قۇجاتتا اۋىل شارۋاشىلىق سالاسى وكىلدەرىن قولداۋ ماقساتىندا بىرنەشە ناقتىلى شارالار قاراستىرىلىپ, شارۋالار ءۇشىن مىندەتتى ساقتاندىرۋدان ەرىكتى ساقتاندىرۋعا كوشۋ جۇيەسى ەنگىزىلىپ وتىر.
مينيسترلىكتىڭ ءباسپاسوز قىزمەتى حابارلاعانداي, ەلىمىزدەگى مىندەتتى ساقتاندىرۋ جۇيەسى وسىدان 15 جىل بۇرىن «وسىمدىك شارۋاشىلىعىنداعى مىندەتتى ساقتاندىرۋ تۋرالى» زاڭىمەن ەنگىزىلگەن بولاتىن. اتالمىش زاڭ اۋىل شارۋالارىنا ەگىس القاپتارىن ساقتاۋعا جانە جويىلعان جاعدايلاردا شىعىنداردى وتەۋگە باعىتتالعان بولاتىن. الايدا بۇل جۇيە اۋىل شارۋالارىن ساقتاندىرۋ جاعدايلارىنىڭ ەڭ تومەنگى وندىرىستىك شىعىندارىن وتەي الماي, ء ىس-جۇزىندە وزىنە جۇكتەلگەن مىندەتتەردى تولىق ورىنداي المادى.
اۋىل شارۋاشىلىعى مينيسترلىگى شارۋالاردان كەلىپ تۇسكەن وتىنىشتەردى ەسكەرە كەلە, اۋىل شارۋاشىلىعىنداعى ساقتاندىرۋ جۇيەسىن وزگەرتۋدىڭ جاڭا تەتىكتەرىن ازىرلەدى.
بۇل وزگەرىستەر 2019 جىلعى 28 قازاندا مەملەكەت باسشىسى قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اگروونەركاسىپتىك كەشەندى مەملەكەتتىك رەتتەۋ ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» زاڭىنا سايكەس جۇزەگە اسىرىلادى.
ناتيجەسىندە, 2020 جىلعى قاڭتار ايىنان باستاپ «وسىمدىك شارۋاشىلىعىنداعى مىندەتتى ساقتاندىرۋ تۋرالى» زاڭى ءوز كۇشىن جويادى جانە وسىمدىك جانە مال شارۋاشىلىعى سالالارىندا مىندەتتى ساقتاندىرۋدان ەرىكتى ساقتاندىرۋعا كوشۋ جۇزەگە اسىرىلادى.
قابىلدانعان ساقتاندىرۋدىڭ جاڭا جۇيەسى اۋىل شارۋاشىلىعى سۋبەكتىلەرىن قولداۋدىڭ ناقتىلى باعىتتارىن ايقىنداپ وتىر. اتاپ ايتقاندا, مينيسترلىك ەندى ساقتاندىرۋدى سۋبسيديالاۋدىڭ ورنىنا ساقتاندىرۋ پوليستەرىن الۋدى سۋبسيديالاۋ جۇيەسىن ەنگىزدى. بۇل فەرمەرلەرلەردىڭ شىعىندارىن ازايتىپ, ساقتاندىرۋ جۇيەسى مەن ساقتاندىرۋ قارجىلارىن الۋ جۇيەسىن اشىق ەتەدى.
سونداي-اق مينيسترلىك فەرمەرلەرگە ەكىنشى دەڭگەيلى بانكتەردەن نەسيەلەر الۋ بارىسىندا ساقتاندىرۋ پوليستەرىن كەپىلدىك رەتىندە پايدالانۋعا مۇمكىندىك بەرەتىن نورمالاردى قاراستىرىپ وتىر.
ايتا كەتۋ كەرەك, ەرىكتى ساقتاندىرۋدىڭ جاڭا جۇيەسى ەلەكتروندىق پلاتفورمادا جۇمىس ىستەيتىن بولادى. ساقتاندىرۋ كەلىسىم-شارتتارىن جاساۋ, سۋبسيديالاۋ, ساقتاندىرۋ جاعدايىنىڭ ورىن الۋى فاكتىلەرىن انىقتاۋ جانە ساقتاندىرۋ تولەمدەرىن تولەۋ اقپاراتتىق جۇيە ارقىلى جۇرگىزىلەتىن بولادى. بۇل تاۋەكەلدەردى باسقارۋدىڭ اشىق جۇيەسىن قۇرۋعا مۇمكىندىك بەرەدى.
