جەمقورلىقتىڭ جولىن كەسۋدەگى ۇزدىك تاجىريبەلەردىڭ ءتيىمدى جولدارىن قاراستىرۋ جانە ونىڭ الدىن الۋدىڭ ۇتىمدى تاسىلدەرىن ورتاعا سالۋ ماقساتىنداعى فورۋمعا مەملەكەتتىك قىزمەت سالاسىنداعى استانا حاب باسقارۋشى كوميتەتىنىڭ توراعاسى ءا.بايمەنوۆ, رەسپۋبليكالىق ارنايى مونيتورينگتىك توپ باسشىسى ا.سولوۆەۆا, ءىىم قوعامدىق كەڭەسىنىڭ توراعاسى م.قوعاموۆ, كەڭەس وداعىنىڭ باتىرى ن.كرەمەنيش, «ەرىكتىلەر ليگاسى» قوعامدىق قورىنىڭ ءتورايىمى ا.ەرنيازوۆا, رەسپۋبليكالىق «ادالدىق الاڭى» جوبالىق كەڭسە جەتەكشىسى م.قارعاباي, ازەربايجان رەسپۋبليكاسىنىڭ مەملەكەتتىك ەمتيحان ورتالىعى توراعاسىنىڭ ورىنباسارى ب.حاليلوۆ, تۇركيا رەسپۋبليكاسى مارمارا (ىستانبۇل) ۋنيۆەرسيتەتىنىڭ پروفەسسورى ي.اتتيلا, نيۋ-يورك (اقش) پوليتسياسىنىڭ ۇزدىك قىزمەتكەرى د.نيازوۆ, حالىقارالىق ساراپشىلار, عالىمدار مەن قۇقىق قورعاۋ ورگاندارىنىڭ ارداگەرلەرى, ورتالىق جانە جەرگىلىكتى اتقارۋشى ورگانداردىڭ لاۋازىمدى تۇلعالارى قاتىستى. جيىندا وبلىس اكىمىنىڭ ورىنباسارى ۇ.تاجىباەۆ ەلباسىنىڭ تاريحي شەشىمىمەن وبلىس بولىپ قۇرىلعان تۇركىستان جەرىن جەمقورلىقتان تازارتىپ, ادالدىقتىڭ مەكەنىنە اينالدىرۋدا حالىقارالىق فورۋمنىڭ قوسار ۇلەسى زور ەكەنىن اتاپ ءوتىپ, ءوزىنىڭ پايىمدى وي-پىكىرىن ءبىلدىردى. ال ءاليحان بايمەنوۆ جەمقورلىققا قارسى كۇرەستى اگەنتتىكتىڭ, پروكۋراتۋرانىڭ نەمەسە سوتتىڭ جۇمىسى دەپ قاراماۋ كەرەكتىگىن, بۇل بۇكىل حالىقتىق ءىس ەكەندىگىن جانە باتپانداپ كىرگەن دەرتتى شىعارۋ ءۇشىن ءاربىر ازامات, سونىڭ ىشىندە ءاربىر باسشى تازالىقتىڭ, ادالدىقتىڭ ۇلگىسىن كورسەتۋى ءتيىس ەكەندىگىن تىلگە تيەك ەتتى. سونداي-اق فورۋمعا اقش-تان ارنايى كەلگەن نيۋ-يورك پوليتسيا دەپارتامەنتىنىڭ ۇزدىك قىزمەتكەرى د.نيازوۆ تۇركىستاننىڭ بولاشاعى جارقىن ءارى كەلەشەگى كەمەل بولارىنا سەنىم ءبىلدىرىپ, وتاندىق پوليتسيانىڭ شتات سانىن وڭتايلاندىرۋ ارقىلى ەڭبەك ونىمدىلىگىنىڭ ساپاسىن ارتتىرۋعا بولاتىندىعىن جەتكىزدى.
سىبايلاس جەمقورلىق – ەل ەكونوميكاسىنىڭ كەمەلدەنۋىنە كەدەرگى كەلتىرىپ, مەملەكەتتىڭ مەجەلى ماقساتقا جەتۋىنە تۇساۋ بولاتىن قاۋىپتى كەسەل. جەڭ ۇشىنان جالعاسقان جەمقورلىق كەز كەلگەن قۋاتتى ەلدىڭ الەۋەتىن قۇلدىراتىپ, حالىقتىڭ بيلىك ينستيتۋتتارىنا دەگەن سەنىمىنە سەلكەۋلىك تۇسىرەدى. باسەكەلەستىك قابىلەتىن باسەڭدەتىپ, مەملەكەتتىڭ وركەنيەت كوشىنە ىلەسۋىنە وراسان زور نۇقسان كەلتىرەدى. قوعامدىق ىندەتپەن بۇكىل الەم بولىپ كۇرەسۋ ماقساتىندا بىرىككەن ۇلتتار ۇيىمىنىڭ ۇيعارۋىمەن 9 جەلتوقسان – حالىقارالىق سىبايلاس جەمقورلىققا قارسى كۇرەس كۇنى بولىپ بەلگىلەنىپ, بۇگىنگى كۇنى كولەڭكەلى قىلمىستىڭ جولىن كەسۋدە جالپى قوعامعا ءتان ورتاق باستامالار جۇزەگە اسىرىلىپ كەلەدى.
تاعىلىمدى تاريحقا تولى رۋحاني مەكەن تۇركىستان وڭىرىندە العاش رەت وتكىزىلگەن تاجىريبە الماسۋ جيىنىنىڭ وزىندىك ەرەكشەلىگى دە سىبايلاس جەمقورلىقسىز ادال قوعامدى قالىپتاستىرۋ. مۇنداي يگى باستاماعا قۇرىلعان حالىقارالىق فورۋمنىڭ تۇركى جۇرتىنىڭ اسىل بەسىگى – تۇركىستان قالاسىندا وتۋىنە بارلىق رۋحاني نەگىزدەر بار. بۇل فورۋم الداعى ۋاقىتتا دا ءوز جالعاسىن تاۋىپ, شەتەلدىك ساراپشىلاردىڭ بەلسەنە قاتىسۋىمەن تۇراقتى تۇردە وتكىزىلىپ تۇراتىن بولادى. وسى ورايدا ءىىم قوعامدىق كەڭەسىنىڭ توراعاسى م.قوعاموۆ مۇنداي حالىقارالىق فورۋمدى كەم دەگەندە ەكى جىلدا ءبىر رەت تۇركىستاندا وتكىزۋ قاجەت دەگەن ۇسىنىسىن جەتكىزدى.
قوعام ىندەتىمەن قارقىندى كۇرەسۋدىڭ جولىن قاۋزاعان فورۋم سوڭىندا سىبايلاس جەمقورلىققا قارسى ءىس-قيمىل اگەنتتىگى تۇركىستان وبلىسى بويىنشا دەپارتامەنتى قىزمەتكەرلەرىنىڭ جانە دەپارتامەنت قامقورلىعىنداعى ارىس قالاسىنداعى «ت.تاجىباەۆ اتىنداعى وتباسى ۇلگىسىندەگى بالالار اۋىلى» تاربيەلەنۋشىلەرىنىڭ قاتىسۋىمەن تۇسىرىلگەن «1424» كوركەم ءفيلمى العاش رەت كورسەتىلىپ, قاتىسۋشىلارعا تەرەڭ وي سالدى. حالىقارالىق فورۋم تاريحي ولكەنى جەمقورلىق كەسەلىنەن ارىلتىپ, وركەنيەت وشاعى مەن ادالدىق مەكەنىنە اينالدىرۋعا بىردەن-ءبىر نەگىزگى قادام بولماق.
حاكيم كوشقاليەۆ,
سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتىنىڭ باسشىسى, 3-سىنىپتى مەملەكەتتىك ادىلەت كەڭەسشىسى
