جاڭادان سالىنىپ جاتقان ۇيلەر مەن ءتۇرلى نىساندار قاتارى دا كوپ. جىل سايىن كاسىپ اشقاندار سانى دا ارتىپ كەلەدى. ءبىر سوزبەن ايتقاندا, بۇرىنعى مەن بۇگىنگىنىڭ اراسىندا ايتارلىقتاي ايىرماشىلىق بار. دەسە دە 15 مىڭعا جۋىق تۇرعىنى بار سەكسەۋىل ءۇشىن باستى ماسەلە – بالالار ءبىلىم الاتىن مەكتەپ.
سەكسەۋىل ارقىلى ءىرى تەمىر جول تورابى وتەدى. كەنتتەگى 3 مەكتەپتىڭ (№87, 31 جانە 177 مەكتەپ) بارلىعى كەنتتىڭ نەگىزگى بولىگىندە ورنالاسقاندىقتان, جاڭا اۋداندا تۇراتىن 360 وقۋشى ساباققا كەلۋ ءۇشىن كۇندە 13 رەلستى كەسىپ وتەدى. مۇنىڭ ويىن بالاسى ءۇشىن قاۋىپتى ەكەنى ايتپاسا دا تۇسىنىكتى. ءارى 3 مەكتەپتەگى بالا سانى دا شامادان تىس كوبەيدى.
– بۇگىندە كەنتتەگى 150 بالاعا ارنالعان № 231 مەكتەپتە 480, 350 ورىندىق №87 ورتا مەكتەپتە 804, ال 700 ورىندىق №177 ورتا مەكتەپتە 1138 وقۋشى ءبىلىم الۋدا. كەلەسى جىلى 1 سىنىپقا قابىلداناتىن بالالار سانى دا كوپ. دەمەك, الداعى وقۋ جىلىندا اۋداندا 3 اۋىسىمدىق 2 مەكتەپ پايدا بولۋى مۇمكىن.
قازاقستان ۇكىمەتىنىڭ 2007 جىلعى 21 جەلتوقسانداعى №1256 قاۋلىسىمەن بەكىتىلگەن ء«بىلىم بەرۋ ۇيىمدارى جەلىسىنىڭ كەپىلدىك بەرىلگەن مەملەكەتتىك ءنورماتيۆىنىڭ» 2-تارماعىنىڭ 3-تارماقشاسىندا كىشى جانە ورتا مەكتەپ جاسىنداعى وقۋشىلار سانى 41 جانە ودان كوپ بولعان جاعدايدا نەگىزگى ورتا ءبىلىم بەرەتىن مەملەكەتتىك وقۋ ورنىنىڭ جۇمىس ىستەۋىنە كەپىلدىك بەرىلەتىنى جازىلعان. سوندىقتان دا, بالالاردىڭ ساپالى ءبىلىم الۋى مەن قاۋىپسىزدىگىن ويلاساق, كەنتتەگى جاڭا اۋدانعا 300 ورىندىق مەكتەپ سالۋ قاجەت, – دەيدى اۋداندىق ءبىلىم ءبولىمىنىڭ باسشىسى سانيرا جاننازاروۆا.
وسى ماسەلە جونىندە بىلتىر اۋدان اكىمى مۇحتار ورازباەۆ وبلىس باسشىلىعىنا حات جازىپ, سونىڭ نەگىزىندە وبلىستىق ءبىلىم باسقارماسى ءبىلىم جانە عىلىم مينيسترلىگىنە 2019 جىلى رەسپۋبليكالىق بيۋدجەت ەسەبىنەن كەنتتە 300 ورىندىق مەكتەپ سالۋ تۋرالى ۇسىنىس بەرەدى, مەملەكەتتىك ساراپتامادان وتكەن جوبالىق سمەتالىق قۇجاتتارىن دا قوسا جولدايدى. قۇجاتتا جاڭا مەكتەپ قۇرىلىسىنا 849 ملن 155 مىڭ تەڭگە قاجەتتىگى كورسەتىلگەن. بىراق, مينيسترلىك تاراپىنان ءالى كۇنگە ماردىمدى جاۋاپ جوق.
مىنە, 2019 جىلدى دا تۇگەسۋگە تايادىق. بالالار ءالى تەمىر جولدى ءارلى-بەرلى كەسىپ ءوتىپ ءجۇر. ولاردىڭ جولدى ساپتاعى ساربازداي ءبىر سىزىقپەن وتپەيتىنى تاعى انىق. ارينە وتكەل جوق ەمەس, بار. بىراق ونىڭ دا اسا قاۋىپسىز ەمەستىگىن جازدا شامالعاندا بولعان وقيعا كورسەتتى. بەتىن ءارى قىلسىن, بىراق بالالار تەمىر جولدىڭ بويىندا وقىس جاعدايعا ۇشىراپ قالسا كىم جاۋاپ بەرەدى؟
قازىر مەكتەپتەگى ءبىلىم ساپاسى, بالا قاۋىپسىزدىگى, پەداگوگتەر مارتەبەسى مەملەكەت باسشىسىنىڭ نازارىندا تۇرعان باستى ماسەلەلەردىڭ ءبىرى. ەندەشە, قيۋىن تاۋىپ, قيسىنى كەلىپ تۇرعان ءىستى ساعىزشا سوزۋعا نە سەبەپ بولىپ وتىر؟
ارينە, قازىر مەكتەپ قۇرىلىسىنا قاجەتتى 850 ميلليون تەڭگە بيۋدجەت ءۇشىن اجەپتاۋىر سالماق ەكەنى انىق. بىراق, تارازىنىڭ ءبىر باسىندا بالالاردىڭ ءومىرى تۇرعانىن ۇمىتپايىق.
تەمىر جولدىڭ بويىندا توپ بالا ءجۇر. ال ولاردى ساباققا جىبەرگەن اكە-شەشە كوڭىلىندە «بالام وقىس جاعدايعا ۇشىراپ قالماسا ەكەن» دەگەن الاڭ بار...
قىزىلوردا وبلىسى
