اتالمىش ءتۋرنيردى ۇىمداستىرۋعا الماتى قالاسى قوعامدىق دامۋ باسقارماسىنىڭ قولداۋىمەن حالىقارالىق «جاناشىر» قوعامدىق قورى جانە قازاقستان شاحمات فەدەراتسياسى ۇيىتقى بولدى.
زاماناۋي الەمدە ەلدەردىڭ ەكونوميكالارى عانا ەمەس, تۇتاستاي مادەنيەتتەر دە باسەكەگە ءتۇسىپ وتىر. اۋىزدىقتارىمەن الىسقان الپاۋىت ەلدەرمەن تەرەزەسى تەڭ بولۋدىڭ العىشارتتارىنىڭ ءبىرى – وسكەلەڭ ۇرپاقتىڭ بويىنا ۇلتتىق قۇندىلىقتاردى ءسىڭىرىپ, قاتپارلانعان تاريحىن جادىندا ساقتاۋ ەكەندىگى داۋسىز.
بۇل دا «رۋحاني جاڭعىرۋ» مەملەكەتتىك باعدارلاماسىنىڭ ءبىر ۇستىنى بولىپ تابىلماق. ءار ەلدىڭ ءومىر كەڭىستىگىندە ءجۇرىپ وتكەن سوقپاعى كوپ داڭعىل جولى بار. «جەلتوقسان وقيعاسى» دا قايمانا قازاقتىڭ سول سوقپاقتارىنىڭ ءبىرى. قانشا قاسىرەتتى بولسا دا ونى ەستە ساقتاپ, ۇلاعات ەتىپ ۇرپاققا جەتكىزۋ تاريح الدىنداعى مىندەت.
سونداي ۇلاعاتتى ءىستىڭ ءبىرى – حالىقتىڭ قاھارمان ۇلى قايرات رىسقۇلبەكوۆ اتىنداعى شاحمات ءتۋرنيرى. وسى ارقىلى قاھارمان ۇلدارىنىڭ ەسىمىن ۇلتتىڭ جادىندا جاڭعىرتۋ, ەرلىگىن جاستارعا ۇلگى ەتۋ.
تۋرنيرگە رەسپۋبليكانىڭ ءار وڭىرىنەن جيىرما تالاپكەر قاتىسۋعا ءوتىنىش بىلدىرگەن. شامات جارىسىنا جينالعان جاستار, الدىمەن جەلتوقسانشىلاردىڭ تاۋەلسىزدىكتى ارقاۋ ەتكەن اڭگىمەلەرىن تىڭدادى. جەلتوقسان وقيعاسىنان, قايرات رىسقۇلبەكوۆتىڭ ەرلىگىنەن سىر شەرتىلدى.
وسىدان كەيىن باستاۋ العان بليتس-تۋرنيرگە قازاقستان شاحمات فەدەراتسياسىنىڭ وكىلدەرى تورەلىك ەتتى. ويلىلار ويىنىنا قاتىسۋشىلار ءوزارا باق سىناسىپ, ۇشەۋى سۋىرىلىپ العا شىقتى. ۇزدىك ويىن كورسەتكەن جالماحانوۆ رامازان – ءبىرىنشى ورىن, اڭسات الديار – ەكىنشى ورىن, يسانكۋلوۆ ارىستان – ءۇشىنشى ورىنداردى يەمدەندى.
ويىن بارىسىن باقىلاپ, ويىنشىلارعا دەمەۋ كورسەتىپ وتىرعان جەلتوقسانشىلار جەڭىمپازداردىڭ ماراپاتتارىن تاپسىرىپ, شىن ىقىلاسپەن قۇتتىقتاۋلارىن جەتكىزدى.
الماتى
