پارلامەنت دەپۋتاتتارى، وتاندىق تەلەارنالاردىڭ جەتەكشىلەرى، كينو سالاسىنىڭ ماماندارى، تانىمال بلوگەرلەر مەن زيالى قاۋىم قاتىسقان قوعام­دىق كەڭەس ماجىلىسىندە كينو سالا­سىنداعى ەلدى تولعاندىرىپ جۇرگەن كەلەڭ­سىزدىكتەر ايتىلىپ، ونى شەشۋدىڭ جول­دارى ۇسىنىلدى.

پارلامەنت ءماجىلىسىنىڭ دەپۋتاتى بەكبولات تىلەۋحان، استانا قالاسىن­داعى تۇرىك ەتنومادەني ورتالىعى­نىڭ توراعاسى اسكەر پيريەۆ رەسپۋبليكا­مىز­داعى كينوتەاترلاردا ۇلتتىق فيلم­دەردىڭ پروكاتتالۋى كەزىندە ورىن الاتىن كەمشىلىكتەرگە توقتالدى. اتاپ ايتقاندا، پروكاتقا شىعارىلعان كينولاردى تاماشالايتىن كورەرمەندەر سانى جاسىرىلىپ، ودان تۇسەتىن پايدانى اشىق كورسەتپەۋ دەرەكتەرى ۇشىراسادى. وسى سالادا اشىقتىقتىڭ جوقتىعى جەم­قورلىقتىڭ بەلەڭ الۋىنا اكەلۋى ىق­تيمال. بۇل ءوز كەزەگىندە فيلم وندىرۋ­شىلەردىڭ ەڭبەگىنە ساي تابىس تابۋىنا، وتاندىق كينو وندىرىسىنە ينۆەستورلاردى تارتۋعا كەدەرگى كەلتىرىپ، بيۋدجەتكە تۇسەتىن سالىقتى ازايتۋى مۇمكىن. كەلەڭ­سىزدىكتىڭ الدىن الۋ ماقساتىندا «كينەماتوگرافيا تۋرالى» زاڭدا كورسە­تىل­گەن نورماعا سايكەس اقپاراتتىق جۇيە­نى تەزدەتىپ ەنگىزۋ ۇسىنىلدى.

كەڭەس جۇمىسىنا قاتىسقان مادە­نيەت جانە سپورت ءمينيسترى اقتوتى رايىم­قۇلوۆا ءوز بايانداماسىندا وتاندىق كينو ءوندىرىسىن دامىتۋ سالاسىنداعى اتقارىلىپ جاتقان ىستەردىڭ ءمان-جايىمەن تانىستىرىپ، ايتىلعان سىنداردان ءتيىستى قورىتىندى شىعاراتىندارىن جەتكىزدى. بيىل قابىلدانعان «كينەماتوگرافيا تۋرالى» زاڭداعى وزگەرىستەرگە توقتالعان مينيستر زاڭنىڭ كەيبىر ماڭىزدى نورمالارىن ورىنداۋدا كەمشىلىكتەردىڭ بار ەكەنىن دە جاسىرمادى.

«كينەماتوگرافيا تۋرالى» زاڭ­دى ازىرلەۋ بارىسىندا دەپۋتاتتار ەلىمىزگە مەملەكەتتىك تىلدە پروكاتتاۋ ءۇشىن اكەلىنگەن بالالار انيماتسيا­لىق فيلمدەرىنە دۋبلياج جاساۋدى مەم­لەكەتتىك قارجىلاي قولداۋ كورسەتۋ شەڭ­بەرىندە قاراستىرۋدى ۇسى­نىپ، ونى ۇكى­مەتكە جىبەرگەن بولاتىن. وسىعان وراي بۇ­گىندە رەس­پۋب­ليكالىق بيۋدجەت ەسە­بىنەن ۇلتتىق انيماتسيالىق فيلم­دەردى مەملەكەتتىك تىلدە دايىنداۋ جۇ­مىس­تارى جۇرگىزىلۋدە. حالىقارالىق تاجى­ريبەگە جۇگىنسەك، فيلمدەردى اۋديتوريا تىلىنە اۋدارۋ – اۆتورلىق قۇقىق يەلە­نۋ­شىلەرىنىڭ مىندەتى. شەتەلدەن اكەلىن­گەن انيماتسيالىق فيلمدەردىڭ اۋدي­توريانىڭ مەملەكەتتىك تىلىنە دۋبلياجدالۋى كورەرمەننىڭ كوبەيۋىنە ىقپال ەتىپ، پروكاتتان تۇسەتىن تابىستى ۇلعايتادى. الايدا سالا ءمينيسترى اتالعان نورماداعى بىرقاتار ەرەجەنىڭ وكىلەتتى ورگاندار تاراپىنان قولداۋ تاپپاعانىن جەتكىزدى.

– قازاقستان رەسپۋبليكاسىنىڭ كەي­بىر زاڭنامالىق اكتىلەرىنە كينەماتو­گرافيا ماسەلەلەرى بويىنشا كەيبىر وزگەرىس­تەر مەن تولىقتىرۋلار ەنگىزۋ قاراس­تى­رىل­عانى ءمالىم. وندا فيلمدەردىڭ قۇقىق يە­لە­نۋ­شىلەرىن جانە پروكاتتاۋ كوم­پانيا­لارىن، ياعني ۇلتتىق فيلم­دەردى پرو­كات­تاۋ كەزىندەگى كينوتەاترلار­دى 20% كور­پوراتيۆتىك تابىس سالىعىنان بوسا­تۋ كوزدەلگەن بولاتىن. بۇل نورما شەت­­ەلدىك كارتينالاردىڭ الدىن­دا ۇلت­تىق فيلم­دەردىڭ كەپىلدى ارتىق­شى­لىق­­تارىن قامتاماسىز ەتۋ ماقسا­تىن­دا وي­­لاس­­تىرىلعان-دى. بۇل نورما جۇ­مىس ىستەۋى ءۇشىن زاڭدا كوز­دەل­گەن قر اۋ­ما­­­عىن­داعى فيلم­دەر موني­تورينگى­نىڭ بىرىڭ­عاي اۆتومات­تان­دىرىل­عان اقپا­رات­تىق جۇ­يەسىن ەنگىزۋدى قولعا العان ابزال. ءبىز وسى بىرىڭعاي اۆتو­مات­تاندىرىلعان اقپارات­تىق جۇيەنى ەنگىزۋ بويىنشا جۇمىس ىستەپ جاتىرمىز، دەدى ا.رايىمقۇلوۆا.

سونداي-اق ول باسقوسۋعا قاتىسۋ­شى­لار­دىڭ قويعان ساۋالدارىنا جاۋاپ بەرىپ، وتاندىق كينو سالاسىن دامىتۋ باعىت­تارى جايلى تاراتىپ ايتتى.

وتىرىستا ءسوز سويلەگەن «بولاشاق» كورپوراتيۆتىك قورىنىڭ قامقورشى­لار كەڭە­سىنىڭ ءتورايىمى دينارا ءشاي­جۇنىسوۆا زاڭنىڭ جاڭا جوباسىندا ەس­كەرۋسىز قالعان بىرقاتار وزەكتى ماسەلە­نىڭ بار ەكەنىن اتاپ كورسەتتى.

– «قازاق تىلىنە دۋبلياجدالعان فيلم­دەر كينوتەاترلاردا كورەرمەندەر­گە ىڭعايسىز ۋاقىتقا قويىلعان. وسى­عان بايلانىستى بىزگە جۇرتشىلىقتان كوپ ارىز-شاعىم تۇسۋدە. زاڭدا كاسىپقوي دۋبلياج جاسالماعان فيلمدەردى پرو­كات­تاۋعا رۇقسات بەرۋدەن باس تارتۋ كوزدەل­سە دە، بۇل شارا قازىرگى كەزدە ورىندال­ماي­دى. سونىڭ سالدارىنان قازاق ءتىلدى كورەر­مەندەردىڭ قۇقىقتارى بۇزىلۋدا. ءوزىم نەگىزىنەن باسقا ەلدە ءومىر ءسۇردىم. مەنىڭ بالا كەزىمدە انا تىلىمىزدە كينو كورۋ مۇمكىندىگى بولمادى. بۇگىندە ءبىز­دىڭ «بولاشاق» قورى بيۋدجەتتەن تىس قا­را­جات ەسەبىنەن ميلليونداعان بالاعا وسى مۇم­كىندىكتى تۋعى­زىپ وتىر. ەلىمىزدىڭ بالا­لارى تىم بول­­ما­­عاندا جىلىنا 10 ءمۋلتفيلمدى قازاق تىلىن­دە وزدەرىنە ىڭ­عاي­لى ۋاقىتتا كورۋگە قۇقىعى بار عوي» دەدى دينارا ءشايجۇنىسوۆا.

سونىمەن قاتار ول وسى جوبانىڭ ارقاسىندا 100 وتاندىق اكتەردىڭ «Walt Disney Pictures»-ءتىڭ دىبىس بازاسىنا ەنگەنىن،  ال قازاق ءتىلى «Walt Disney» كومپانياسىنىڭ تاريحىندا دۋبلياجداۋ سالاسىندا تۇرىك تىلىنەن كەيىنگى ەكىنشى تۇركى ءتىلى بولىپ وتىرعانىن جەتكىزدى.

ونىڭ ءسوزىن ءماجىلىس دەپۋتاتتارى قۋا­نىش سۇلتانوۆ، باقىتگۇل حامەنوۆا، سەنا­­تور نۇرتورە ءجۇسىپ، جازۋشى الدان سما­يىل جانە تاعى دا باسقا زيالى قاۋىم وكىل­دەرى قۋاتتاپ، زاڭ جوباسى قايتا قارال­عان كەزدە ايتىلعان ۇسىنىستاردىڭ نازاردان تىس قالماۋىنا كۇش سالاتىندارىن ايتتى.

قوعام قايراتكەرى ورازگۇل اسانعازى، بەلگىلى عالىم ديحان قامزابەك ۇلى ۇلت­تىق فيلمدەردى دامىتۋدا كينو سالا­سى بويىنشا قازاق تىلىندە كادر دايار­لاۋ ماسەلەسىن قوزعاپ، كەيبىر وتاندىق فيلم­دەردەگى ۇلتىمىزدىڭ ماقتا­نىشى­نا اينالعان ءبىرتۋار تۇلعالار تۋرالى دەرەكتەردىڭ بۇرمالانۋىنا جول بەرى­لە­تىنىن سىنعا الدى. ال تانىمال بلوگەر وركەن كەنجەبەك كينو ءوندىرىسى سالا­سىن­داعى شەتەلدىك تاجىريبەنى مىسالعا كەل­تىرىپ، بىزدە دە ونىڭ ءتيىمدى تۇستارىن قول­دانۋعا بولاتىنىن جەتكىزدى.

سونىمەن بىرگە جيىن بارىسىندا اي­تىل­عان تەلەارنالاردا ۇلتتىق فيلم­دەر­دىڭ كورەرمەنگە ىڭعايسىز ۋاقىتقا قو­يى­لاتىنى، ولاردى پرايمتايم ۋاقىتىنا قويۋ­دى زاڭناما ارقىلى مىندەتتەۋ، گول­لي­ۆۋد­­تىق فيلمدەردى كۆوتالاۋ، بالا­لار­عا ارنالعان گولليۆۋدتىق تانىمال مۋلت­فيلمد­ەردى قازاق تىلىنە دۋبلياجداۋعا مەم­لەكەتتىك قولداۋ جاساۋ سەكىلدى ۇسى­نىستار كوپشىلىكتىڭ قولداۋىنا يە بولدى.

وتىرىس سوڭىندا «ميراس» رەس­پۋب­لي­­كا­لىق قوعامدىق كەڭەسىنىڭ مۇشە­لەرى د.قىدىرالىنىڭ ۇسىنىسى نەگىزىندە كەلەشەكتە تۇسىرىلەتىن ۇلتتىق فيلم­دەر­گە قاتىستى پرەزيدەنت جانىندا قوعامدىق كەڭەس دەڭگەيىندە شەشىم قابىلداۋ قاجەت دەگەن تۇجىرىمعا كەلدى.

باسقوسۋدا ورتاعا سالىنعان بارلىق ۇسىنىس-پىكىردى ۇكىمەتكە جانە ءتيىستى مەملەكەتتىك ورگاندارعا جولداۋ تۋرالى شەشىم قابىلداندى.