جىلداعى ءۇردىس بويىنشا قۇدايبەرگەن جۇبانوۆ اتىنداعى مەملەكەتتىك ۋنيۆەرسيتەتتىڭ «مەتاللۋرگيا» ماماندىعى بويىنشا ءبىلىم الىپ جۇرگەن ەكىنشى جانە ءۇشىنشى كۋرسىنىڭ 122 ستۋدەنتى اقتوبە فەرروقورىتپا زاۋىتىندا وندىرىستىك تاجىريبەدەن ءوتتى. وقۋ پروتسەسىن وندىرىسپەن بايلانىستىرۋ ماقساتىندا اتالمىش ءوندىرىس ورنى مەن ۋنيۆەرسيتەت اراسىندا كەلىسىمشارت جاسالعان. الدىمەن زاۋىتقا كەلگەن ستۋدەنتتەر ءوندىرىس ورىندارىندا ءجۇرىپ-تۇرۋ ءتارتىبى مەن تەحنيكالىق قاۋىپسىزدىك نۇسقاۋلىعىمەن تانىستىرىلدى. ستۋدەنتتەر نەگىزگى تسەحتارعا ءبولىنىپ, ولارعا جەتەكشىلەر رەتىندە كوپ جىلدىق ەڭبەك ءوتىلى بار, بىلىكتى ماماندار بەكىتىلدى. وقۋ پروتسەسىن وندىرىستىك ءىس-تاجىريبەمەن بايلانىستىرعان بولاشاق ماماندار وزدەرىنە بەكىتىلىپ بەرگەن جەتەكشىلەردىڭ قاراۋىندا تەوريالىق بىلىمدەرىن وندىرىسپەن ۇشتاستىرۋعا مۇمكىندىك الدى.
شيكىقۇرام دايىنداۋ تسەحىندا 12 ستۋدەنت تاجىريبەدەن ءوتتى. ولاردى الدىمەن زاۋىتتىڭ شىعاراتىن ونىمىمەن, شيكىقۇرام دايىنداۋ تسەحىنىڭ اتقاراتىن ءىس-جوسپارىمەن جانە تەحنيكا قاۋىپسىزدىگىمەن, ءوندىرىس پروتسەسىمەن تانىستىردىم. تسەح ايماعىن ارالاتىپ, كورسەتتىم. ءبىزدىڭ تسەحتا تاجىريبەدەن وتكەندەر – 3-كۋرستىڭ ستۋدەنتتەرى. ولارعا بارىنشا تەوريالىق ءبىلىمىن وندىرىسپەن ۇشتاستىرۋعا قولداعى بار مۇمكىندىكتەردى جاسادىق, – دەيدى ءوندىرىستىڭ اعا شەبەرى مۇرات قۇلتازين.
– مەن وسىمەن ەكىنشى رەت وندىرىستىك ءىس-تاجىريبەدەن وتۋدەمىن. بىلتىرعى جىلى تاجىريبەدەن ءدوڭ تاۋ كەن-بايىتۋ كومبيناتىندا وتكەن بولاتىنمىن. بيىل اقتوبە فەرروقورىتپا زاۋىتىنىڭ شيكىقۇرام دايىنداۋ تسەحىنا جىبەردى. بىزگە بەكىتىلىپ بەرىلگەن جەتەكشىمىز مۇرات قۇلتازيننىڭ باسشىلىعىمەن تاجىريبەدەن ءوتۋ بارىسى ويداعىداي بولدى, – دەيدى قۇدايبەرگەن جۇبانوۆ اتىنداعى ۋنيۆەرسيتەتتىڭ 3-كۋرس ستۋدەنتى نۇرگۇل وتارباەۆا. ونىڭ كۋرستاسى مەرۋەرت قوناقوۆا قارا مەتاللۋرگيانىڭ العاشقى قارلىعاشى بولىپ سانالاتىن 70 جىلدىق تاريحى بار زاۋىتتا وندىرىستىك تاجىريبەدەن وتكەنىنە قۋانىشتى ەكەنىن جەتكىزدى. بولاشاق مامان زاۋىتتىڭ قاربالاس تىرلىگى, وتپەن الىسقان مەتاللۋرگتەردىڭ ەرەن ەڭبەكتەرىن كوزبەن كورگەنىنە ريزاشىلىعىن ءبىلدىردى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.
