ايماقتار • 12 جەلتوقسان، 2019

كوكسۋ اۋدانىنىڭ دارىگەرلەرى كونە عيماراتتاردا قىزمەت كورسەتۋدە

49 رەت كورسەتىلدى

الماتى وبلىسىندا جىل سايىن 15 مەديتسينالىق قىزمەت كورسەتۋ نىسانى جاڭادان ىسكە قوسىلۋدا. الايدا، اۋىلدىق وكرۋگتەردەگى تۇرعىندارعا العاشقى جاردەم بەرەتىن دارىگەرلىك امبۋلاتوريالاردىڭ جاعدايى سىن كوتەرمەيدى ەكەن.

مىسالعا، كوكسۋ اۋدانىنداعى ەكى اۋىلدىڭ مەديتسينالىق مەكەمەسى ورنالاسقان عيمارات قۇلاۋدىڭ الدىندا تۇر. اينابۇلاق ستانساسىنىڭ تۇرعىنى روزا تانەكەنوۆانىڭ ايتۋىنشا، اۋىلداعى فەلدشەرلىك پۋنكت ورنالاسقان نىسان 1934 جىلى سالىنعان. قازىر توزىعى جەتكەن عيماراتقا بارىپ، ەم الۋدىڭ ءوزى تاۋەكەلدى قاجەت ەتەدى. بيلىك وكىلدەرى بۇدان حاباردار. ستانساداعى دارىگەرلىك پۋنكت ءۇشىن جاڭا عيمارات سالۋ جايى شەشىلگەندىگىن ايتقان. قارجىسى دا بولىنگەن ەكەن. بىراق، قۇرىلىستىڭ قاشان باستالىپ، قاي كەزدە اياقتالاتىنى اۋىل تۇرعىندارىنا بەلگىسىز بولىپ وتىر.

وسى اۋداننىڭ اقشاتوعان اۋىلىنداعى دارىگەرلىك پۋنكتتىڭ دە توزىعى جەتىپ تۇر. ىرگەتاسى 1956 جىلى قالانعان عيماراتتا اق حالاتتى دارىگەرلەر امالسىزدان قىزمەت كورسەتىپ كەلەدى. ال وبلىس باسشىلىعىنا ءوتىنىش ايتقان اۋىل تۇرعىندارى امبۋلاتوريا نىسانىنىڭ «اۋىل – ەل بەسىگى» جوباسى ارقىلى جوندەلەتىندىگى جايلى جاۋاپ العان.

ايتپاقشى، بيىل وبلىس بويىنشا دەنساۋلىق ساقتاۋ سالاسىنا بولىنگەن بيۋدجەت قارجىسى  95،2 ملرد تەڭگەگە جەتتى. ونىڭ قوماقتى بولىگى ەلدى مەكەندەردەگى ەمحانا مەن دارىگەرلىك پۋنكتەردى جاڭعىرتۋ مەن جاڭادان سالۋعا ءبولىنىپ وتىر ەكەن.

سوڭعى جاڭالىقتار

ۇقساس جاڭالىقتار