قوعام • 12 جەلتوقسان، 2019

قايىرىمدىلىق جوبالارىنا 6 ملرد تەڭگە بولگەن قور

14 رەتكورسەتىلدى

بولات وتەمۇراتوۆ قورى 2019 جىلى ءوزىنىڭ قىزمەتىن كەڭەيتىپ، قايىرىمدىلىق جوبالارىنا بولىنگەن جالپى سوما 6 ميلليارد تەڭگەدەن اسقان. اتالعان كورسەتكىش وتكەن جىلعىدان التى ەسە كوپ. بۇل تۋرالى نۇر-سۇلتاندا وتكەن قوردىڭ قامقورشىلار كەڭەسىنىڭ قورىتىندىلارى بويىنشا ءباسپاسوز ءماسليحاتىندا ايتىلدى. جىل قورىتىندىلارىن قامقورشىلار كەڭەسىنىڭ مۇشەلەرى الماز شارمان، ولجاس سۇلەيمەنوۆ، ءجانيا اۋباكىروۆا جانە قوردىڭ ديرەكتورى مارات ايتماعامبەتوۆ شىعاردى.

2018 جىلى بولات وتەمۇراتوۆ قورى جوبالاردى ءارتاراپتاندىرۋ جانە ءوزىنىڭ قايىرىمدىلىق قىز­مەتىن كەڭەيتۋ ستراتەگياسىن قا­بىلداپ، ونى جىل بارىسىندا تابىستى ىسكە اسىرعان. قامقورشىلار كەڭەسىنىڭ توراعاسى الماز شار­ماننىڭ ايتۋىنشا، جالپى العاندا 2019 جىلى قور ءبىلىم بەرۋ، دەنساۋلىق ساقتاۋ، مادەنيەت، عىلىم، تابيعي ناۋبەتتەر مەن تەحنوگەندىك اپاتتاردان زارداپ شەگۋشىلەرگە قولداۋ كورسەتۋ، مۇق­تاج جاندار ءۇشىن تۇرعىن ءۇي قۇرىلىسى سالاسىندا توعىز جوبا بويىنشا جۇمىس ىستەگەن. 

«اۋتيزم. بارشامىزعا ءبىر الەم» اتتى «اسىل ميراس» اۋتيزم ورتالىقتارى جەلىسىن قۇرۋ بويىنشا قوردىڭ نەگىزگى جوباسى 2015 جىلدان بەرى ىسكە اسىرىلۋدا. ۇزدىك الەمدىك ادىستەمەلەر بويىنشا دايىندالعان ماماندار اۋتيستىك سپەكتر اۋىتقۋلارى بار بالالارعا قاجەتتى الەۋ­مەتتىك، كوممۋنيكاتيۆتىك، ومىر­لىك ماشىقتاردى دامىتۋعا كو­مەكتەسەدى. 2019 جىلى «اسىل مي­راس» ورتالىقتارىنىڭ سانى سەگىزگە دەيىن ۇلعايدى. نۇر-سۇلتان، الماتى، اقتوبە، قىزىلوردا، ورال جانە وسكەمەندەگى ورتا­لىقتارعا قوسىمشا ءبىز شىم­كەنت پەن پەتروپاۆلدا جاڭا ورتالىقتار اشتىق. «اسىل مي­راس» باعدارلامالارىنا بەس جىل­دىڭ ىشىندە بارلىعى 6 مىڭعا جۋىق بالا، ولاردىڭ ىشىندە 2،5 مىڭنان استامى تەك 2019 جىلى قابىلداندى. «اسىل ميراس» اۋتيزم ورتالىقتارىنىڭ بارلىق قىزمەتتەرى تەگىن»، دەپ اتاپ ءوتتى ا.شارمان.    

قۇرىلتايشىنىڭ شەشىمى بويىنشا 2019 جىلى قازاقستان ايماقتارىندا كوپ بالالى جانە تۇرمىسى تومەن وتباسىلارىنا باس­پانا سالۋ بويىنشا «بالامەكەن» اتتى جوباسى باستالعان. قوردىڭ قاراجاتىنا قىزىلوردا قالاسىندا 100 وتباسىنا جانە ارىس قالاسىندا 100 وتباسىنا ۇيلەر تۇرعىزىلعان. ۇيلەردىڭ قۇرىلىسىنا بولىنگەن جالپى سوما 1،3 ملرد تەڭگەنى قۇراعان. 

سونىمەن قاتار جيىنعا قا­تىسۋشىلار باس بوتانيكالىق باقتى قايتا قۇرۋ جوباسى بەلسەندى ىسكە اسىرىلىپ جاتقانىن جەتكىزدى. قازىرگى ساتكە دەيىن باقتىڭ ين­فرا­­­قۇرىلىمىن جاڭعىرتۋ، ونىڭ اۋماعىن اباتتاندىرۋ،­ جا­ڭا وسىمدىكتەر وتىرعىزۋ بو­يىنشا جۇمىستار اياقتالۋعا جاقىن. قور ديرەكتورى مارات ايتماعامبەتوۆتىڭ ايتۋىنشا، جوبانىڭ باستى پرينتسيپتەرى وسىمدىكتەرگە كۇتىم جاساۋ، سونداي-اق تولىق اشىقتىق بولىپ تابىلادى.

«جوبا اۋەل باستان اكىمدىكتىڭ، اكىمدىك جانىنداعى قوعامدىق كەڭەستىڭ، باق وكىلدەرىنىڭ قاتى­سۋىمەن قوعامدىق تىڭداۋدا كە­لىسىلگەن بولاتىن. بيىل ءبىز ازاماتتاردان تۇراتىن ەكى ۆولونتەرلىك توپ قۇردىق. ءبىرىنشى توپ قايتا قۇرۋ بويىنشا جۇمىستاردىڭ ورىندالۋىن قوعامدىق باقىلاۋدى جۇزەگە اسىرادى، ەكىنشىسى الداعى كوكتەمنىڭ بارىسىندا وسىمدىكتەر وتىرعىزۋمەن اينالىساتىن بولادى»، دەدى م.ايتماعامبەتوۆ.

قازاقستاننىڭ «قىزىل اي» قوعامىمەن بىرلەسىپ قور «كومەك كارتاسى» جوباسىن ىسكە اسىرۋدا. ونىڭ شەڭبەرىندە جىلدىڭ بارىسىندا قاراعاندى، سولتۇستىك قازاقستان، اقمولا جانە الماتى وبلىستارىندا تاسقىن سۋدان زارداپ شەككەندەرگە كومەك كورسەتىلگەن. جالپى سوماسى 54 ميلليون تەڭگە اقشالاي كومەكتى 400 وتباسىنان استام، ولاردىڭ قاتارىندا ۇيلەرى زاقىمدالعان ادامدار، جالعىز باستى زەينەتكەرلەر، مۇگەدەكتەر، جالعىز باستى انالار مەن كوپ بالالى تۇرمىسى تومەن وتباسىلار العان. سونىمەن بىرگە ارىستاعى جارىلىستان زارداپ شەككەن 2 مىڭ ادامعا 60 ميلليون تەڭگە كولەمىندە كومەك بەرىلگەن. سونىمەن قاتار «Burabike» سپورتتىق-مۋزىكالىق فەستيۆالى، باتىرحان شۇكەنوۆ اتىنداعى مۋزىكالىق كونكۋرسى دا اتالعان قوردىڭ اۋقىمدى شارالارىنىڭ ءبىرى.

سوڭعى جاڭالىقتار

دزيۋدو: بۇگىن جۇلدە بۇيىرمادى

كۇرەس • 24 قاڭتار، 2020

پرەزيدەنت اكىمدەرمەن كەڭەس وتكىزدى

پرەزيدەنت • 24 قاڭتار، 2020

ۇقساس جاڭالىقتار