ءىس-شاراعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى جانسەيىت تۇيمەباەۆ, پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل, پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى زارەما شاۋكەنوۆا, قحا مۇشەلەرى, عىلىمي-ساراپشىلىق كەڭەسى مەن ەتنومادەني بىرلەستىكتەردىڭ وكىلدەرى, قحا ايماقتىق عىلىمي-ساراپشىلىق توپتارى مەن كافەدرالارى, قوعام قايراتكەرلەرى مەن زيالى قاۋىم وكىلدەرى قاتىستى.
– بيىل ەلىمىزدە ماڭىزدى قوعامدىق-ساياسي وقيعالار مەن پروتسەستەر بولدى. ناۋرىز ايىندا ەلباسى ءوزىنىڭ پرەزيدەنت وكىلەتتىگىن توقتاتىپ, ماۋسىم ايىندا كەزەكتەن تىس پرەزيدەنتتىك سايلاۋ ءوتتى, جاڭا پرەزيدەنت سايلاندى. قىركۇيەك ايىندا پرەزيدەنت قاسىم-جومارت توقاەۆتىڭ جولداۋىندا بىرقاتار جاڭا مىندەتتەر ايقىندالدى. اسسامبلەيا جانە عىلىمي-ساراپشىلىق كەڭەس وسى پروتسەستەردى حالىققا ءتۇسىندىرۋ بويىنشا بەلسەندى جۇمىس جۇرگىزۋدە, – دەدى ج.تۇيمەباەۆ.
وتىرىس بارىسىندا اسسامبلەيانىڭ عىلىمي-ساراپشىلىق باعىتى بويىنشا تاپسىرمالاردىڭ ورىندالۋ بارىسى, ورتالىق ازياداعى ەتنوسارالىق جانە كونفەسسياارالىق قاتىناستاردى زەرتتەۋ ورتالىعىنىڭ جۇمىس ناتيجەسى, سونداي-اق «قازاقستانداعى ەتنوستار: ەل دامۋىنا قوسقان ۇلەسى» جوباسىنىڭ جۇزەگە اسۋى جانە جالپى زەرتتەلۋى بويىنشا جۇمىس جوسپارىنىڭ ورىندالۋ بارىسى تالقىلاندى.
– جىل كولەمىندە ءتۇرلى زەرتتەۋلەر جۇرگىزىلىپ, جوعارى وقۋ ورىندارىندا, حالىقارالىق ساراپشىلىق ورتادا اۋقىمدى جۇمىس اتقارىلعان ەدى. بۇگىنگى وتىرىس قازاقستان حالقى اسسامبلەياسى عىلىمي-ساراپشىلىق كەڭەسىنىڭ 2019 جىلى اتقارعان جۇمىستارىن قورىتىندىلاۋعا باعىتتالدى. وعان قازاقستان ايماقتارىنان ەلۋدەن استام ساراپشى مەن عالىم قاتىسىپ وتىر, – دەدى قازاقستان حالقى اسسامبلەياسى عىلىمي-ساراپشىلىق كەڭەسىنىڭ توراعاسى ايگۇل سادۋاقاسوۆا.
ءىس-شارا سوڭىندا قوعامدىق كەلىسىم مەن جالپىۇلتتىق بىرلىكتىڭ مودەلىنە ارنالعان ۇزدىك عىلىمي جوبا سايىسىنىڭ جەڭىمپازدارى ماراپاتتالدى.
