جاڭا نىساننىڭ سالتاناتتى اشىلۋ راسىمىنە قاراعاندى وبلىسىنا جۇمىس ساپارىمەن كەلگەن قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ پەن ءوڭىر باسشىسى جەڭىس قاسىمبەك قاتىستى.
اتالعان ورتالىقتىڭ مەملەكەت باسشىسى قاسىم-جومارت توقاەۆ جاريا ەتكەن «تىڭداۋشى مەملەكەت» تۇجىرىمداماسى اياسىندا ەلىمىز بويىنشا ىسكە اسىرىلعان ءتورتىنشى جوبا ەكەنىن ايتا كەتكەن ءلازىم.
اليك شپەكباەۆ مۇنداي ورتالىقتاردىڭ ەلدەگى سىبايلاس جەمقورلىق كورىنىستەرىن ازايتۋعا سەپتىگىن تيگىزەتىنىن اتاپ ءوتتى.
– مەملەكەتتىك قىزمەتتەردى العىسى كەلەتىن ازاماتتار ءۇشىن جاقسى جاعداي جاسالعان. بۇل حالىق پەن مەملەكەتتىك قىزمەتكەرلەر اراسىندا اشىق, ءادىل ديالوگ ورناتۋعا كومەكتەسەدى. سوڭعى ءۇش جىلدا قازاقستاندا تۇرمىستىق سىبايلاس جەمقورلىق دەڭگەيىنىڭ تومەندەۋى بايقالادى. بۇل تسيفرلاندىرۋ, فرونت-كەڭسەلەردىڭ اشىلۋى جانە الدىن الۋ شارالارىنىڭ ارقاسىندا جۇزەگە اسادى. وسىنىڭ بارلىعى ادامداردىڭ ساناسىندا سىبايلاس جەمقورلىققا قارسى جەككورۋشىلىك سەزىمىن قالىپتاستىرۋعا ىقپالىن تيگىزەدى, – دەدى ول.
جاڭا ورتالىق سىبايلاس جەمقورلىققا قارسى ءىس-قيمىل اگەنتتىگىنىڭ وبلىستىق دەپارتامەنتى عيماراتىنىڭ الدىندا ورنالاسقان. عيماراتتىڭ ءبىرىنشى قاباتىندا رەسەپشن, وپەراتسيالىق جانە كۇتۋ زالدارى, كەڭەسشىلەرگە ارنالعان بولمەلەر بار. ەكىنشى قاباتتا ءباسپاسوز ورتالىعى, قىزمەتكەرلەردىڭ جۇمىس بولمەلەرى ورنالاسقان جانە مۇندا «سارىارقا – ادالدىق الاڭى» جوبالاۋ كەڭسەسى جۇمىس ىستەيدى.
سونداي-اق, بۇل جەردە ازاماتتارعا زاڭ كەڭەسى قىزمەتى تەگىن كورسەتىلەدى جانە تۇرعىندار سىبايلاس جەمقورلىققا قارسى قىزمەت باسشىلارىنىڭ قابىلداۋىنا جازىلا الادى.
Antikor Ortalygy كەڭسەسى زاماناۋي تەحنيكا تۇرلەرىمەن جابدىقتالعان. مۇندا مۇمكىندىگى شەكتەۋلى جاندار ءۇشىن دە بارلىق قولايلى جاعداي قاراستىرىلعان.
جاڭا نىساننىڭ ءىشىن ارالاپ, ونىڭ جۇمىسىمەن تانىسقاننان كەيىن اليك شپەكباەۆ سول جەردە ازاماتتاردى قابىلداپ, ولاردىڭ ءوتىنىش-تىلەكتەرىنە قۇلاق ءتۇرىپ, سۇراقتارىنا تولىققاندى جاۋاپ بەردى.
قاراعاندى وبلىسى
