قازىرگى كەزدە زاڭسىز سالىنعان عيماراتتاردى ءسۇرۋ ءىسى بويىنشا شۇبار تۇرعىن ءۇي الابىنداعى ق ۇلىندى كوشەسىندەگى 3 ۇيدە ءتيىستى جۇمىستار جۇرگىزىلۋدە.
«قالالىق ورتا ساپاسى جانە باقىلاۋ باسقارماسى» مم باسشىسى تولەگەن ق ۇلىشەۆتىڭ ايتۋىنشا, 2017 جىلدىڭ 20 ماۋسىمدا اتالعان عيمارات يەسىنە فۋنكتسيونالدى ماقساتىن وزگەرتپەي, تۇرعىن ءۇيدى قايتا قۇرۋ تۋرالى شەشىم قابىلدانعان. الايدا, عيمارات يەسى تۇرعىن ءۇيدى بۇزىپ, ءوز ەركىمەن ءتورت قاباتتى جاڭا ءۇيدىڭ قۇرىلىسىن باستايدى. بۇل ارەكەتى ءۇشىن قۇقىقبۇزۋشى اكىمشىلىك جاۋاپكەرشىلىككە تارتىلىپ, انىقتالعان ەسكەرتۋلەردى جويۋ تۋرالى بۇيرىق شىعارىلادى.
«عيمارات يەسىنە بىرنەشە رەت سوت ورىنداۋشىلارى تاراپىنان ەسكەرتۋلەر بەرىلدى, الايدا نىسان قوجايىنى سوت قاۋلىسىن ورىنداعان جوق. 1000 كۆ مەتر الاڭىن تولىق جاباتىن 4 قاباتتى كومەرتسيالىق ماقساتتاعى ءۇيدى زاڭسىز ءارى قۇرىلىس قىزمەتى سالاسىنداعى ستاندارتتاردى ەسكەرمەي كوتەرمەك بولعان. اتالعان عيماراتتى ءسۇرۋ ارقىلى نۇر-سۇلتانداعى زاڭسىز سالىنعان بارلىق نىسانداردىڭ سۇرىلەتىندىگىن حابارلايمىز», دەدى ت. ق ۇلىشەۆ.
بۇگىندە سوت شەشىمىن ورىنداۋ جانە ازاماتتاردىڭ ءومىرى مەن دەنساۋلىعىنا قاۋىپ توندىرمەۋ ماقساتىندا نىساندى بۇزۋ جۇمىستارى باستالدى. ءسۇرۋ جۇمىسى ءبىر اي بويى جۇرگىزىلەدى.
