برايل قارپىندە جازىلعان ف. وڭعارسىنوۆانىڭ «مەن ساعان عاشىق ەمەس ەم» كىتابى تانىستىرىلدى

رۋحانيات • 16 جەلتوقسان، 2019

برايل قارپىندە جازىلعان ف. وڭعارسىنوۆانىڭ «مەن ساعان عاشىق ەمەس ەم» كىتابى تانىستىرىلدى

الماتىداعى زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحانادا وقىرماندار كونفەرەنتسياسى ءوتتى. جىل سايىن وتەتىن ءداستۇرلى شارادا كىتاپحانا ديرەكتورى اسحات بايۇزاقوۆ وسى ءبىر جىل ىشىندە ۇجىم تاراپىنان اتقارىلعان جۇمىستار جايىندا مالىمەت بەرىپ ءوتتى.

ەلۆيرا سەرىكقىزى

كىتاپحانا ءىسىن دامىتۋ، بيبليوگرافيا جانە تيفلولوگيا ءبولىمىنىڭ اقپاراتى بويىنشا، وقىرماندار كونفەرەنتسياسى «سويلەيتىن» جانە نۇكتەلى-بەدەرلى قارىپىندە برايل كىتاپتارى ءبولىمى شىعارعان فاريزا وڭعارسىنوۆانىڭ «مەن ساعان عاشىق ەمەس ەم...» كىتابىنىڭ تانىستىرىلىمىمەن ەرەكشەلەندى. ءبولىم قىزمەتكەرى ب. سىزدىقوۆ نۇكتەلى-بەدەرلى قارىپتە جارىق كورگەن كىتاپتىڭ تانىستىرىلىمى بارىسىندا اقىننىڭ ءومىرى مەن شىعارماشىلىعىنا توقتالىپ، ولەڭدەرىنەن ۇزىندىلەر وقىدى. ال «سويلەيتىن» جانە برايل كىتاپتارىن شىعارۋ ءبولىمىنىڭ مەڭگەرۋشىسى ن.د. بايمۇراتوۆا وقىرماندارعا اعىمداعى جىلى ءبولىم تاراپىنان شىققان نۇكتەلى-بەدەرلى جانە جايپاق باسپالى قارىپ بويىنشا دىبىستالعان، تاكتيلدى كىتاپتار، بروشيۋرالار بويىنشا كەڭىنەن اقپارات بەردى.

كىتاپحانا ديرەكتورى ا.بايۇزاقوۆ كىتاپحانا قىزمەتىنىڭ جۇمىسىنىڭ ستاتيستيكالىق كورسەتكىشتەرى، وقىرماندارعا قىزمەت كورسەتۋ قىزمەتتەرىن ەنگىزۋ، كىتاپحانادا وتكىزگەن كوپشىلىك ءىس-شارالار، كورمەلەر، كىتاپحانا شىعارعان باسىلىمدار تۋرالى، اعىمداعى جىلى كومپيۋتەرلىك ساۋاتتىلىق پەن وڭالتۋ بويىنشا وتكىزىلگەن ساباقتاردىڭ سانى، بۇگىنگى كۇنى كىتاپحانا قورىن قۇرايتىن كىتاپتاردىڭ سانى تۋرالى اقپارات بەرىپ، كىتاپحانا جۇمىسىن قورىتىندىلادى. كىتاپحانانىڭ 2020 جىلعا ارنالعان جۇمىس جوسپارى مەن مىندەتتەرى تۋرالى باياندادى.

وسى شارا اياسىندا كىتاپ قورىن تولىقتىرۋ، وڭدەۋ جانە كاتالوگتاردى ۇيىمداستىرۋ ءبولىمىنىڭ مەڭگەرۋشىسى ت.روگاتكينا اعىمداعى جىلدىڭ 1 جەلتوقسانىنا دەيىنگى كىتاپ قورىنىڭ قىسقاشا ەسەبىنە توقتالدى.

كونفەرەنتسيادا 9 ادامنان تۇراتىن «كىتاپحانا كەڭەسىن» قۇرۋ، «كىتاپحانا كەڭەسىنىڭ» ەرەجەسىن ازىرلەۋ، زاعيپ جانداردى جانە مۇمكىندىگى شەكتەۋلى بالالاردى قولداۋ قورىنىڭ جەتەكشىسى ب.بازاربەكوۆپەن بىرلەسە زاعيپ جانداردى سۇيەمەلدەۋ بويىنشا بەينەروليك ءتۇسىرۋ تۋرالى ۇسىنىستار ايتىلىپ، كىتاپحانا باسشىلىعى مەن ماماندارى وقىرماندار تاراپىنان قويىلعان سۇراقتارعا جاۋاپ بەردى.

كونفەرەنتسيا سوڭىندا كىتاپحانانىڭ بەلسەندى وقىرماندارى ماراپاتتالدى.

الماتى