قاشاننان كاسىپكەرلىكتىڭ قۇلاشىن كەڭگە سەرمەۋىنە باسىمدىق بەرىلەتىن ەلىمىزدە جاستاردىڭ ءوز ءىسىن اشۋىنا جول كورسەتۋ نازاردان تىس قالعان ەمەس. بيىلعى جاستار جىلى اياسىندا قانات جايعان «جاس كاسىپكەر» جوباسى باستاۋىن بۇرىنعى «باستاۋ» جوباسىنان الادى.
بۇل باعىتتاعى ىستەردىڭ ىلگەرىلەۋىنە «اتاماكەن» ۇلتتىق كاسىپكەرلەر پالاتاسى سۇبەلى ۇلەس قوسىپ جاتىر. جاستارعا مول مۇمكىندىك تۋدىرعان وسى جىلى 29 جاسقا دەيىنگى قانشاما قازاقستاندىق «جاس كاسىپكەر» جوباسىنىڭ ارقاسىندا ءوز ءىسىن ءتيىمدى جۇرگىزۋ, تۇتىنۋشىلاردىڭ سۇرانىسىنا ساي ونىمدەردىڭ ءوندىرىسىن جولعا قويۋ سياقتى كاسىپكەرلىكتىڭ قىر-سىرىنا ابدەن قانىقتى. اتالعان جوبا اياسىندا ەلىمىز بويىنشا 20 مىڭ ازامات وقۋ كۋرسىنان ءوتىپ, ونىڭ 5 مىڭى جەكە كاسىبىن اشىپ ۇلگەرگەن.
«اتامەكەن» ۇكپ جاپپاي كاسىپكەرلىك جانە ميكروقارجىلاندىرۋ دەپارتامەنتى ديرەكتورىنىڭ ورىنباسارى اسەت سادۋاقاسوۆ «جاس كاسىپكەر» جوباسى اياسىندا جاستاردىڭ يدەيالارىن جەتىلدىرۋگە جانە ونى جۇزەگە اسىرۋ ءۇشىن قولداۋ كورسەتىلىپ, گرانتتار دا بولىنگەنىن ايتتى.
– ميكروبيزنەس اشقان جاستاردىڭ كوبى – كەشە عانا ەكى قولعا ءبىر كۇرەك ىزدەپ جۇرگەن جۇمىسسىز جاستار. بۇگىندە ولار جەكە كاسىبىن ىسكە قوسۋ ءۇشىن العاشقى قادامدارىن جاساپ جاتىر. كەيبىر بيزنەس ويلارى شيكى بولىپ جاتادى. ولاردىڭ تيىمسىزدىگى وقۋ بارىسىندا انىقتالادى. كۇمان تۋدىرعان جوبالارعا ماركەتينگتىك زەرتتەۋلەر جۇرگىزىلەدى. ساراپتامالاردىڭ دەنىن قاتىسۋشىلاردىڭ وزدەرى جاسايدى. يدەيالارى سىناقتاردان مۇدىرمەي وتسە, اۆتورى ءوز جوباسىن جۇزەگە اسىرۋعا كىرىسەدى. باستىسى – جاستاردىڭ الەۋمەتتىك بەلسەندىلىگى مەن ازاماتتىق جاۋاپكەرشىلىگىن ارتتىرۋ. وسى ماقساتتا ەل دەڭگەيىندە بىرقاتار جوبا كەشەندى تۇردە قولعا الىنىپ كەلەدى. مۇنداي يگى باستامالاردىڭ ءبىرى «Jasا» دەپ اتالادى. ول جاستاردىڭ ءوز ورتاسىندا, ياعني تۇرعىلىقتى قالاسى مەن ەلدى مەكەنىن كوركەيتۋگە ارنالعان جاڭاشىل كوزقاراسى مەن تىڭ ويلارىن جۇزەگە اسىرۋعا باعىتتالعان, – دەدى ول.
راسىندا, جاستار جىلى ىسكە قوسىلعان جاڭا جوبالاردىڭ
كوبى وڭىردەگى جاستاردىڭ ەكونوميكالىق ساۋاتىن كۇشەيتىپ, بيزنەسكە ايتارلىقتاي داعدىلانۋىنا سەپتىگىن تيگىزدى. بۇعان ەلدى مەكەندەردە كاسىبىن اشىپ, ناپاقاسىن تاۋىپ جۇرگەن ءبىراز جاستىڭ باستاماسى ايعاق بولا الادى. مىسالى, 18 جاستاعى ارىس قالاسىنىڭ تۇرعىنى جاننا كەمەلبەكوۆا «جاس كاسىپكەر» جوباسىنا قاتىسىپ, بيزنەس-جوسپارىن ءساتتى قورعاپ, گرانت يەگەرى اتانعان. بۇگىندە اۆتوكولىك جابىندىلارىن تىگەتىن شەبەرحاناسى بار ىسمەر قىزدىڭ ءىسى العا باسىپ, اۋىل تۇرعىندارىنان كولىك جابىندىلارىنا سۇرانىس ارتا باستاپتى.
جوعارىدا اتالعان «Jasا» جوباسىنا دا اۋىلدى ايماقتار مەن شاعىن قالالارداعى جاستار ەرەكشە بەلسەندىلىك تانىتىپ, قاتىسقان ەكەن. بۇل جونىندە «جۇمىسشى جاستار قوعامداستىعى» قب «Jasا» جوباسىنىڭ باعدارلامالىق مەنەدجەرى ارسەن قامبالوۆ ايتىپ بەردى. ونىڭ ايتۋىنشا, بۇل جوبا 14 پەن 28 جاس ارالىعىنداعى جاستاردى قولداۋعا باعىتتالعان. بۇگىندە اتالعان جوبانىڭ اياسىندا 104 باستاما قولعا الىنىپتى. جوبالاردىڭ تاقىرىپتىق اياسى مەن ءمان-ماڭىزى ءار الۋان بولعانىمەن, باستى ماقساتى – ەل يگىلىگى ءۇشىن جاسالىپ جاتقان الەۋمەتتىك باستامالار. ماسەلەن, ءبىرى مۇمكىندىگى شەكتەۋلى جاندارعا ارنالعان سپورتتىق الاڭ قۇرۋدى كوزدەسە, ەندى ءبىرى ازاماتتار قوعامدىق جەرلەردە ەرەكشە ورىندىقتار مەن جارىقتاندىرعىش قۇرىلعىلار ورناتىپ جاتىر ەكەن.
جالپى, بيىل جۇمىسشى جاستار قوعامداستىعى 5 جوبانى جۇزەگە اسىرعان. ونىڭ قاتارىندا «جاستار جۇمىسىنىڭ اكادەمياسى» دا بار. بۇل جوبانىڭ مەنەدجەرى بەيسەنالى قاراباەۆ اتىراۋ وبلىسىنىڭ جاستار ساياساتى جونىندەگى باسقارماسىمەن بىرلەسىپ, «جاستار جۇمىسىنىڭ اكادەمياسىن» اياققا نىق تۇرعىزۋ ءۇشىن كۇش سالىپ جاتقاندارىن اتاپ ءوتتى.
– بۇل ورتاق باستامامىز شەڭبەرىندە ءۇش ترەنينگ پەن ءبىر كونفەرەنتسيا وتكىزۋ جوسپارلاندى. قازىرگى تاڭدا ءبىز جوسپارلاعان بارلىق ءۇش ترەنينگتى دە ۇيىمداستىردىق. وندا ءبىز ەڭبەككە جارامدى جۇمىسشى جاستاردى قامتۋعا تىرىستىق. مۇنداي جوبا باسقا ەش جەردە بولماعانىن ەرەكشە اتاپ وتكىم كەلەدى. ساراپشىلار جاستار جىلى قازاقستاندا جۇزەگە اسىرىلعان بارلىق جوبالار ەكى قولعا ءبىر كۇرەك تاپپاي جۇرگەن جاس ازاماتتاردىڭ ەڭبەك نارىعىندا باسەكەگە قابىلەتتىلىگىن ارتتىرىپ, ەلىمىزدىڭ ەكونوميكاسىن دامىتۋعا ءوز ۇلەسىن قوسادى دەگەن سەنىمدى پىكىر ۇستانىپ وتىر, – دەدى بەيسەنالى قاراباەۆ.
ءماشھۇر ءجۇسىپتىڭ «جىگىتتىكتە جاننان كەش تە ءىس قىل: ولسەڭ – ولەسىڭ, ولمەسەڭ – كىسى بولاسىڭ» دەگەن اتالى ءسوزى بار. بيىلعى جاستار جىلىندا جاستاردىڭ جىگەرىن جانيتىن, قايراي تۇسەتىن باستامالار الداعى ۋاقىتتا بۇدان دا زور ناتيجەسىن كورسەتەتىنى انىق. ويتكەنى بولاشاعىمىز دەپ بىلەتىن تالاپتى جاستار بىلىگىن ارتتىرىپ, بىلەك سىبانا ىسكە كىرىسسە, ءبىراز بەلەستى باعىندىرامىز.
