جىبەك پەن كيىزدەن جاسالعان كيىمدەر مەن بۇيىمداردىڭ سالماعى نەبارى 20-200 گرامم. شارانىڭ ماقساتى – ەجەلگى ۇلتتىق قولونەر بۇيىمدارىن كوپشىلىككە كەڭىنەن ناسيحاتتاۋ. ءجۇن مەن كيىزدەن جاسالعان زاماناۋي جەيدەلەر, باس كيىمدەر جانە سىرت كيىمدەردىڭ ءتۇرلى ءتۇستى نۇسقالارى كەلگەن كورەرمەندەردى تاڭ قالدىردى. ۇيىمداستىرۋشىلاردىڭ ايتۋىنشا بۇل كورسەتىلىمگە زەينەتكەرلەر ءبىر اي كولەمىندە دايىندالعان, دەپ حابارلادى almaty.tv.
«بۇل مەرەكەلىك ءىس-شاراعا قازاقي ءجۇن مەن كيىزدەن بۇيىمدار جاساۋدى ۇناتاتىندار جينالدى. ءبىز قازاقتىڭ قولونەرىن بارىنشا تانىتقىمىز كەلەدى. جانە دە جۇرتشىلىققا ونىڭ زامانۋي ۇلگىسىن ۇسىنۋدى ماقسەت تۇتتىق. وزدەرىڭىز كورگەندەي, قانداي كەرەمەت بۇيىمدار جاسالدى. بارلىق كيىمدەردىڭ بەلگىلى ءبىر اۆتورى بار جانە ولار تەك ءبىر عانا دانادان جاسالعان. ەڭ قىزىعى بۇيىمدار ەگدە جاستاعى قارتتاردىڭ قولىنان شىققان», دەدى بەلسەندى ۇزاق ءومىر ءسۇرۋ ورتالىعىنداعى ەڭبەك تەراپياسىنىڭ نۇسقاۋشىسى ەلەنا دارچەنكو.
ەڭ قىزىعى, ءسان كورسەتىلىمىندە «مودەل» بولعاندار – زەينەتكەرلەردىڭ ءوزى. بەلسەندى ءومىر ءسۇرۋ ورتالىعىنىڭ ءبىلىم بەرۋ باعدارلاماسى اياسىندا جۇزەگە اسقان بۇل جوبا زەينەت جاسىنداعى جانداردىڭ ۋاقىتىن ەرەكشە قىزىقتى جاعدايدا وتكىزۋگە مۇمكىندىك بەرەدى. قازىرگى تاڭدا
«الماتىنىڭ كيىز-قولونەرشىلەرى» كلۋبىندا ەلۋدەن استام قارت بار.
