قىزىلوردا وبلىسىنىڭ تۋماسى مارات فاتيما «سەرپىن» مەملەكەتتىك باعدارلاماسى بويىنشا ءبىلىم ىزدەپ كەلگەن بولاتىن. بۇگىنگى تاڭدا زەرەندى اۋدانىنداعى شاعالالى اۋىلىنداعى جوعارى اگروتەحنيكالىق كوللەدجىنىڭ 1-كۋرسىندا وقيتىن ول – بولاشاق قارجىگەر. ماقساتى – وقۋىن ۇزدىك ءبىتىرىپ, ديپلومىمەن قىزمەتكە ورنالاسىپ, كوكشەتاۋدا قالۋ. اتالمىش كوللەدج 2014 جىلدان بەرى «سەرپىن» مەملەكەتتىك باعدارلاماسىمەن فاتيما ءتارىزدى وڭتۇستىك ءوڭىر جاستارىن وقىتىپ كەلەدى.
- «سەرپىن» باعدارلاماسى بويىنشا وقيتىن ستۋدەنتتەرىمىزدىڭ گەوگرافياسى كەڭ دەپ ايتۋعا بولادى. بۇل – قىزىلوردا, تۇركىستان, جامبىل, ماڭعىستاۋ وبلىستارى. وسى جىلى اتالمىش جوبا بويىنشا كونتينگەنت 209 ادامدى قۇرايدى, جاڭا قۇرامعا 90 ءبىلىم الۋشى كەلدى, – دەيدى شاعالالى جوعارى اگروتەحنيكالىق كوللەدجى ديرەكتورىنىڭ ورىنباسارى ارمان وسپانوۆ.
«سەرپىن» جاستارى تەگىن ءبىلىم الۋمەن قاتار, اي سايىن شاكىرتاقىعا يە بولادى, جاتاقحاناعا تەگىن ورنالاستىرىلادى, الەۋمەتتىك جاعدايى تومەن نەمەسە كوپ بالالى وتباسىنان شىققان ءبىلىم الۋشىلار تەگىن تاماقتانادى. وبلىستىق ءبىلىم باسقارماسىنىڭ مالىمەتىنشە, وبلىستىڭ 7 كوللەدجىندە 370 ادام ءبىلىم الۋدا, ونىڭ ىشىندە جاڭا وقۋ جىلىنا 120 تالاپكەر قابىلدانعان.
- بيىل 42 ءبىلىم الۋشى وقۋ ورنىن اياقتادى, ونىڭ ىشىندە التاۋى جوعارى وقۋ ورنىنا ءتۇستى, 17 بالا وسى وبلىستا قالىپ, جۇمىس ىستەپ ءجۇر, – دەيدى وبلىستىق ءبىلىم باسقارماسىنىڭ باس مامانى كەنجەباي بەكباي.
قابىلدانعانىنا 5 جىل بولعان «سەرپىن» باعدارلاماسىنىڭ تۇلەكتەرى ەڭبەك جولدارىن باستاپ تا كەتتى. الايدا سولتۇستىك وڭىرلەردە تۇراقتاماي, تۋعان جەرلەرىنە كەتىپ جاتقاندارى دا بار. سەبەبىن دە ىزدەپ كوردىك. كەي جاعدايدا جاس مامانداردىڭ جالاقىلارى ماردىمسىز. ءارى باسپانا دا جوق. ال جۇمىسپەن قامتاماسىز ەتۋ ماسەلەسى الدەقاشان جولعا قويىلعان. ماسەلەن, اگروتەحنيكالىق كوللەدجدى بىتىرگەن سەرپىندىكتەردىڭ بۇرناعى جىلى 35 پروتسەنتى جۇمىسقا ورنالاسسا, بيىل ول كورسەتكىش 55 پروتسەنتتى قۇراپ وتىر. «سەرپىننىڭ» العاشقى قارلىعاشتارىنىڭ ءبىرى بايجىگىت بۇل باعدارلامانىڭ ءوز ومىرىنە ۇلكەن سەپتىگى تيگەنىن ايتادى.
- وسىندا ءبىلىم الىپ, جۇمىسقا قالدىم. قازىرگى تاڭدا «ديپلوممەن اۋىلعا» باعدارلاماسىنا قاتىسۋعا ۇمىتكەرمىن. قىزىلوردا وبلىسىنان اتا-انامدى كوشىرىپ الدىم. 2017 جىلدان بەرى وسى شاعالالىنىڭ تۇرعىنىمىن. باسقالارعا دا ورىن تەۋىپ قالۋعا كەڭەس بەرەر ەدىم. جاقسى جاعداي جاسالىپ جاتقانىن كورىپ وتىرمىز, – دەيدى «سەرپىن» مەملەكەتتىك باعدارلاماسىنىڭ تۇلەگى بايجىگىت بورانباي.
ەڭبەك رەسۋرستارىن ءتيىمدى ءبولۋ ماقساتىندا ىسكە قوسىلىپ, ىزگى مۇراتتاردى كوزدەپ, جەمىستى جۇمىستار اتقارا باستاعان «سەرپىنگە» سەنگەن جاستار سانى ارتۋدا.
