ۇكىمەت • 06 جەلتوقسان، 2019

بەرىلگەن تاپسىرمالار ىسكە اسىرىلعاندا ۇتىمدى

45 رەتكورسەتىلدى

شىمكەنت قالاسىندا جۇمىسى توقتاپ تۇرعان ءجىپ ءيىرۋ فابريكاسى قايتا ىسكە قوسىلدى. بۇل جۇمىستار ەلباسى ن.ءا.نازارباەۆتىڭ «قاراپايىم زاتتار ەكونوميكاسى» جوباسى اياسىندا جۇزەگە استى. ال وزبەكستاندىق ينۆەستورلار فابريكاعا بىرقاتار جوندەۋ-قالپىنا كەلتىرۋ جۇمىستارىن جۇرگىزىپ، ونىڭ قايتا ىسكە قوسىلۋىن قامتاماسىز ەتتى.

 بىرلەسكەن توقىما ءوندىرىسى جولعا قويىلادى

اتالعان ءوندىرىس وشاعىنىڭ اشىلۋىنا پرەمەر-مينيستر اسقار مامين، شىمكەنت قالاسىنىڭ اكىمى ەرلان ايتا­حا­نوۆ پەن وزبەكستان ەلىنىڭ «Alliance Tex­tile» جوكق ديرەكتورلار كەڭەسىنىڭ تور­اعاسى يكراموجون ەگامبەرديەۆ قاتىستى.

ۇكىمەت باسشىسى فابريكانى ىسكە قوسۋ قازاقستاننىڭ توقىما كلاستەرىن دامى­تۋعا زور سەرپىن بەرەتىنىنە سەنىم ءبىلدىردى.

«قازاقستاننىڭ ينۆەستيتسيالىق قورى» اق جانە «Alliance Textile» وزبەك جە­ڭىل ونەركاسىپ كاسىپورىندارى قاۋىمداس­تى­عىنىڭ بىرلەسكەن كاسىپورنى – «Alliance» ساۋدا-ونەركاسىپ پالاتاسى» جشس ءجىپ ءيىرۋ فابريكاسىنىڭ جوباسى بيىل ماۋ­سىم ايىندا ىسكە اسىرىلا باستاعان. اتالعان جوبا قازاقستان جانە وزبەكستان ۇكىمەتتەرىنىڭ اراسىندا بىرلەسكەن توقىما كلاستەرىن قۇرۋ تۋرالى قول جەتكىزىلگەن كەلىسىمدەردىڭ ناتيجەسىندە قارقىندى جۇمىس ىستەپ كەلەدى.

تاراپتاردىڭ كۇش-جىگەرىنىڭ ناتي­جەسىندە جۇمىسى توقتاپ تۇرعان فاب­ري­كاعا قىسقا ۋاقىت ىشىندە جوندەۋ-قال­پىنا كەلتىرۋ جۇمىستارى جۇرگىزىلىپ، كوم­مۋنالدىق قىزمەتتەر تارتىلعان.

«تۇڭعىش پرەزيدەنت – ەلباسى نۇر­سۇل­تان نازارباەۆ ءبىزدىڭ الدىمىزعا «قارا­پايىم زاتتار ەكونوميكاسىن» دامىتۋ مىندەتىن قويدى، وندا جەڭىل ونەركاسىپكە ەرەكشە ءرول بەرىلەدى. ءبىز ونىڭ العاشقى ناتيجەلەرىن كورىپ وتىرمىز. مەملەكەت باسشىسى قاسىم-جومارت توقاەۆ قا­زاقستان ەكونوميكاسىنىڭ شيكىزاتتىق ەمەس سەكتورلارىنا شەتەلدىك ينۆەستيتسيالاردى تارتۋدىڭ ماڭىزدىلىعىن بىرنەشە رەت اتاپ ءوتتى. وزبەكستاننىڭ توقىما ونەر­كاسىبىن دامىتۋداعى وڭ تاجىريبەسىن ەس­كە­رە وتىرىپ، بيىل 22 ماۋسىمدا وتكەن قازاق­ستان مەن وزبەكستان اراسىنداعى ىنتى­ماقتاستىق جونىندەگى بىرلەسكەن ۇكى­مەت­ارالىق كوميسسيانىڭ 18-ءشى وتىرىسى ايا­سىندا شىمكەنت قالاسىندا توقى­ما كلاس­تەرىن بىرلەسىپ ىسكە قوسۋ تۋرالى كەلى­سىمگە قول قويىلدى»، دەدى اسقار ما­مين.

ىسكە قوسىلعان ءجىپ ءيىرۋ فابريكاسىندا 120 جۇمىس ورنى اشىلىپ، جىلىنا 6 مىڭ توننا ماقتا تالشىعىن وڭدەۋدى كوزدەپ وتىر. كورشىلەس وزبەكستان رەس­پۋب­ليكاسىنىڭ ينۆەستورلارى تاراپىنان قۇيىلاتىن ينۆەستيتسيالاردىڭ جالپى كولەمى شامامەن 4،6 ملرد تەڭگەنى قۇرادى.

اتالعان فابريكانى ىسكە قوسۋ شىم­كەنت­تە توقىما كلاستەرىن قالپىنا كەلتىرۋ بويىنشا جول كارتاسىنىڭ ءبىرىنشى كەزەڭى بولىپ تابىلادى. ياعني، بيىل وڭتۇستىكتە وندىرىلەتىن ماقتانىڭ 20 پايىزىن قامتىسا، كەلەر جىلى 50 پايىزعا جەتكىزۋ جوسپارلانۋدا. جالپى توقىما كلاستەرىن قال­پىنا كەلتىرۋ بويىنشا جاسالعان جول كار­تاسىنىڭ نەگىزگى ماقساتى – وڭىردە ون­دىرىلەتىن ماقتانىڭ 100 پايىزىن قام­تۋ. وڭتۇستىكتە وندىرىلەتىن ماقتانىڭ بار­لىعىن تولىعىمەن شىمكەنت قا­لاسىندا وڭدەۋ – ءۇشىنشى مەگاپوليستىڭ ەكونوميكاسىن دامىتۋ جولىندا اتقارىلىپ جاتقان اۋقىمدى جۇمىستاردىڭ ءبىرى.

الداعى جوسپار بويىنشا وڭىردە ماقتا شارۋاشىلىعىنا قاجەتتى قوسىمشا ەكى فابريكانى ىسكە قوسۋ جوسپارلانعان. بۇل قازاقستاندا وڭدەلەتىن ماقتا كولەمىن 2 ەسەگە ارتتىرۋدى قامتاماسىز ەتىپ، ناتي­جەسىندە 800 جاڭا جۇمىس ورنى اشىلماق.

 قۇرىلىس جۇمىستارى مەرزىمىندە تاپسىرىلۋى ءتيىس

پرەمەر-مينيستر اسقار مامين تۇڭ­عىش پرەزيدەنت – ەلباسى نۇرسۇلتان نازار­باەۆتىڭ يندۋستريالىق-يننوۆا­تسيا­لىق دامۋ، «قاراپايىم زاتتار ەكونومي­كاسى» باعدارلامالارىن، سونداي-اق مەملەكەت باسشىسى قاسىم-جومارت توقاەۆتىڭ شىمكەنت پەن تۇركىستان وبلىسىن الەۋمەتتىك-ەكونوميكالىق دامىتۋ بويىنشا بەرگەن تاپسىرمالارىن ىسكە اسىرۋدى قامتاماسىز ەتۋ اياسىندا تۇر­كىستان وڭىرىنە جۇمىس ساپارىمەن كەلدى.

ساپار بارىسىندا ا.مامين تۇر­كىس­تان قالاسىنداعى حالىقارالىق اۋە­جاي­دىڭ جانە وعان اپاراتىن اۆتوموبيل جولىنىڭ قۇرىلىسىن، سونداي-اق امفيتەاتردىڭ، دراما تەاترىنىڭ، وبلىستىق عىلىمي-امبەباپ كىتاپحانا،  « ۇلى دالا ەلى» ورتالىعى، ق.ا. ياساۋي مۋزەيى، ۇلى جىبەك جولى قولونەرشىلەر ۇلتتىق ورتالىعى مەن كەلۋ ورتالىعى عيماراتتارىنداعى جۇمىس بارىسىن، رەكونسترۋكتسياسىن تەكسەردى.  تۇركىستاننىڭ ىرگەسىندەگى شاعا اۋىلىندا سالىنىپ جات­قان جاڭا اۋەجايدىڭ قۇرى­لى­سىن تىك­ۇشاق­پەن باقىلادى. بيىل مامىر ايىندا ىرگەتاسى قالانعان اۋەجاي كە­لە­شەك­تە حالىقارالىق جانە ىشكى رەيس­تەر­دە ساعاتىنا 250 ادام قابىلداۋعا قاۋ­قار­لى بولماق. قۇرىلىس جۇمىستارىن تۇر­كيا­لىق «يدا ينشاات» كومپانياسى جۇرگىزۋدە. تۇركىستان قالاسىنان 16 شا­­قىرىم قاشىقتىقتا ورنالاسقان اۋەجاي­­دىڭ اۋماعى 905،3 گەكتاردى الىپ جاتىر. قۇرىلىس جۇمىستارىنا 420 ادام تار­تىلعان حالىقارالىق تەرمينالدى 2020 جىلدىڭ جەلتوقسان ايىندا پايدا­لانۋعا بەرۋ جوسپارلانعان. سونداي-اق حالىقارالىق اۋەجايعا باراتىن جولدىڭ سا­پاسىمەن دە تانىسىپ كوردى. تامىز ايىن­دا باستالعان جول قۇرىلىسى وبلىستىق جو­لاۋشىلار كولىگى جانە اۆتومو­بيل جولدارى باسقارماسىنىڭ تاپسىرىسىمەن سالىنىپ جاتىر. ۇزىندىعى 16،3 شا­قى­رىم بولاتىن جول قۇرىلىسى كەلەر جىل­دىڭ جەلتوقسانىندا اياقتالادى دەپ كۇتىلۋدە.

ۇكىمەت باسشىسى تۇركىستان قالا­سىن­داعى اكىمشىلىك ىسكەرلىك ورتالى­عى­نىڭ قۇرىلىس بارىسىمەن تانىسىپ، نى­سان­دارداعى جۇمىستى قارقىنداتۋدى تاپسىردى. ال تۇركىستان تۇرعىندارىنىڭ يگىلى­گىنە بەرىلەتىن امفيتەاتر عيماراتىنىڭ قۇرىلىسى بيىل ءساۋىر ايىندا باستالعان. نىسان تاياۋ كۇندەرى پايدالانۋعا بەرىلەدى دەپ كۇتىلۋدە. ماڭعىستاۋ وبلىسى اكىمدىگىنىڭ سىيى رەتىندە سالىنعان نىسان 1 مىڭ ورىنعا لايىقتالعان. زاماناۋي كەشەننىڭ جالپى كولەمى 2400 شارشى مەتردى قۇرايدى. «رۋحاني-مادەني ورتالىق» ايماعىنداعى 0،56 گەكتار جەرگە جۇرگىزىلىپ جاتقان قۇرىلىس الاڭىندا 60 جۇمىسشى ەڭبەك ەتۋدە. ۇكىمەت باسشىسى مۇنان كەيىن اقتوبە ءوڭىرىنىڭ تارتۋى رەتىندە سالىنىپ جاتقان دراما تەاتردىڭ قۇرىلىسىمەن تانىستى. اتالعان نىسان تۇركىستان مەن اقتوبە وبلىستارىنىڭ بىرىگىپ قارجىلاندىرۋىمەن جۇزەگە اسۋدا. 4 قاباتتان تۇراتىن عيماراتتىڭ جالپى كولەمى – 9700 شارشى مەتر. عيماراتتا 510 ادامعا ارنالعان كورەرمەن زالى، ارنايى اۆتوتۇراق ورنى بولادى. جاڭا دراما تەاتردىڭ قۇرىلىسى 2020 جىلدىڭ قازانىندا اياقتالادى دەپ جوسپارلانعان.

پرەمەر-مينيستر 630 توسەك-ورىنعا شاقتالعان كوپسالالى وبلىستىق اۋرۋ­­حانا قۇرىلىسى جۇرگىزىلەتىن جەرگە كاپ­­سۋلا سالدى. جوبانى 2022 جىلى مەم­لە­كەت-جەكەمەنشىك ارىپتەستىك اياسىندا «YDA Holding» تۇرىك ينۆەستورى جۇ­زە­گە اسى­رادى. نىساننىڭ قۇنى – 100  ملرد تەڭ­­گەگە جۋىق، 350 دارىگەردى قوسا ال­عان­­دا، مە­ديتسينا پەرسونالى ءۇشىن 1700-گە جۋىق جاڭا جۇمىس ورنى قۇرىلادى.  جال­­پى اۋماعى 16 گەكتار جەردى الاتىن كوپ­سا­لالى اۋرۋحانادا دياگنوستيكالىق كەڭەس كورسەتۋدەن باستاپ، نەيروحيرۋرگيا، ۋرو­لوگيا، جاراقات، قاتەرلى ىسىك اۋرۋ­­­لا­رى سىندى مەديتسينالىق كومەك كور­سە­­­­تەتىن بولىمدەر جۇمىس ىستەيتىن بولا­­دى. عيمارات تولىقتاي زاماناۋي مەدي­­­تسي­­­نالىق قۇرال-جابدىقتارمەن قامتا­­­­ماسىز ەتىلمەك. ۇكىمەت باسشىسى سون­داي-اق جاڭادان سالىنىپ جاتقان مادە­­ني نى­سانداردىڭ دا قۇرىلىسىن ارالاپ كوردى. جاڭا اكىمشىلىك-ىسكەرلىك ورتالى­­­عىنان بوي كوتەرىپ جاتقان « ۇلى دالا ەلى» ورتالىعى 2020 جىلى اشىلادى دەپ جوس­پارلانعان. اعىمداعى جىل­دىڭ ءساۋىر ايى­نان باستالعان قۇرىلىس جۇمىس­­تارىن «BI Construction turkestan» كومپا­نياسى جۇرگىزۋدە. اتىراۋ وبلىسى اكىمدىگىنىڭ تاپسىرىسىمەن بوي كوتەرىپ جاتقان ورتالىقتىڭ اۋماعى – 6200 شارشى مەتر. ال وبلىستىق عىلىمي-امبەباپ كىتاپحاناسىنىڭ قۇرىلىسىن شىمكەنت قالاسىنىڭ اكىمدىگى قارجىلاندىرۋدا. 1 گەكتار اۋماقتا ورنالاسقان نىساننىڭ قۇرىلىسى كەلەر جىلدىڭ وسى ايىندا پايدالانۋعا بەرىلمەك. سونىمەن قاتار شاھاردىڭ رۋحاني-مادەني ايماعىندا «سامۇرىق-قازىنا» ۇاق اق تاپسىرىسىمەن قوجا احمەت ياساۋي مۇراجايىنىڭ قۇرىلىسى جۇرگىزىلۋدە. ال تۋريستىك ۆيزيت ورتالىعى – وتىرار قورىق-مۋزەيىنىڭ بازاسىندا سالىنۋدا. اۋماعى 2200 شارشى مەتر بولاتىن ساۋلەتتى عيماراتتى سالۋعا جامبىل وبلىسى تاپسىرىس بەرىپ وتىر.

ۇكىمەت باسشىسى، سونىمەن قاتار «Sembol construction» تۇرىك كومپانياسى سالاتىن، قۇنى 39 ملرد تەڭگەگە جۋىق بولاتىن «كەرۋەن-ساراي» كوپفۋنكتسيالى تۋريستىك كەشەن قۇرىلىسىن ىسكە قوستى. سونداي-اق قازىعۇرت اۋدانى مايلىوشاق اۋىلىندا سالىنعان جاڭا زاۋىتتىڭ اشىلۋ راسىمىنە قاتىستى. زاۋىتتا جىلدام ازىرلەنەتىن تاماق ونىمدەرى شىعارىلادى. الەمدەگى اسا ءىرى جىلدام ازىرلەنەتىن كەس­پە ءوندىرۋشى – «CG Foods Central Asia» كومپانياسى جوباعا 5،7 ملرد تەڭگە ينۆەستيتسيا سالدى. شىعارىلاتىن ءونىم كولەمى جىلىنا 4،5 مىڭ توننادان اسادى دەپ جوسپارلانعان. ءوندىرىس پروتسەسىندە تەك وتاندىق شيكىزات پايدالانىلماق. ءونىمدى ىشكى نارىققا عانا ەمەس، ەكسپورتقا شىعارۋ كوزدەلۋدە. 

تۇركىستان قالاسىندا پرەمەر-مي­نيستر قالانى دامىتۋ ماسەلەلەرى جونىن­دە كەڭەس وتكىزدى. اتقارىلىپ جاتقان جۇ­مىستار بارىسى تۋرالى تۇركىستان وبلىسىنىڭ اكىمى ءو.شوكەەۆ، مادەنيەت جانە سپورت ءمينيسترى ا.رايىمقۇلوۆا، اتىراۋ وبلىسىنىڭ اكىمى ن.نوعاەۆ، اقتوبە وبلىسىنىڭ اكىمى و.ورازالين، شىمكەنت قالاسىنىڭ اكىمى ە.ايتاحانوۆ، سونداي-اق باسقا وڭىرلەر مەن قالا قۇرى­لىسىنا جاۋاپتى مەردىگەرلەر وكىلدەرى باياندادى. تۇڭعىش پرەزيدەنت – ەلباسى ن.نازارباەۆ جانە مەملەكەت باسشىسى ق.توقاەۆ تۇركىستان قالاسىنىڭ دامۋىنا ەرەكشە كوڭىل ءبولىپ وتىر. پرەمەر-مينيستر قۇ­رىلىس جۇمىستارىن ساپالى جۇرگىزىپ، مەرزىمىندە اياقتاۋدى تاپسىردى.

 

نۇرشات توكەن،

عالىمجان ەلشىباي،

«Egemen Qazaqstan»

 

تۇركىستان وبلىسى

 

سوڭعى جاڭالىقتار

ەلباسى تۇركيا حالقىنا كوڭىل ايتتى

قازاقستان • بۇگىن، 14:17

قىزىلوردا: قازالىداعى قونىس توي

ايماقتار • بۇگىن، 09:07

ۇقساس جاڭالىقتار