كوميسسيا سۋ رەسۋرستارى سالاسىنداعى زاڭدىلىقتىڭ ساقتالۋى, مەملەكەت باسشىسىنىڭ بيزنەستى زاڭسىز اكىمشىلىك قىسىمنان جانە قىلمىستىق قۋدالاۋ قاتەرىنەن كورعاۋ جونىندەگى ماسەلەلەردى قارادى.
وتىرىستا جوعارعى سوت, باس پروكۋراتۋرا, رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى, سىبايلاس جەمقورلىققا قارسى ءىس-قيمىل اگەنتتىگى, قارجى مينيسترلىگى, ۇلتتىق ەكونوميكا مينيسترلىگى, يندۋستريا جانە ينفراقۇرىلىمدىق دامۋ مينيسترلىگى, ەكولوگيا, گەولوگيا جانە تابيعي رەسۋرستار مينيسترلىگى, سونداي-اق «اتامەكەن» ۇكپ باسشىلارىنىڭ ەسەپتەرى تىڭدالدى.
تالقىلاۋ بارىسىندا كوميسسيا مۇشەلەرى ەكولوگيا, گەولوگيا جانە تابيعي رەسۋرستار مينيسترلىگى سۋ رەسۋرستارى كوميتەتىنىڭ رەسپۋبليكادا سۋمەن قامتاماسىز ەتۋ ساپاسىن ەداۋىر تومەندەتۋگە جول بەرگەن جۇيەسىز ولقىلىقتارىنا نازار اۋداردى. اتاپ ايتساق, گيدروتەحنيكالىق نىسانداردىڭ 42 پايىزى اپاتتىق جاعدايدا تۇر, ماگيسترالدىق سۋ توراپتارىنداعى شىعىندى ازايتۋ, وڭالتۋ جانە جاڭا ينفراقۇرىلىمدار قۇرىلىسىنا قاتىستى پروبلەمالار وتكىر كۇيىندە تۇر.
بيىل كوميتەتتى جانە ونىڭ قۇرىلىمدىق بولىمشەلەرىن تەكسەرۋ بارىسىندا قىمقىرۋ, قارجىلىق زاڭ بۇزۋشىلىقتار, بيۋدجەت قاراجاتىن ءتيىمسىز جوسپارلاۋ جانە پايدالانۋدىڭ كوپتەگەن فاكتىسى انىقتالدى. سونىڭ سالدارىنان زاڭدىلىقتىڭ بۇزىلۋى بويىنشا 26 ۇسىنىم ەنگىزىلىپ, شىعىننىڭ جالپى سوماسى 8 ملرد-تان استام تەڭگەنى قۇرايتىن 25 فاكتى بويىنشا سوت الدى تەرگەۋ جۇمىستارى باستالدى. سوڭعى جىلدارى سىبايلاس جەمقورلىققا قارسى ءىس-قيمىل اگەنتتىگى كوميتەتتىڭ جانە وعان قاراستى ۇيىمداردىڭ قىزمەتكەرلەرى تاراپىنان جاسالعان بىرقاتار جەمقورلىق قىلمىستى تىركەدى, ولاردىڭ بارلىعى قىلمىستىق جاۋاپكەرشىلىككە تارتىلدى.
وسىنداي سىبايلاس جەمقورلىق قۇقىق بۇزۋشىلىقتارىنىڭ جولىن كەسۋ ماقساتىندا ايقىن ءارى اشىقتىق, ىزگىلىك قاعيداتتارىن كەڭ تۇردە ەنگىزۋ جانە رەسپۋبليكادا قوعامدىق باقىلاۋدى جۇزەگە اسىرۋ ءۇشىن ارنايى قۇرىلعان «ادالدىق الاڭى» جوبالىق ءوفيسى شەڭبەرىندە سىبايلاس جەمقورلىققا قارسى جۇمىس جۇرگىزۋدىڭ ماڭىزدىلىعى اتاپ ءوتىلدى.
كاسىپكەرلىك ەركىندىگىنىڭ كونستيتۋتسيالىق قۇقىعىن ىسكە اسىرۋ ماسەلەسى بويىنشا مەملەكەتتىك حاتشى قىرىمبەك كوشەرباەۆ باقىلاۋ, قاداعالاۋ قىزمەتى سالاسىندا كەڭ اۋقىمدى زاڭنامالىق رەفورمالار جۇرگىزىلگەنىن باسا ايتتى.
بۇل ورايدا كاسىپكەرلىك سۋبەكتىلەرىنە قاتىستى قىلمىستىق ىستەردى تىركەۋ قىسقارتىلىپ, اكىمشىلىك جانە قىلمىستىق زاڭناما ىزگىلەندىرىلدى, سونىمەن قاتار سالىقتىق قۇقىق بۇزۋشىلىقتى قىلمىسسىزداندىرۋعا باعىتتالعان نورمالار قاراستىرىلدى.
سونىمەن قاتار رەسپۋبليكادا زاڭسىز تەكسەرۋ سانى ازايىپ, قاۋىپ-قاتەرلەردى باسقارۋدى باعالاۋ جۇيەسى ەنگىزىلدى جانە ادامي فاكتوردى بولدىرماۋعا, تەكسەرۋ سۋبەكتىلەرىن دەربەس انىقتاۋعا مۇمكىندىك تۋعىزاتىن «تسوبت» (تەكسەرۋ سۋبەكتىلەرى مەن وبەكتىلەرىنىڭ بىرىڭعاي ءتىزىلىمى) اقپاراتتىق جۇيەسى ازىرلەندى. مەملەكەتتىك ورگانداردىڭ شاعىن جانە ورتا بيزنەسكە زاڭسىز ارالاسۋ فاكتىلەرىنىڭ الدىن الۋ جۇمىستارى بەلسەندى جۇرگىزىلۋدە, سول ارقىلى مىڭنان استام كاسىپكەردىڭ قۇقىعىن قورعاۋ مۇمكىن بولدى. ەلىمىزدىڭ بارلىق وڭىرىندە بيزنەس-جوبالاردىڭ سىبايلاس جەمقورلىققا قارسى سۇيەمەلدەنۋىن قامتاماسىز ەتەتىن فرونت-وفيستەر اشىلدى.
كوميسسيا شەشىمىمەن مەملەكەتتىك ورگاندارعا سۋ رەسۋرستارىن باسقارۋ سالاسىنداعى جوبالاردى ىسكە اسىرۋدا زاڭدىلىقتىڭ ساقتالۋىن تەكسەرۋ جونىندە قۇقىق قورعاۋ ورگاندارىنىڭ ءتيىمدى جۇمىسىن ۇيلەستىرۋدى قامتاماسىز ەتۋ, سونداي-اق بيزنەستى قورعاۋ ماسەلەلەرىندە ازاماتتىق-قۇقىقتىق قاتىناستاردا رەيدەرلىك فاكتىلەردى شەكتەۋ بويىنشا ادىستەمەلىك ۇسىنىمداردى ازىرلەۋ تاپسىرىلدى. وتىرىستى قورىتىندىلاي كەلە, كوميسسيا مۇشەلەرى باقىلاۋ-قاداعالاۋ قىزمەتىن تسيفرلاندىرۋ ماسەلەسىن جەتىلدىرۋدى جانە سىبايلاس جەمقورلىققا قارسى ءىس-قيمىل جونىندە جۇرتشىلىق اراسىندا اۋقىمدى اقپاراتتىق جۇمىس جۇرگىزۋدى ۇسىندى.
