ايماقتار • 16 جەلتوقسان، 2019

DAISY تسيفرلى جۇيەسى مەن زامانۋي قۇرالدار زاعيپتاردىڭ كىتاپ وقۋىن جەڭىلدەتەدى

23 رەتكورسەتىلدى

ەلۋ جىلعا جۋىق تاريحى بار الماتىداعى زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحانا بۇگىندە زاعيپ جانداردىڭ بار ومىرىنە جانە قىزمەتىنە قويان-قولتىق ارالاسا وتىرىپ، وڭالتۋ، الەۋمەتتەنۋ، ءبىلىم الۋ، دەمالۋ ورتالىعىنا اينالعان.

بۇگىندە كىتاپحانا قورىندا 200 مىڭنان استام ءتۇرلى باسىلىمدار بار بولسا، كىتاپحانا وقۋ زالى، ابونەمەنت، ەلەكتروندى قور، ونەر جانە سپورت ادەبيەتتەرىن وقۋ ءبولىمى، ستۋديا، كىتاپ قورىن وڭدەۋ، «سويلەيتىن» جانە برايل كىتاپتارىن شىعارۋ، اۆتوماتتاندىرۋ جانە تەحنيكالىق قولداۋ سياقتى 8 ءبولىم مەن 8 كىتاپحانالىق تىرەك، ۇيدە قىزمەت كورسەتەتىن جانە كىتاپحاناارالىق ابونەمەنتتەر 3 مىڭنان استام وقىرمانعا قىزمەت كورسەتىپ كەلەدى.  كىتاپحانادا كوزى كورمەيتىن ءارى ناشار كورەتىن جاندارعا عانا ەمەس، باسقا ساناتتاعى مۇگەدەكتەرگە دە قىزمەت كورسەتىلەدى.

كىتاپحانادا ينتەرنەتكە قوسىلعان ارنايى كومپيۋتەرلەر، نۇكتەلى-بەدەرلى قارىپپەن باسىپ شىعاراتىن پرينتەر، سويلەيتىن كىتاپ، DAISY ساندىق نەگىزدە دىبىستاندىرىلعان اقپارات جۇيەسى، رەابيليتيتسيا كابينەتى، زاعيپتاردىڭ جازۋعا ارنالعان قۇرالدارىمەن ت.ب. جابدىقتالعان.

الماتى قالاسىنداعى جوعارى جانە باسقا دا وقۋ ورىندارىندا وقيتىن زاعيپ-ستۋدەنتتەر ءۇشىن قاجەتتى اقپاراتتاردى داۋىستاپ وقۋ – قازاق، ورىس، اعىلشىن، نەمىس تىلدەرىندە، كومپيۋتەردە تەرىپ بەرۋ، ينتەرنەت ارقىلى ماتەريالدار جيناقتاپ بەرۋ، ءتيىستى وقۋ قۇرالدارىن داۋىستاپ جازىپ بەرۋ جانە نۇكتەلى-بەدەرلى شريفتەرگە وپەراتيۆتى كوشىرىپ، باسىپ بەرۋ، وپەراتيۆتى تۇردە كاسسەتالارعا، ديسكىلەرگە، فلەشكالارعا كوشىرىپ بەرۋ سياقتى قاجەتتى كومەكتەرىن الۋ مۇمكىندىكتەرى قاراستىرىلعان. ال ەلەكتروندىق زالدا زاعيپ وقىرماندارعا قولايلى جاعدايدا تيفلوكەشەندەر قويىلعان.

كىتاپحانادا داۋىستاپ وقۋ، تەرۋ، ءتۇرلى كوشىرمەلەر جاساۋ، كىتاپتار تاسىمالداۋ جانە ت.ب. قىزمەتتەر اقىسىز كورسەتىلەدى.

 الماتى

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار