ايماقتار • 10 جەلتوقسان، 2019

مەملەكەتكە ءتان ەمەس قىزمەتتەر جايى تالقىلاندى

29 رەتكورسەتىلدى

ماڭعىستاۋ وبلىسىنىڭ كاسىپكەرلەر پالاتاسىندا مەملەكەتتىك ورگان وكىلدەرى مەن كاسىپكەرلەر باس قوسىپ مەملەكەتكە ءتان ەمەس قىزمەتتەردى باسەكەلەستىك ورتاعا جانە ءوزىن-ءوزى رەتتەيتىن ۇيىمدارعا بەرۋ تۋرالى ماسەلەنى تالقىلادى. بۇل تۋرالى اتالمىش پالاتانىڭ ءباسپاسوز قىزمەتى حابارلادى.

نەگىزگى ماقسات- 133 مەملەكەتتىك قىزمەتتى الۋعا نارىقتىڭ دايىندىعى قانداي ەكەنىنە تالداۋ جۇرگىزۋ.  ونى انىقتاۋ ءۇشىن ۇلتتىق ەكونوميكا ءمينيسترىنىڭ 2019 جىلعى 29 شىلدەدەگى №70 «مەملەكەتتىك فۋنكتسيالاردى باسەكەلەس ورتاعا بەرۋدىڭ كەيبىر ماسەلەلەرى تۋرالى» بۇيرىعىمەن بەكىتىلگەن قاعيدالارعا سايكەس كونسۋلتاتيۆتىك-كەڭەسشى ورگانى قۇرىلۋى ءتيىس.

مەملەكەتتىك قىزمەت ىستەر جانە سىبايلاس جەمقورلىققا قارسى ءىس-قيمىل اگەنتىگىنىڭ ماڭعىستاۋ وبلىسى بويىنشا دەپارتامەنتىنىڭ باسشىسى نۇرگۇل جاننازاروۆا: «بۇل ماسەلە وڭىرلەردە كەڭىنەن تالقىلانىپ جاتىر. مەملەكەتتىك قىزمەتتەردىڭ قۇزىرەتتەرىنە قاراستى ولقىلىقتار بولىپ جاتسا، قۇقىقتىق نورماتيۆتىك اكتىلەرگە بايلانىستى زاڭعا تومپاق كەلەتىن جاعدايلاردا كەڭەس بەرۋگە، بىرلەسىپ ۇسىنىستار جاساۋعا دايىنبىز. بولاشاقتا ءاربىر تۇتىنۋشى تاراپىنان قىزمەتتەردى الۋ كەزىندە نارازىلىق بولماۋى كەرەك» دەدى.

قازىرگى ۋاقىتتا ۇسىنىلىپ وتىرعان 133 مەملەكەتتىك قىزمەتتىڭ بارلىعىن بيزنەس قابىلداۋعا دايىن ەمەس. ولاردىڭ ىشىندە باقىلاۋ جانە قاداعالاۋ فۋنكتسيالارىن مىندەتتى تۇردە مەملەكەتتىڭ ءوزى اتقارۋى كەرەك، ال كەيبىر قىزمەتتەر بيزنەس ءۇشىن اسا ءتيىمدى ەمەس دەگەن ۇيعارىمعا كەلدى جيىنعا قاتىسۋشىلار.

-بيزنەس اتالعان 133 مەملەكەتتىك قىزمەتتەردىڭ ءتيىمدىسىن عانا الىپ، باسەكەلەس ورتاعا بەرۋدى ۇسىنامىن. بيزنەس وكىلدەرىنە بۇل فۋنكتسيالاردى قالدىرعاننان نە ۇتامىز؟ كاسىپكەرلەر قابىلداۋعا دايىن فۋنكتسيالاردى ءبولىپ الىپ، ەكشەپ، سارالاۋىمىز كەرەك، دەدى وكپ ديرەكتورى نۇربەك قاراساەۆ.

شارا سوڭىندا 133 فۋنكتسيانى جۇزەگە اسىراتىن مەملەكەتتىك ورگانداردىڭ وكىلدەرىنەن جانە بيزنەس-قاۋىمداستىقتان تۇراتىن جۇمىس توبى قۇرىلاتىن بولىپ شەشىلدى.

ەسكە سالايىق، اعىمداعى جىلدىڭ16 قاراشاسىندا  پرەمەر-ءمينيستردىڭ ءبىرىنشى ورىنباسارى – قارجى ءمينيسترى اليحان سمايلوۆتىڭ توراعالىق ەتۋىمەن ورتالىق جانە جەرگىلىكتى اتقارۋشى ورگانداردىڭ فۋنكتسيالارىن باسەكەلەستىك ورتاعا بەرۋ جونىندەگى كوميسسيا وتىرىسى وتكىزىلىپ، ونىڭ قورىتىندىسى بويىنشا مەملەكەتتىك ورگاندارعا 133 مەملەكەتتىك فۋنكتسيالاردى الۋعا نارىقتىڭ دايىندىعىنا تالداۋ جۇرگىزۋدى جانە ءتيىستى اقپاراتتى ۇلتتىق ەكونوميكا مينيسترلىگىنە جولداۋ تاپسىرىلعان ەدى. ۇلتتىق ەكونوميكا مينسيترلىگى «اتامەكەن» ۇكپ-مەن بىرلەسىپ، ۇكىمەتتىك ەمەس ۇيىمدار مەن اسسوتسيالاردىڭ، بيزنەستىڭ نارىقتا جاڭا قىزمەتتەرگە قول جەتكىزۋىنە مۇمكىندىك بەرەتىن كەيبىر مەملەكەتتىك فۋنكتسيالاردى الۋعا نارىقتىڭ دايىندىق دەڭگەيىن انىقتاۋ بويىنشا جۇمىستار جۇرگىزىلۋدە.

سوڭعى جاڭالىقتار

ۇقساس جاڭالىقتار