بودەنە قۇستار ىشىندە قىرعاۋىلدار توبىنا جاتاتىن شاعىن قۇس. ونىڭ دەنەسىنىڭ ۇزىندىعى 16-20 سم., سالماعى 80-150 گرامم اراسىندا.
بودەنەنى قولعا ۇستاماس بۇرىن ەڭ الدىمەن ونى قانداي ماقسات ءۇشىن وسىرەتىندىگىڭىزدى ءبىلىپ العانىڭىز ءجون. ەگەر ءسىز جوعارى ساپالى جانە ديەتالىق بودەنە ەتىن ءوندىرۋدى ماقسات ەتەتىن بولساڭىز, وندا سىزگە ءبىرىنشى كەزەكتە نازاردى بودەنەنىڭ كاليفورنيالىق تۇقىمىنا اۋدارۋعا تۋرا كەلەدى.
ال ەگەر بودەنەنى جۇمىرتقاسى ءۇشىن ءوسىرۋدى كوزدەسەڭىز, وندا بۇل ىسكە جاپون بودەنەسىنەن ارتىعى جوق. ءۇي شارۋاشىلىعىندا وسىرىلەتىن جاپون بودەنەسى ءوسىپ-جەتىلۋىنە 50-60 كۇن وتكەننەن كەيىن-اق جۇمىرتقا بەرە باستايدى. ياعني, ونى ءوسىرۋ ارقىلى تەز ارادا جۇمىرتقاعا كەنەلەتىن بولاسىز. ماسەلەن, ەگەر سالىستىرۋ ءۇشىن ايتاتىن بولساق, تاۋىق ادەتتە 180-210 كۇننەن كەيىن بارىپ جۇمىرتقا بەرەدى. ەكىنشىدەن, جاپون بودەنەسى ءبىر جىلدىڭ ىشىندە 300-گە جۋىق جۇمىرتقا بەرەدى. ءدامدى دە ادام دەنساۋلىعى ءۇشىن پايدالى بولىپ كەلەتىن بۇل جۇمىرتقانىڭ سالماعى 10-14 گراممدى قۇرايدى.
بودەنەنى كۇتۋ. بودەنەنى توردا ۇستاعان ءجون بە, الدە بۇل ىسكە ينكۋباتور قولايلى ما؟ بودەنەنى قولدان وسىرگەن جاعدايىڭىزدا بۇل سۇراقتىڭ دا ءسىزدىڭ الدىڭىزدان كولدەنەڭدەپ شىعاتىندىعى انىق. ەگەر ءسىز بودەنەنى جۇمىرتقادان باستىراتىن بولساڭىز, وندا سىزگە ەڭ دۇرىسى ينكۋباتور ساتىپ الۋ. مۇنداي جۇمىرتقا باستىرۋعا ارنالعان شاعىن تۇرمىستىق ينكۋباتورلاردى كەز كەلگەن بازاردان نەمەسە ارناۋلى دۇكەندەردەن كەزدەستىرۋگە بولادى. سونداي-اق, زاۋىتتان شىعارىلاتىن دايىن ينكۋباتورلارمەن قاتار ونى قولدان دا جاساپ الۋعا بولادى. مۇنداي ينكۋباتورلاردى قالاي جاسايتىندىعى جونىندەگى كەڭەستى ءسىز ينتەرنەتتەن الا الاسىز. ونىڭ ينتەرنەتتىك مەكەنجايىن ءبىز ماقالانىڭ سوڭىندا كورسەتەتىن بولامىز.
بودەنە جۇمىرتقاسىنىڭ ينكۋباتسيالانۋ كەزەڭى 17,5 تاۋلىكتى قۇرايدى. مۇنان كەيىنگى 4-6 ساعاتتىڭ ىشىندە بالاپاندار جۇمىرتقانى جارىپ شىعا باستايدى. جاڭا پايدا بولعان بودەنە بالاپاندارىنىڭ وتە شاعىندىعى (سالماعى 6-8 گراممدى عانا قۇرايدى) بولماسا, تاۋىق بالاپاندارىنان كوپ ايىرماشىلىعى جوق. ولاردىڭ ءۇستىن جۇمساق, مامىق ءجۇن باسىپ تۇرادى.
جاڭا پايدا بولعان بالاپانداردى وسى ماقسات ءۇشىن ارنايى ازىرلەنگەن جاشىكتەر مەن تورلارعا ورنالاستىرۋ كەرەك. ولاردى فانەرا مەن پلاستيكتەن نەمەسە كارتوننان جاساۋعا بولادى.
تاعامدىق جۇمىرتقا الۋ ءۇشىن وسىرىلەتىن بودەنەلەردى ۇستاۋ ءۇشىن ادەتتە بيىكتىگى 20 سانتيمەترلىك توردى پايدالانادى. تور ەدەنىنىڭ كولەمى ىشىندە ۇستالىناتىن بودەنەلەر سانىنا سايكەس لايىقتالادى. ءبىر بودەنە ءۇشىن شامامەن العاندا 180-200 شارشى مم. ورىن قاجەت بولادى. ال ەگەر ءسىز بودەنەنى ديەتالىق جۇمىرتقا (ياعني تۇقىم بەرمەيتىن) الۋ ءۇشىن وسىرەتىن بولساڭىز, وندا ءاربىر ءبودەنە انالىعى ءۇشىن جەكە تور قاجەت بولادى. بىراق ول اۋىق-اۋىق بودەنە اتەشىمەن قوسىلىپ تۇرۋى ءتيىس.
بودەنە ءوسىرۋدىڭ تەحنولوگياسى. بودەنە وسىرەتىن ورىندا, اسىرەسە, العاشقى ءۇش اپتادا جوعارى تەمپەراتۋرانى ساقتاۋ قاجەت, ويتكەنى, بۇل كەزەڭدە بودەنە بالاپاندارىنىڭ جىلۋدى رەتتەۋ مۇمكىندىكتەرى وتە ءالسىز بولادى. العاشقى ءۇش اپتادا بالاپاندار ورنالاسقان ورىن كۇندىز-ءتۇنى جارىقتاندىرىلادى. بۇدان ءارى كۇندىزگى جارىقتىڭ بەرىلۋى كۇن سايىن 2 ساعاتقا قىسقارىپ وتىرادى. توردا نەمەسە جاشىكتە 3 اپتالىق بالاپانداردى ۇستاعان كەزدە, ءار باسقا 50 سم² ورىن كەلەتىندەي بولۋى كەرەك, 3-6 اپتا ارالىعىندا جاشىكتىڭ اۋدانى ءار بودەنەگە 90 سم² بولۋى ءتيىس. جاس بودەنەلەرگە سۋ بەرۋ ءۇشىن ۆاكۋمدىق سۋارعىشتار (توڭكەرىلگەن شىنى قۇتىلار) قاجەت. تورلارعا كىشكەنتاي ىدىس سۋارعىشتار ورناتۋعا بولادى. ال ەكىنشى اپتادان باستاپ نيپپەلدەر ورناتىلادى. ولاردى كەز كەلگەن بودەنە بالاپانى جەتە الاتىنداي بيىكتىككە ورناتادى. العاشقى اپتادا بودەنە بالاپاندارىن 2 ساعات سايىن تاماقتاندىرادى. بۇدان كەيىن بىرتىندەپ تاماقتاندىرۋ سانى قىسقارىپ وتىرادى. بودەنە بالاپاندارىن ءوسىرۋدىڭ العاشقى اپتاسىندا قاتتى پىسىرىلگەن, مايدالاپ ۇنتاقتالعان تاۋىق نەمەسە بودەنە جۇمىرتقالارىن, قاتىق, ماننىي جارماسىن, ودان كەيىن بالاپاندارعا ارنالعان زاۋىت جەمدەرىن بەرىپ, بىرتىندەپ ەرەسەك قۇستاردىڭ ەرەجەسىنە كوشىرەدى. ءۇشىنشى كۇننەن باستاپ كادىمگى جەمدەردى دە بەرۋگە بولادى. العاشقى اپتادا ءبىر بودەنە بالاپانى كۇنىنە 4 گر., ەكىنشى اپتادا 7 گر., بۇدان ءارى 13-17 گر.-ع
