كەسۋلەرسىز جۇرەك اريتمياسىن جوعارى تەحنولوگيالىق ەمدەۋ)تاقىرىبىندا شەبەرلىك كلاسىن وتكىزەدى.

كارديولوگيا جانە ىشكى اۋرۋلار عىلىمي-زەرتتەۋ ينستيتۋتى اريتمولوگيالىق ينتەرۆەنتسيالىق ارالاسۋلاردى جاساۋ جونىندەگى جەتەكشى ورتالىقتاردىڭ ءبىرى بولىپ تابىلادى. تەك 2019 جىلدىڭ 11 ايىندا ينستيتۋتتا 800-دەن استام، ال 3 جىلدا  – 2500-دەن استام وپەراتسيا جاسالدى.

بۇل رەتتە، كورشى ەلدەردە مەديتسينا كۇندەرىن وتكىزۋ سياقتى شارالاردى ۇيىمداستىرۋ رەسپۋبليكالاردىڭ دەنساۋلىق ساقتاۋ ۇيىمدارى اراسىندا ەكى ەلدىڭ حالقىنا كورسەتىلەتىن مەديتسينالىق كومەكتىڭ قولجەتىمدى جانە ساپالى بولۋى ءۇشىن ءوزارا ارەكەتتەستىكتى كەڭەيتۋگە، تاجىريبەمەن، يننوۆاتسيالارمەن جانە تەحنولوگيالارمەن الماسۋعا مۇمكىندىك بەرەتىندىگىن ايتا كەتكەن ءجون.

سوڭعى جاڭالىقتار

ۇقساس جاڭالىقتار