جينالعاندار الدىندا قۇتتىقتاۋ ءسوز سويلەگەن ءماجىلىس توراعاسى:
– ءبىز ەگەمەن ەلىمىزدىڭ ەڭ مارتەبەلى, ەڭ ۇلى مەرەكەسى تاۋەلسىزدىك كۇنى قارساڭىندا ماجىلىستە حالىقارالىق شاحمات ءتۋرنيرىن وتكىزىپ وتىرمىز. بۇل ەندى ەلىمىزدىڭ ابىرويىن كوتەرىپ جۇرگەن داڭقتى سپورتشىلارمەن جىل سايىن ۇيىمداستىرلاتىن ءداستۇرلى شاراعا اينالادى. ال العاشقى كەزدەسۋدىڭ الەمنىڭ 4 دۇركىن چەمپيونى, حالىقارالىق گروسسمەيستەر دينارا سادۋاقاسوۆانىڭ قاتىسۋىمەن شاحماتتان باستالۋى – ول ەڭ الدىمەن وسى تانىمدىق ويىن ءتۇرىنىڭ دامۋىنا ۇلەس قوسۋمەن قاتار, وسكەلەڭ ۇرپاققا ۇلگى ەتە وتىرىپ, جاس ۇرپاق اراسىندا, مەكتەپ قابىرعاسىندا كەڭىنەن ناسيحاتتاۋعا جول اشاتىنى ءسوزسىز. سەبەبى شاحمات – سپورتتا دا, ومىردە دە دۇرىس قادام جاساۋعا ۇيرەتەدى, – دەدى ن. نىعماتۋلين.
ءماجىلىس توراعاسى اتاپ وتكەندەي, اتالعان تۋرنيرگە شەتەلدىك ارىپتەس-دەپۋتاتتاردىڭ نۇر-سۇلتانعا ارنايى كەلىپ, قاتىسۋى پارلامەنتارالىق ىنتىماقتاستىقتىڭ دا جوعارى دەڭگەيىن كورسەتەدى.
شارا بارىسىندا دينارا سادۋاقاسوۆاعا پالاتا سپيكەرى ەلەۋلى ەڭبەگى ءۇشىن پارلامەنت ءماجىلىسىنىڭ اتىنان ارنايى العىس حات تابىس ەتتى.
دينارا سادۋاقاسوۆا 18 تاقتادا ءبىر مەزگىلدە ويىن سەانسىن وتكىزدى.
ءوز كەزەگىندە دينارا سادۋاقاسوۆا مەرەيلى مەرەكە قارساڭىندا ءماجىلىس ۇيىمداستىرعان اۋقىمدى شاراعا زور قۋانىشپەن قاتىسقانىن جانە ونىڭ ەگەمەندىككە دەگەن ەرەكشە قۇرمەت رەتىندە باعالايتىنىن اتاپ ءوتتى.
ويىن قورىتىندىسىندا بىرنەشە اتالىم بويىنشا جەڭىمپازدار انىقتالدى. «ۇزدىك ويىن» بويىنشا ءماجىلىس دەپۋتاتتارى امانجان جامالوۆ, «ۇزدىك ءجۇرىس» اتالىمىندا ۆلاديسلاۆ كوسارەۆ, «جەڭىسكە دەگەن جىگەر» اتالىمى بويىنشا قۋانىش سۇلتانوۆ ماراپاتتالدى.
