مەملەكەتتىك حاتشى قىرىمبەك كوشەرباەۆ ءسوز باسىندا تاۋەلسىزدىك مەرەكەسى قارساڭىندا جىل سايىن قازاقستاننىڭ جارقىن بولاشاعى جولىندا قاجىرلى ەڭبەگىمەن قالتقىسىز ەڭبەك ەتىپ جاتقان اسىل ازاماتتارىمىزدى مارتەبەلى مەملەكەتتىك ناگرادالارمەن ماراپاتتاۋ يگىلىكتى داستۇرگە اينالعانىن اتاپ ءوتتى.
– تاۋەلسىزدىكتىڭ ءمانى دە, ماڭىزى مەن ماعىناسى دا ايرىقشا. قازاق دەگەن حالىقتىڭ سان عاسىرعا جالعاسقان جانە بۇگىندە ىسكە اسقان ارمانى. دەربەس مەملەكەت قۇرۋ – حالقىمىزدىڭ بايىرقالى بوستاندىققا, ەگەمەن ەلدىككە, ازات رۋحقا دەگەن ارپالىسىنىڭ ناقتى جەمىسى. تاۋەلىزدىكتى ورنىقتىرۋدا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ وراسان زور كۇش-جىگەرى, تەرەڭ اقىل-پاراساتى, سىندارلى, سالماقتى ساياساتى جانە بارلىق قازاقستاندىقتىڭ بىرلىگى مەن جاسامپاز ەڭبەگى ايرىقشا ءرول اتقارعان. بۇگىنگى تاڭدا تاۋەلسىزدىكتى نىعايتۋداعى تاريحي جولدى جالعاستىرىپ كەلە جاتقان مەملەكەت باسشىسى قاسىم-جومارت توقاەۆ قازاقستاننىڭ تاياۋ جىلدارداعى قارقىندى دامۋ باعىتتارىن بەلگىلەپ, اتالعان مىندەتتەرى شەشۋدىڭ ناقتى جولدارىن كورسەتىپ بەردى. ءبىزدىڭ ماقسات – وسى كەلەلى مىندەتتەردى ءبارىمىز جۇمىلعان جۇدىرىقتاي بىرگە جۇزەگە اسىرىپ, تاۋەلسىزدىگىمىزدى جاڭا بەلەسكە كوتەرۋ, تاۋەلسىزدىگىمىزدى باياندى ەتۋ. بۇل ورايدا سىزدەر ءار سالاداعى ەڭبەكتەرىڭىزبەن مەملەكەتتىلىكتىڭ ىرگەسىن بەكەمدەۋگە, ەلىمىزدىڭ الەۋمەتتىك-ەكونوميكالىق قوعامدىق-ساياسي جانە مادەني-رۋحاني دامۋىنا, ساليقالى ۇلت, سالاماتتى ۇرپاق قالىپتاستىرۋ ىسىنە ەلەۋلى ۇلەس قوسىپ جۇرسىزدەر. سوندىقتان مەملەكەت باسشىسىنىڭ جارلىعىمەن سىزدەر تاۋەلسىز ەلىمىزدىڭ جوعارى مەملەكەتتىك ناگرادالارىمەن ماراپاتتالدىڭىزدار, – دەدى قىرىمبەك كوشەرباەۆ.
بۇدان كەيىن مەملەكەتتىك حاتشى بىرقاتار ازاماتقا ءىى, ءىىى دارەجەلى «بارىس» وردەنىن, «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىن, «پاراسات» وردەنىن, ءىى دارەجەلى «دوستىق» وردەنىن, «قۇرمەت» وردەنىن, ءىىى دارەجەلى «ەڭبەك داڭقى» وردەنىن تاپسىردى. سونداي-اق ءبىر توپ عالىم ءال-فارابي اتىنداعى عىلىم مەن تەحنيكا سالاسىنداعى 2019 جىلعى مەملەكەتتىك سىيلىعىن يەلەندى. بۇعان قوسا «ەرەن ەڭبەگى ءۇشىن», «شاپاعات» مەدالدارىن كەۋدەسىنە تاعىپ جانە پرەزيدەنتتىڭ العىس حاتىن الىپ مەرەيى تاسىعاندار بار.
