بۇگىنگى تاڭدا ءبىلىم جانە عىلىم مينيسترلىگى ستۋدەنتتەردىڭ باسپانامەن قامتىلىپ, الاڭسىز ءبىلىم الۋ ماسەلەسىن وڭتايلاندىرۋ ماقساتىندا ءبىرشاما جۇيەلى جۇمىستاردى جۇزەگە اسىرۋدا. ونىڭ نەگىزگى وزەگى – جاتاقحانا سالۋ مەن بۇرىن سالىنعان عيماراتتاردى جاتاقحاناعا بەيىمدەپ قايتا جاڭعىرتۋ جۇمىستارىن جۇرگىزۋگە مەملەكەتتىك تاپسىرىس قاراجاتىن ورنالاستىرۋ. وسىناۋ قاجەتتىلىككە وراي, بعم «قارجى ورتالىعى» اق مەملەكەتتىك تاپسىرىستى ورنالاستىرۋ قاعيداسىن دايىنداعان بولاتىن. اتالعان قۇجاتتا ورتاق مۇددەلى ىسكە جەكەمەنشىك سەكتوردى ەكىجاقتى وڭتايلىلىق جاعدايىندا تارتۋ شارتتىلىقتارى مەن ونى جۇزەگە اسىرۋ تەتىكتەرى قاراستىرىلعان ەدى.
اقپاراتتىق ناسيحات جۇمىستارىنىڭ پارمەندى جۇرگىزىلۋىنىڭ ناتيجەسىندە بۇگىندە ينۆەستورلار مەن جەكە كاسىپكەرلەر ستۋدەنت جاستار ءۇشىن جاتاقحانا سالۋ جانە بۇرىن باسقا باعىتتا قولدانىستا بولعان عيماراتتاردى جاڭادان جاڭعىرتىپ بەيىمدەۋ شارالارىنا كىرىسىپ تە كەتتى. وسى رەتتە ولاردىڭ قولعا العان ىستەرىنە الەۋمەتتىك نىسان دەپ قانا قاراماي, ءتۇسىمى تۇراقتى, كەلەشەگى ىلكىمدى بيزنەس-جوبا تۇرعىسىنان كەلۋلەرى كوڭىلگە قۋانىش ۇيالاتادى. شىنايى سۇرانىس كولەمىن زەردەلەۋ ەل كولەمىندە ستۋدەنتتەر ءۇشىن 75 مىڭ جاتاقحانا ورنى قاجەت ەكەندىگىن كورسەتىپ وتىر. سۇرانىس رەسپۋبليكانىڭ ءىرى قالالارىمەن قوسا, وبلىستىق ماڭىزداعى قالالاردى دا قامتيدى.
ستۋدەنتتەر جاتاقحاناسىن سالعان نەمەسە عيماراتتى قايتا بەيىمدەپ جاڭعىرتقان ينۆەستور, ياكي بولماسا جەكە كاسىپكەر نىساندى (جاتاقحانانى) ستۋدەنتتەر ءۇشىن قولدانىسقا ەنگىزگەن سوڭ مەملەكەت تاراپىنان 8 جىل بويى مەملەكەتتىك تاپسىرىستى ورنالاستىرۋ تاسىلىمەن قارجى تولەمدەرى جۇرگىزىلەدى. تولەم مولشەرى پايدالانۋعا تاپسىرىلعان جانە ستۋدەنتتەر ناقتى ورنالاسقان ورىنجايلار سانىنا ساي ايقىندالادى. جىل سايىن ءار ورىنجاي ءۇشىن 122 ايلىق ەسەپتىك كورسەتكىشى (اەك), عيماراتتى جاتاقحانا رەتىندە رەكونسترۋكتسيالانعان جاعدايدا 47 اەك كولەمىندە مەملەكەت قارجىسى تولەنەدى.
بۇرىن ستۋدەنتتەردىڭ جاتاقحانادا تۇرۋىنىڭ شەكتەۋلى تولەماقىسى ولاردىڭ شاكىرتاقىسىنىڭ 15 پايىزىنان اسپايتىن مولشەردە بەلگىلەنگەن ەدى. الايدا قۇرىلىس كومپانيالارىنىڭ وكىلدەرى شىققان شىعىننىڭ ورنىن تولدىرۋدى كوزدەيتىن بۇل كورسەتكىش بيزنەسكە دە, جوو-عا دا مەنشىك يەسى رەتىندە جاتاقحانانى ءتيىمدى باسقارۋ مۇمكىندىگىن بەرمەيدى دەپ ەسەپتەيدى. سول سەبەپتى, جاتاقحانا عيماراتتارىندا كاسىپكەرلىك باعىتىنداعى شارتتىلىقتاردى قوسا پايدالانۋ جولدارى دا قاراستىرىلا باستادى. ءۇشىنشى باستاما جۇزەگە اسىرىلا باستاعاننان بەرى 5404 ورىندىق 22 نىسان ىسكە قوسىلدى. جاڭادان ىسكە قوسىلعان جاتاقحانالاردىڭ ستۋدەنتتەر ءۇشىن ءبىر اي تۇرۋ قۇنى ورتاشا ەسەپپەن 8,5 مىڭ تەڭگەنى قۇرايدى. بۇل ءىرى قالالاردا ءبىلىم نارىمەن سۋسىنداپ, ستۋدەنتتىك شاقتارىن وتكىزىپ, پاتەر جالداپ جۇرگەن جاستار ءۇشىن قولجەتىمدى سومما. ماسەلەن, ورىنجاي جاڭادان ىسكە قوسىلعان قازاق ينجەنەرلىك-تەحنولوگيالىق ۋنيۆەرسيتەتىنىڭ جاتاقحاناسىندا – 15000 تەڭگە, «ديلماش» جسش – 4000 تەڭگە, ال «RnR Group» جشس جاتاقحاناسىندا – 10000 تەڭگە. جاتاقحانالار تۇرمىسقا قولايلى, جىلى, جارىق, تەگىن Wi-Fi, كىتاپحانالارمەن, كوۆوركينگ ورتالىقتارمەن جابدىقتالعان, كوپشىلىگىنىڭ سانيتارلىق توراپتارى بۇرىنعىداي بارشاعا ورتاق ەمەس, بولمە ىشىندە ورنالاسقان.
وسى ورايدا ايتا كەتەر جايت, جاتاقحاناداعى ورىندار كوبىنە ورنالاسۋ قۇقى العاشقى كەزەكتە مەملەكەتتىك ءبىلىم بەرۋ گرانتى نەگىزىندە وقۋعا تۇسكەن ستۋدەنتتەرگە, ونىڭ ىشىندە: جەتىم بالالار مەن اتا-اناسىنىڭ قامقورلىعىنسىز قالعان بالالار, مۇمكىندىگى شەكتەۋلى بالالار, تولىق ەمەس وتباسىلار مەن كوپ بالالى انالاردىڭ بالالارى, زەينەت جاسىنداعى كوپ بالالى وتباسىلاردىڭ بالالارىنا جەتەتىن. العا قويىلعان مەجە 2022 جىلعا دەيىن كەمىندە جاتاقحانالاردا 75 مىڭ جاڭا ورىندى ەنگىزۋ, تۇيتكىلدى ماسەلەنىڭ شەشىمىن تارقاتىپ, زاماناۋي جاتاقحانادا تۇرۋعا نيەت تانىتقان بارلىق ساناتتاعى ستۋدەنت جاستاردىڭ تۇرعىن جايىن شەشەدى دەگەن سەنىم مول.
«قارجى ورتالىعى» اق
