ايماقتار • 11 جەلتوقسان، 2019

جاس مۇنايشىلارعا جاقسى مۇمكىندىك

29 رەتكورسەتىلدى

ۆيرتۋالدى جاتتىعۋ بولمەسى دەمەسەڭىز، كادىمگى كەن ورنىندا جۇرگەندەي اسەردە قالاسىز. اسىرەسە سۋ استىندا دانەكەرلەۋ ءتاسىلىن كوزبەن كورىپ قانا قويماي، قولمەن ىستەپ كورۋ ستۋدەنتتەرگە قىزىق. قاشاعان جوباسىندا قولدانىلاتىن بۇل ءادىستى بۇعان دەيىن شەتەلدىك ماماندار عانا جاسايتىن. ەندى سافي وتەباەۆ اتىنداعى اتىراۋ مۇناي جانە گاز ۋنيۆەرسيتەتىندە ءبىلىم الاتىن جاستار زاماناۋي يگىلىكتەردى قالاي قولدانۋ كەرەكتىگىن الىسقا بارماي-اق ۇيرەنە الادى. بۇل مۇمكىندىكتى ۋنيۆەرسيتەت جانىنان اشىلعان نۇرلان بالعىمباەۆ اتىنداعى دامۋ جانە كوممۋنيكاتسيالار ورتالىعى بەرىپ وتىر. جوعارى وقۋ ورنىنا جاڭا نىساندى مەملەكەت قايراتكەرىنىڭ وتباسى سىيلادى.

ەڭبەك جولىن قاراپايىم جۇمىسشى بولىپ باستاعان نۇرلان بالعىمباەۆ ۇكىمەت باسشىسى لاۋازىمىنا دەيىن كوتەرىلدى. ادال ەڭبەگىمەن، ازاماتتىق كەلبەتىمەن حالىققا قادىرلى بولا بىلگەن ازامات دۇنيەدەن وزعانىمەن، جاقسى ءىسى جالعاسىن تاۋىپ جاتىر. سونىڭ ءبىر دالەلى – وسى ورتالىق. ەلىمىزدەگى مۇناي-گاز سالاسى ماماندارىن دايىندايتىن جەتەكشى جوعارى وقۋ ورنىنا قازىرگى زامانعى ەڭ وزىق جەتىستىكتەرمەن جابدىقتالعان نىساندى سىيعا تارتۋ بالعىمباەۆتار اۋلەتىنىڭ جومارتتىعى عانا ەمەس، جاستارعا دەگەن جاقسىلىعى دا. قازىر بۇل وقۋ ورنىندا 4 مىڭنان استام ستۋدەنت 29 ماماندىق بويىنشا ءبىلىم الىپ جاتىر. بۇعان دەيىن تمد ەلدەرى بويىنشا رەسەيدىڭ ەكى قالاسىندا عانا بولعان ورتالىقتىڭ مۇنايلى اتىراۋدا اشىلۋى – ماقتانىش. ۆيرتۋالدى جاتتىعۋ بولمەسىنەن بولەك مۇندا لينگافون، وقۋ زالدارى، ينتەراكتيۆتى مۋزەي، ۆيرتۋالدى كىتاپحانا دا بار. سول ارقىلى ستۋدەنتتەر رەسەيدەگى گۋبكين اتىنداعى ۋنيۆەرسيتەتتىڭ كىتاپحاناسىنا قول جەتكىزە الادى. بۇل تالماي تالاپتانامىن دەگەن جاسقا ۇلكەن مۇمكىندىك.

ورتالىقتىڭ اشىلۋ سالتاناتىنا قاتىسقان وبلىس اكىمى نۇرلان نوعاەۆ: «تۇڭعىش پرەزيدەنت – ەلباسى نۇرسۇلتان نازارباەۆتىڭ كۇش-جىگەرىنىڭ ارقاسىندا ەلىمىزدىڭ ەكونوميكاسى قارقىندى دامىدى. تاۋەلسىزدىكتىڭ العاشقى جىلدارىنان-اق ەلباسى باستاماسىمەن الەمدەگى ەڭ ءىرى كومپانيالارمەن بايلانىس ورنادى. وسى جۇمىستاردىڭ بارىندە نۇرلان بالعىمباەۆ ەلباسىنىڭ سەنىمدى كومەكشىسى بولدى. ونىڭ ءبىلىمى، ىسكەرلىگى ينۆەس­تورلاردى مۇناي-گاز سالاسىنىڭ بولاشاعىنا سەندىرۋگە ىقپال ەتتى. بار كۇش-قايراتىن، تاجىريبەسىن ەلىمىزدىڭ وركەندەۋىنە ارناعان نۇرلان وتەپ ۇلىنىڭ وتباسىنا العىس ايتقىم كەلەدى. ونى جادىندا ساقتاپ، يگى ىستەرىن جالعاستىرىپ قانا قويماي، مامانداردىڭ جاس بۋىنىن قولداۋ ماقساتىندا وسىنداي جوبانى ۇسىنىپ وتىر»، دەپ اتاپ ءوتتى.

جاستار جىلى جۇزەگە اسقان جارقىن جوبا مۇناي-گاز سالاسىندا ءبىلىمدى دە بىلىكتى وتاندىق مامانداردىڭ قاتارىن ارتتىرۋدى ماقسات ەتەدى. ءۇش قاباتتى ۇلكەن عيماراتتا ستۋدەنتتەرمەن قاتار مۇنايشىلار دا ارنايى ترەنينگتەرگە قاتىسىپ، گەولوگيا، گەوفيزيكا باعىتىندا، كەن ورىندارىن يگەرۋدى باسقارۋ، مۇناي-گاز جۇيەسىن مودۋلدەۋگە ارنالعان ليتسەنزيالىق باعدارلامالارمەن جۇمىس ىستەيتىن بولادى. ن.بالعىمباەۆ اتىنداعى قوردىڭ وكىلى اسقار بالعىمباەۆ: «بۇل جەردە ءبىلىم العان مامان كەز كەلگەن كومپانيادا جۇمىس ىستەي الادى. ورتالىقتى جوبالاعان كەزىمىزدە قازىرگى زامانعى ەڭ وزىق تەحنولوگيامەن قامتۋعا ايرىقشا نازار اۋداردىق»، دەيدى.

 

اتىراۋ

 

سوڭعى جاڭالىقتار

قىس قىسىمىن ادام كۇشى جەڭۋدە

ايماقتار • بۇگىن، 16:56

تارازدا «اntikor ortalygy» اشىلدى

ايماقتار • بۇگىن، 16:10

200 تەڭگەلىك مونەتا اينالىمعا شىقتى

قازاقستان • بۇگىن، 10:39

قورجىنىمىز بوس قايتتى

قىسقى سپورت • بۇگىن، 06:56

ۇقساس جاڭالىقتار