رۋحانيات • 02 جەلتوقسان، 2019

سارايشىقتان جاڭا جادىگەرلەر تابىلدى

102 رەتكورسەتىلدى

اتىراۋ وبلىسىنىڭ اكىمى نۇرلان نوعاەۆ ماحامبەت اۋدانىنا ساپارى كەزىندە «سارايشىق» مەملەكەتتىك تاريحي-مادەني مۋزەي-قورىعىنىڭ بولاشاقتا سالىناتىن ساپار-ورتالىعىنىڭ قۇرىلىس الاڭىمەن تانىستى، - دەپ حابارلايدى اتىراۋ وبلىسىنىڭ وڭىرلىك كوممۋنيكاتسيالار قىزمەتى.

ساپار ورتالىعى تۋريستەر مەن كەلۋشىلەرگە تولىققاندى جاعداي جاساۋعا مۇمكىندىك بەرەتىن تۇتاس كەشەن بولماق.

«سارايشىق»  تاريحي-مادەني  مۋزەيىنىڭ ديرەكتورى ابىلسەيىت مۇحتاردىڭ ايتۋىنشا، ارحەولوگتار ءحىح عاسىردىڭ ورتا شەنىندە جاسالعان كارتا بويىنشا قالاشىقتىڭ باعزى قامالىن تابۋ ماقساتىندا قازبا جۇمىستارىن جۇرگىزگەن.

وسى قازبا جۇمىستارى كەزىندە ديىرمەن تاسى، وزبەك حان بيلىك قۇرعان ۋاقىتتا جاسالعان مىس تيىندار تابىلعان. سوڭعى جادىگەرلەر 1330-1350 جىلدارى سارايشىقتا سوعىلعان دەۋگە تولىق نەگىز بار دەيدى تاريحشىلار. ارحەولوگتار كونە قىش بۇيىمداردى دا «ولجالاعان». مۇنداي سيپاتتاعى كەراميكالار ءحىى عاسىردا جاسالعان ەكەن. سونداي-اق، جاسالعانىنا ەكى مىڭ جىلداي بولعان اينا سىنىعى مەن تاس كەلساپتار جانە ءارتۇرلى كەزەڭدەگى جەبە ۇشتارى تابىلعان.  

ال جىلقى بەينەسىندە جاسالعان جەز كىلت - الەمنىڭ كەز كەلگەن الدىڭعى قاتارلى مۋزەيلەرىنىڭ ەكسپوزيتسياسىنان ويىپ تۇرىپ ورىن الاتىنداي جادىگەر. مۋزەي قىزمەتكەرلەرى ايماق باسشىسىنا  قازبا جۇمىستارىنا قاتىسقان عالىمداردىڭ ءبىرى - استراحان قالاسىنىڭ تاريحي-ساۋلەت مۋزەي-قورىعىنىڭ ارحەولوگيا سەكتورىنىڭ مەڭگەرۋشىسى ۆياچەسلوۆا پلاحوۆتىڭ وسى تەكتەس كىلتتىڭ ەرميتاج جادىگەرلەرىنىڭ اراسىندا دا بار ەكەندىگىن مالىمدەگەنىن جەتكىزدى.

وبلىس اكىمى تاريحىمىزدى ساقتاۋعا باعىتتالعان مۇنداي جۇمىستاردىڭ ماڭىزدىلىعىنا توقتالىپ، اتالعان ىستە جەرگىلىكتى اتقارۋشى ورگاندار جان-جاقتى قولداۋ بىلدىرەتىنىن اتاپ ءوتتى.

وتكەن جىلى كونە سارايشىق قالاشىعى ماڭىندا سۋ تاسقىنىنان قورعايتىن بوگەت سالىندى. بۇل تاريحي ورىندى جايىقتىڭ شايىپ كەتۋىنەن ساقتاپ قالدى.

سوڭعى جاڭالىقتار

ۇقساس جاڭالىقتار