قازاقستان • 12 جەلتوقسان، 2019

بۇل شارا – ءبىزدىڭ تاۋەلسىزدىك كۇنىنە تارتۋىمىز

35 رەتكورسەتىلدى

بۇل كۇندەرى كوپتەگەن قازاقستاندىق جانكۇيەر 16 جەلتوقساندا الماتىداعى بالۋان شولاق اتىنداعى مادەنيەت جانە سپورت سارايىندا وتەتىن كاسىپقوي بوكس كەشىن تاعاتسىزدانا كۇتۋدە. سەبەبى، وسى جارىستا ەكى بىردەي التىن بەلبەۋ ساراپقا سالىنادى. اقش-تىڭ ايگىلى ESPN تەلەارناسى ارقىلى بۇل باسەكەلەر تورتكۇل دۇنيەنىڭ 60-تان اسا مەملەكەتىندە تىكەلەي ەفيردەن كورسەتىلەدى. جارىس قارساڭىندا ءبىز ايتۋلى سپورتتىق شارانى ۇيىمداستىرۋشىسى - «MTK Global Kazakhstan» كومپانياسىنىڭ باسشىسى اسقار سالىقباەۆپەن سۇحباتتاسقان ەدىك.

–تاۋەلسىزدىك كۇنى قارساڭىندا ءبىز قازاقستاندىق جانكۇيەرلەرگە تاماشا سىي جاساۋدى قۇپ كوردىك، دەپ باستادى ءوز اڭگىمەسىن اسقار سالىقباەۆ.  

ء–بىزدىڭ ەلدە بوكسقا دەگەن قىزىعۋشىلىق پەن قۇرمەت ەرەكشە جانە دە وسى سپورت ءتۇرىن سەرىك ەتكەن ورەندەرىمىز تولاعاي تابىستارعا قول جەتكىزگەنىنە كۇللى الەم جۇرتشىلىعى كۋا. سول جەڭىسپەن ورىلگەن تاماشا ءداستۇردى جالعاستىرۋ – ءبىزدىڭ مىندەتىمىز. كاسىپقوي رينگتى جاعالاپ جۇرگەن جالىندى جاستارعا جول اشۋ ماقساتىندا الماتىدا ۇلكەن بوكس كەشىن ۇيىمداستىرىپ وتىرمىز. سول سەبەپتى دە 16 جەلتوقساندا بالۋان شولاق اتىنداعى سپورت سارايىنا كەلىڭىزدەر. بارلىعىمىز بىرىگىپ، ءوز جەرلەستەرىمىزگە بارىنشا قولداۋ كورسەتەيىك. ال ايتۋلى شارانى سىزدەر ەڭ قاسيەتتى ءارى قاستەرلى مەرەكە – تاۋەلسىزدىك كۇنىنە وراي ءبىزدىڭ جاڭادان عانا قۇرىلعان كومپانيامىزدىڭ قازاقستاندىق كورەرمەندەرگە جاساعان تارتۋى دەپ قابىلداڭىزدار. 

ء–سىز باسقارىپ وتىرعان كومپانيانىڭ قۇرىلعانىنا ءالى ءبىر جىلعا دا جەتكەن جوق. دەسەك تە سول قىسقا عانا مەرزىم ارالىعىندا ءبىراز اۋقىمدى شارالار وتكىزىپ ۇلگەرگەن ەكەنسىزدەر...

–بيىلعى جىلدىڭ جازىندا نۇر-سۇلتاندا قالا كۇنىنە وراي امەريكالىق Top Rank جانە بريتانيالىق MTK Global پروموۋتەرلىك كومپانيالارىمەن بىرگە كەرەمەت بوكس كەشىن وتكىزدىك. بۇل جارىستى دا امەريكالىق ESPN+ تەلەارناسى كورسەتتى. سونداي-اق iFL TV يۋتۋب جوباسى دا ارقىلى بۇل باسەكەلەر الەمنىڭ باس­قا دا ايماعىنا كەڭىنەن تاراتىلدى. وسىنىڭ بارلىعى قازاقستاننىڭ كاسىپقوي بوكسىنىڭ شارتاراپقا تارالۋىنا وڭ ىقپال ەتتى. بىرقاتار بىلعارى قولعاپ شەبەرلەرىمىزدىڭ ءوز جەكپە-جەكتەرىن شەت مەملەكەتتەردە وتكىزۋىنە قولايلى جاعداي جاسادىق. دەڭگەيى جوعارى سول ءدۇبىرلى دودالارعا قاتىسۋ ارقىلى وتانداستارىمىز الەمدىك رەيتينگتەگى جاعدايلارىن ءبىرشاما جاقسارتتى.

–قازىر كوماندالارىڭىزدا قانشا بوكسشى بار؟ باپكەرلەر قۇرامى قانداي؟ جۋان جۇدىرىقتى جىگىتتەردىڭ ەش الاڭسىز جاتتىعۋىنا قولايلى جاعدايدىڭ جاسالىپ وتىر ما؟

–كوماندامىزدىڭ قۇرامىندا سايدىڭ تاسىنداي 12 بوكسشى بار. ولاردىڭ بارلىعىنىڭ دا جولىنا ءبىز ۇلكەن ۇمىتپەن قاراپ وتىرمىز. كەلەشەكتە ارامىزدان ەڭ بەلدى نۇسقالاردىڭ التىن بەلبەۋى ءۇشىن تالاسۋعا قارىم-قابىلەتى جەتەتىن ساڭلاقتاردىڭ شىعاتىنىنا ەش كۇمانىم جوق. ال باپكەرلەر قۇرامىنا كەلەتىن بولساق، ساعاتبەك مۇساحانوۆ، قانات التاەۆ، داستان سادۋاقاسوۆ سىندى بىلىكتى ماماندارعا ارقا سۇيەپ وتىرمىز. الماتىداعى ءال-فارابي كوشەسىنىڭ بويىندا زامانۋيا تالاپتارىنا ساي جابدىقتالعان جاقسى سپورت زالىمىز بار. ءبىز بۇگىنگى تاڭدا ءوز جىگىتتەرىمىزدىڭ ەش الاڭسىز جاتتىعىپ، وزگە ەلدەردە وتەتىن ءىرى جارىستارعا قاتىسۋىنا بارىنشا جاعداي جاساپ وتىرمىز.

– تاۋەلسىزدىك كۇنىنە وراي الماتىدا وتەتىن بوكس كەشى جايىندا تولىعىراق مالىمەت بەرسەڭىز؟

–الماتىدا وتەتىن جارىستا ەكى بىردەي التىن بەلبەۋ ساراپقا سالىنادى. اتاپ ايتساق، ءالى ەشكىمنەن جەڭىلمەگەن جەڭىل سالماقتاعى قازاقستاندىق ۆيكتور كوتوچيگوۆ وزىنە تيەسىلى WBC International نۇسقاسىنىڭ چەمپيوندىق ءتاجىن قورعاپ قالۋ ءۇشىن ارگەنتينانىڭ ازۋلى بوكسشىسى حاۆەر حوسە كلاۆەرومەن كۇش سىناسادى. ال سۇلتان زاۋىربەك WBC Youth World Champion (جاستار) نۇسقاسىنىڭ التىن بەلبەۋى ءۇشىن تالاسادى. ايتۋلى جارىستا ءميراسالى سارسەنوۆ، ەسكەندىر حارسان، راي سەيىتجانوۆ، اباي تولەش، ەلشات نىعمەتوللا، نۇرتاس اجبەنوۆ جانە نۇردوس تولەباي سىندى وتاندىق بىلعارى قولعاپ شەبەرلەرى شارشى الاڭعا شىعادى. ولاردان بولەك، نيگەريا، وزبەكستان، رەسەي، فيليپپين، تايلاند، گرۋزيا جانە ءازىربايجاننان كەلگەن دەڭگەيى جوعارى بوكسشىلار ونەر كورسەتەدى. سونداي-اق، الاتاۋ باۋرايىندا ايقاساتىندار اراسىندا وزبەكستاننىڭ ماقتانىشى، ريو وليمپياداسىنىڭ جەڭىمپازى فازليددين گايبنازاروۆ تا بار.

ء–بىزدىڭ جىگىتتەردى الداعى ۋاقىتتا تاعى قانداي ءدۇبىرلى دودالار كۇتىپ تۇر؟

–كەلەسى جىلى ءوز ەلىمىزدە جانە شەت مەملەكەتتەردە بىرنەشە ءدۇبىرلى دودا ۇيىمداستىرۋدى كوزدەپ وتىرمىز. ۋاقىتى كەلگەندە ول جايىندا 100 جىلدىق تاريحى بار ەل گازەتى – «ەگەمەن قازاقستانعا» ەش ءبىرىنشى بولىپ اقپارات بەرۋگە دايىنبىز. 

–وسى سپورت ءتۇرىن سەرىك ەتكەن كوپتەگەن دارىندى جاستارىمىزدىڭ شەتەلگە كەتىپ جاتقانى جاسىرىن ەمەس. ولاردىڭ الدى – اقش پەن كانادا، گەرمانيا مەن ۇلىبريتانيادان باق سىناپ ءجۇر. بازبىرەۋلەر رەسەي مەن بەلارۋس ەلىندە ناپاقاسىن تابۋدا. وسى ورايدا كوپشىلىك قازاقستاندا جاتىعىپ ءجۇرىپ كاسىپقوي بوكستىڭ شىڭىراۋ شىڭىنا جەتۋ مۇمكىن ەمەس دەگەن ءۋاج ايتۋدا. ال ءسىزدىڭ پىكرىڭىز قانداي؟

–كۇنى بۇگىنگە دەيىن قازاقستاندا كاسىپقوي بوكستى دامىتۋ ستراتەگياسى دۇرىس جولعا قويىلماي كەلدى. قالىپتاسقان جۇيە دە بولمادى. ونى ءبىز مويىندايمىز. سول سەبەپتى دە كوپشىلىكتىڭ پىكىرى جوعارىداعىداي بولدى. قازىرگى كەزدە سول ولقىلىقتىڭ ورنىن تولتىرۋ ءۇشىن قازاقستاننىڭ نارىعىنا ەندى عانا ەنگەن «MTK Global Kazakhstan» كومپانياسى تاراپىنان  كوپتەگەن جۇمىس ىستەلىپ، قىرۋار شارۋا اتقارىلۋدا. ءبىزدىڭ باستى ماقساتىمىز – جالىنداپ تۇرعان جاستاردىڭ ۇلكەن ارەنالارعا شىعۋىنا داڭعىل جول اشۋ، وتاندىق كاسىپقوي بوكستى وركەندەتۋگە بارىنشا كۇش سالۋ. دارىندى جانە قارىمدى جىگىتتەر ەلىمىزدە وتە كوپ. وعان ەشكىمنىڭ كۇمانى بولماۋعا ءتيىس. ءداپ قازىر ءبىزدىڭ الدىمىزدا سول جاستاردى شوقتىعى بيىك جۇلدىزدارعا اينالدىرىپ، ولاردى گەننادي گولوۆكيننىڭ دەڭگەيىنە جەتكىزۋ مىندەتى تۇر. ول ءۇشىن شەكارا اسۋدىڭ ەش قاجەتى جوق جوق. قازاقستاندا ءجۇرىپ-اق، كوزدەگەن ماقساتىمىزعا قول جەتكىزە الامىز. وعان مەن دە، مەنىڭ كوماندام دا كامىل سەنەدى.

 

–  اڭگىمەڭىزگە راقمەت!

 

سوڭعى جاڭالىقتار

ءوز قارجىسىنا كىتاپحانا سالعان

ايماقتار • بۇگىن، 10:08

ساباننان جاسالعان قالاشىق

ايماقتار • بۇگىن، 10:05

وتانعا قىزمەت – ورتاق پارىز

قوعام • بۇگىن، 09:48

اۋىلعا كەل، جاس دارىگەر

ايماقتار • بۇگىن، 09:37

تاريح. تۇلعا. تۇركىستان

رۋحانيات • بۇگىن، 09:06

ادامدىقتىڭ قاينارى

رۋحانيات • بۇگىن، 08:55

بەرىك ءۋالي: اباي مەن الاش

رۋحانيات • بۇگىن، 08:54

التى كولىك قار قۇرساۋىنان شىعارىلدى

ايماقتار • 18 قاڭتار، 2020

18 قاڭتارعا ارنالعان اۋا-رايى بولجامى

قازاقستان • 18 قاڭتار، 2020

الماتى جاسىل قالاعا اينالادى

ەكولوگيا • 17 قاڭتار، 2020

ۇقساس جاڭالىقتار