قوعام • 09 جەلتوقسان، 2019

«ءوليمپتىڭ» وماقاسۋى – زاڭسىز ويىن ۇيىمداستىرعان بۋكمەكەرلىك كەڭسەنىڭ جۇمىسى توقتاتىلدى

56 رەتكورسەتىلدى

قازاقستانداعى «وليمپ» بۋكمەكەرلىك كەڭسەسى جۇمىسىن توقتاتتى. اتالعان ۇيىم ينتەرنەت ارقىلى زاڭسىز ويىن بيزنەسىن ۇيىمداستىرعان. بۇل فاكتى ۇقك الماتى قالاسى بويىنشا دەپارتامەنتى مەن پروكۋراتۋرا ورگاندارىنىڭ بىرلەسىپ، سوتقا دەيىنگى تەرگەۋ امالدارىن باستاۋعا تۇرتكى بولدى. انىقتالعانداي، كومپانيا كولەڭكەلى بيزنەستەن تۇسكەن اقشانى ەل اۋماعىنان تىس جەرلەرگە اۋدارىپ وتىرعان.

كولەڭكەلى بيزنەستى قىزدىرعان

تەرگەۋ مالىمەتتەرىنە سۇيەنسەك، بۋك­مەكەرلىك كەڭسە قازاقستان زاڭناماسىنىڭ نورمالارىن بۇزىپ، عالامتوردىڭ كو­مە­گىمەن قىزمەتىن جاسىرىن جۇرگىزگەن كورىنەدى. سايكەسىنشە، بۇدان مەملەكەت قازىناسىنا سالىق تۇسپەگەن ەكەن.

«ۇقك الماتى قالاسى بويىنشا دەپار­تامەنتى پروكۋراتۋرا ورگاندارىمەن بىر­لەسىپ، «وليمپ» بۋكمەكەرلىك كەڭسەسى اكىمشىلىگىنىڭ زاڭسىز ويىن بيزنە­سىن ۇيىمداستىرۋ فاكتىسى بويىنشا سوتقا دەيىنگى تەرگەۋ جۇرگىزۋگە باستاماشى بولدى. تەرگەۋ دەرەكتەرى بويىنشا، كومپانيا قازاقستان رەسپۋبليكاسىنىڭ قولدانىستاعى زاڭناما نورمالارىن بۇزا وتىرىپ، بەلگىلى ءبىر تابىس تابۋمەن ينتەرنەت-رەسۋرس ارقىلى ليتسەنزيالانباعان ارەكەتتى جۇزەگە اسىرعان. تيىسىنشە، وسى سالاعا سالىق سالىنباعان. قازاقستان شەگى­نەن تىس اقشالاي قاراجاتتى زاڭ­سىز شىعارۋ ارنالارى انىقتالىپ، وقشاۋ­لاندى. قارجى قىلمىستارى سالاسىنا جاتاتىن وزگە دە ارەكەتتەر تىركەلۋدە»، دەلىنگەن ۇقك تاراتقان رەسمي اقپاراتتا.

 بۋكمەكەرلىك كەڭسەلەرگە توسقاۋىل قويىلدى

فەميدا وكىلدەرى «وليمپ» بك ساۋدا بەلگىسىمەن كاسىبىن ورگە دومالاتقان باسقا دا بۋكمەكەرلىك ۇيىمداردىڭ قىزمەتىنە توسقاۋىل قويىپتى.

«2019 جىلعى 29 قاراشادا الماتى قالاسىنىڭ مامانداندىرىلعان اۋدان­ارالىق اكىمشىلىك سوتى «وليمپ» بك ساۋدا بەلگىسىمەن «Only bet» جشس جانە «Alpha bet» جشس بەرىلگەن ليتسەنزيا قولدانىسىن 6 اي مەرزىمگە توقتات-
تى.

قازىرگى ۋاقىتتا «وليمپ» بك زاڭسىز ارەكەتىنىڭ، سونداي-اق سالىق زاڭناماسىن بۇزۋدىڭ ناقتى اۋقىمىن انىقتاۋ بويىنشا تەرگەۋ ءىس-شارالارى جۇرگىزىلۋدە»، دەپ ناقتىلادى ۇقك.

ءىزى سۋىماي، «وليمپ» باسشىلىعى رەسمي سايتتا مالىمدەمە جاساپ ۇلگەردى. بۋكمەكەرلىك كومپانيانىڭ اكىمشىلىگى ليتسەنزيانى توقتاتۋعا قاتىستى سوتتىڭ شەشىمىنە كەلىسپەيتىنىن ايتىپ، جاقىن ارادا شاعىمداناتىندارىن العا تارتتى.

 تارتىستىڭ سوڭى نەمەن اياقتالادى؟

وسى رەتتە ءباس تىگەتىن ۇيىمدار مەن زاڭ ورگاندارى اراسىنداعى تارتىستىڭ وربىگەنىنە ءبىراز بولعانىن ايتا كەتكەن ورىندى. وسىدان ەكى اي بۇرىن بۋكمەكەرلىك كەڭسە باسشىلارى «قۇمار ويىندار تۋرالى» زاڭعا ەنگىزىلگەن تۇزەتۋلەرمەن كەلىسپەيتىندەرىن ايتىپ، وسىعان بايلانىستى ءوز ويلارىن ءبىلدىرىپ ەدى.

«2018 جىلى ءباس تىگەتىن كومپانيالار شامامەن 16،5 ملرد تەڭگە سالىق تولەدى. 2019 جىلى بۇل كورسەتكىش شامامەن 20 ملرد تەڭگەگە جەتەدى. ءبىر مەزەتتە بۋكمەكەرلىك كەڭسەنىڭ 5000-عا جۋىق قىزمەتكەرى جۇمىسسىز قالادى. قيىن الەۋمەتتىك-ەكونوميكالىق جاعدايدا بۇل جۇمىسسىزدىقتىڭ وسۋىنە اكەلەدى»، دەگەن بولاتىن الماتىداعى «تەننيسي» بۋكمەكەرلىك كەڭسە ديرەكتورىنىڭ ورىنباسارى سەرگەي كازاكوۆ.

ستاتيستيكانى سويلەتسەك، بىلتىر زاڭسىز ويىن بيزنەسىنە قاتىستى 337 قىلمىستىق ءىس تىركەلدى. بۇل كەزەڭدە زاڭدى بەلشەسىنەن باسقان 6 ۇيىمداسقان قىلمىستىق توپ انىقتالدى. 20 جاسىرىن جانە 74 ەلەكتروندى كازينو جويىلدى، 1 105 ويىن اۆتوماتى مەن تەرمينال، 28 ويىن ۇستەلى (پوكەر ۇستەلى، رۋلەتكا)، 1 132 پروتسەسسور، 879 مونيتور، 511 تەلەديدار، 88 كاسسالىق اپپارات، سول سەكىلدى 29 بەينە تىركەگىش تاركىلەندى. قازاقستاندا زاڭسىز ويىن مەكەمەسىن اشقانى، ۇستاعانى نەمەسە ولار ءۇشىن ءۇي-جايدى بەرۋمەن قاتار ويىن بيزنەسى سالاسىنداعى قىزمەتتى ليتسەنزياسىز جۇزەگە اسىرعانى ءۇشىن قىلمىستىق كودەكستىڭ 307-بابى بويىنشا 7 جىل باس بوستاندىعىنان ايىرۋ جازاسى كوزدەلگەن.

قۇمار ويىننىڭ قۇرىعىنا تۇسكەن جاندى رايىنان قايتارۋ وڭاي شارۋا ەمەس. بۇل جونىندە «Egemen Qazaqstan» باسىلىمىندا سان مارتە قاۋزالدى. الايدا، «اۋرۋىن جاسىرعان ولەدى» دەمەكشى، اتالعان سالانى زاڭدى تۇرعىدا رەتتەۋ كۇن تارتىبىندەگى ماسەلە. ويتكەنى، ءبىر كەڭسەنىڭ جۇمىسىنا توسقاۋىل قويىلعانىمەن قۇمارتقان ادام ەكىنشىسىنە باس سۇعاتىنى كۇمانسىز. بۇل اسىرەسە ينتەرنەتتەگى ءباس تىگەتىن ۇيىمدارعا قاتىستى. سول سەبەپتى بۋكمەكەرلىك كاسىپ قوعامعا اشىق بولۋى ءتيىس. ولاي بولماعان جاعدايدا، شەتەلدىك سايتتاردا ءباس تىگەتىن وتانداستارىمىزدىڭ سانى ارتا تۇسەدى دەگەن دە ءۋاج بار.

 

سوڭعى جاڭالىقتار

مال باققانعا بىتەدى...

ايماقتار • كەشە

جەر يەسىن تاپسا يگى

ايماقتار • كەشە

ءبارىمىزدىڭ ابايىمىز

رۋحانيات • كەشە

ينۆەستيتسيالار يگىلىگى

ەكونوميكا • كەشە

ماقتاارالدا ديقانشىلىق باستالدى

ايماقتار • 16 قاڭتار، 2020

ۇقساس جاڭالىقتار