رۋحانيات • 05 جەلتوقسان، 2019

ەلباسى كىتاپحاناسى سۋرەتشى بالالاردى ماراپاتتادى

68 رەتكورسەتىلدى

بۇگىن قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىندا «تۋعان ولكەم» كورمەسىنىڭ اشىلۋ سالتاناتى ءوتتى. بۇل تۋرالى كىتاپحانانىڭ ءباسپاسوز قىزمەتى حابارلادى. 

ءىس-شارا بارىسىندا ن.ءا. نازارباەۆتىڭ «رۋحاني جاڭعىرۋ» باعدارلامالىق ماقالاسىن دارىپتەيتىن «تۋعان ولكەم» رەسپۋبليكالىق باعدارلاماسى بالالار شىعارماشىلىعىن قولداۋدى، قوسىمشا ءبىلىم بەرۋ مەكەمەلەرى جۇمىسىن ناسيحاتتاۋدى كوزدەيدى. كەلەلى ءىس-شارانى ەلباسى كىتاپحاناسىنىڭ ديرەكتورى ءامىرحان راحىمجانوۆ اشتى:

– شارامىزدىڭ شىمىلدىعىن اشپاستان بۇرىن بارشاڭىزدى ەلىمىزدىڭ كەلە جاتقان ءتول مەرەكەسىمەن قۇتتىقتاعىم كەلەدى. ەلباسى تاۋەلسىزدىك مەرەكەسىنىڭ جەلتوقسان ىزعارىندا حالىق كەۋدەسىن جىلۋعا بولەيتىن ايتۋلى كۇن ەكەنىن ءجيى ايتادى. جىل قورىتىندىسى كەلتىرىلەتىن ۋاقىتتا ونەرسۇيەر قاۋىمنىڭ تورىمىزگە جينالىپ، ءىس-شاراعا ءبىر اۋىزدان قولداۋ تانىتىپ، ۇيىمداستىرۋىنا ات سالىسىپ جاتقانىنا قۋانىپ جاتىرمىز.  جەمىس پەن جەڭىسكە تولى بۇل جىلدىڭ ەڭ ماڭىزدى ءىس-شاراسى – بالالار ونەرىن قولداۋعا باعىتتالعان «تۋعان ولكەم» رەسپۋبليكالىق جوباسى. قوسىمشا ءبىلىم بەرۋ مەكەمەلەرىن دە قولداۋمەن اينالىساتىن بۇل جوبادا ءتۇرلى قالالاردىڭ دارىندى سايىسكەرلەرى باق سىناپ، شەبەرلىگىمەن ءبارىمىزدى ءتانتى ەتتى. بيىلعى بايقاۋ وسىمەن ءتامام، قاتىسۋشىلارعا ريزاشىلىعىمىزدى ايتىپ، الداعى ۋاقىتقا شىعارماشىلىق تابىستار تىلەيمىز، - دەدى ءامىرحان مۇراتبەك ۇلى.

بيىلعى ءۇش كورمەدە ءتۇرلى تەحنيكا مەن جانردا ورىندالعان 200-دەن استام ديپلومدىق جۇمىس قويىلدى. كورەرمەندەر نازارىنا ۇسىنىلاتىن قورىتىندى كورمەگە ولاردىڭ قاتارىنان 30 جۇمىس قانا ىرىكتەلىندى. جەڭىستى قاراعاندى قالاسىنداعى №1 بالالار كوركەمسۋرەت مەكتەبىنىڭ وقۋشىلارى اننا پاك پەن ليديا لەۆيتسكايا، شاحتينسك قالاسىنىڭ ءا.ىسمايىلوۆ اتىنداعى بالالار كوركەمسۋرەت مەكتەبىنىڭ وقۋشىلارى التىنشاش سالىقوۆا مەن كيرا كالۋگينا، كوكشەتاۋ قالاسى بالالار كوركەمسۋرەت مەكتەبىنىڭ وقۋشىلارى ءنازيلا قاناپينا مەن يرينا پانچەنكو، نۇر-سۇلتان قالاسى بالالار كوركەمسۋرەت مەكتەبى – يۋنەسكو كلۋبىنىڭ وقۋشىلارى بايان بەيسەمبەكوۆا مەن ديانا جۇماگەرەي قانجىعاسىنا بايلادى.

كوكشەتاۋلىق جەڭىمپازدار قۋانىشتارىن جاسىرماي، بىزبەن العان اسەرلەرىمەن ءبولىستى:

– ونەر ارقىلى مەن سەزىمىمدى، ويىمدى بىلدىرەمىن. سايىسقا قاتىسىپ، مىڭنان وزىپ شىعۋىما مۇرىندىق بولعان كوركەمسۋرەت مەكتەبىنە العىسىم زور. قازىلار القاسىنىڭ جۇمىسىما جوعارى باعا بەرگەنىنە قۋانىشتىمىن، كوپ راحمەت! - دەدى ءنازيلا قاناپينا.

– شىعارماشىلىق بايقاۋلارعا قاتىسقاندى ۇناتامىن. ولاردىڭ ارقاسىندا تاجىريبە جيناپ قانا قويماي، سۋرەت سالىپ جاتىپ ءتۇرلى سەزىمدەرگە بولەنەمىن. ادامداردىڭ تۋىندىما قاتىستى پىكىرىن تىڭداپ ىنتالانامىن، شابىتتانامىن. كورمەگە شوقان ءۋاليحانوۆتىڭ سۋرەتىن ۇسىنعان ەدىم. نەگىزگى ءىسى سانالماسا دا، ول كىسى تۇڭعىش قازاق سۋرەتشىسى بولاتىن. ساياحاتتاپ ءجۇرىپ دەرەك جيناعان شوقان ءۋاليحانوۆتىڭ كورگەن-بىلگەن دۇنيەلەرىن قولمەن سالعان سۋرەتتەرىمەن تولىقتىرىپ وتىرعانى بەلگىلى. اۋەلى تۋش پەن قارىنداش قولدانعان ول كەيىن سۋبوياۋعا دا كوشكەن. قازاق جەرىنىڭ سۋرەتىن العاش سالعان ۇلى دالانىڭ بالاسى ارتىنان 100-گە تارتا سۋرەت قالدىرعان، - دەدى يرينا پانچەنكو.

بۇل بايقاۋدا ۇزدىك ۇستاز رەتىندە نوميناتسيا جەڭىمپازدارى بولىپ نۇر-سۇلتان قالاسى بالالار كوركەمسۋرەت مەكتەبى – يۋنەسكو كلۋبىنىڭ مۇعالىمى ءاليا وتەپوۆا، قاراعاندى قالاسى №1 بالالار كوركەمسۋرەت مەكتەبىنىڭ مۇعالىمى دينارا اقپاروۆا، شاحتينسك قالاسى ءا.ىسمايىلوۆ اتىنداعى بالالار كوركەمسۋرەت مەكتەبىنىڭ مۇعالىمى الماس ابدىقالىقوۆ، كوكشەتاۋ قالاسى بالالار كوركەمسۋرەت مەكتەبىنىڭ مۇعالىمى يرينا ماكسيموۆا ماراپاتتالدى. ىسكە قوسىلعان ساتىنەن باستاپ جوبا اياسىندا ەلباسى كىتاپحاناسىندا سەمەي، شىمكەنت، پاۆلودار، ەكىباستۇز، قاراعاندى جانە شاحتينسك قالالارىنىڭ كوركەمسۋرەت مەكتەپتەرى قاتىسقان بىرقاتار شارا ۇيىمداستىرىلدى. بۇل كورمەلەردىڭ قازىلار القاسى ۇزدىك جۇمىستارمەن قاتار بايقاۋعا قاتىسقان مەكتەپتىڭ ۇزدىك ۇستازدارىن جىل سايىن انىقتايدى.

– قازاقستاننىڭ تۇكپىر-تۇكپىرىنەن شىعارماشىل جانداردىڭ باسىن قوسقان بىرەگەي جوبانىڭ ۇيىمداستىرۋشىلارى – ەلباسى كىتاپحاناسىنىڭ باسشىلىعى مەن ۇجىمىنا العىس ايتامىز! كوميتەت مۇشەلەرى بالالارعا ارنالعان ەلىمىزدەگى كوركەمسۋرەت مەكتەپتەرىنىڭ ۇستازدارى مەن وقۋشىلارىنا ءتان ەڭبەكقورلىعى مەن ونەرگە قۇشتارلىعىنا ريزاشىلىعىن بىلدىرەدى. 2017 جىلى ىسكە قوسىلعان جوبانىڭ اياسىندا شاحتينسك، قاراعاندى، كوكشەتاۋ قالالارىنىڭ سۋرەتشىلەرى استانالىق بۇلدىرشىندەرگە ارنالعان شەبەرلىك ساعاتتارىن جۇرگىزگەن. مازمۇندى ءىس-شارا ءاردايىم جالعاسىن تابا بەرسىن! بارشامىزدى كەلە جاتقان مەرەكەلەرمەن شىن جۇرەكتەن قۇتتىقتايمىن، - دەدى نۇر-سۇلتان قالاسى بالالار كوركەمسۋرەت مەكتەبى – يۋنەسكو كلۋبىنىڭ ديرەكتورى گۇلزيا يسەنوۆا.

سوڭعى جاڭالىقتار

ەلباسى تۇركيا حالقىنا كوڭىل ايتتى

قازاقستان • بۇگىن، 14:17

قىزىلوردا: قازالىداعى قونىس توي

ايماقتار • بۇگىن، 09:07

ۇقساس جاڭالىقتار