وسى قۋانىشقا ارنايى كەلىپ, تۇرعىنداردى مەرەكەمەن قۇتتىقتاعان وبلىس اكىمى جەڭىس قاسىمبەك ەلباسىنىڭ تەمىرتاۋ قالاسىنىڭ دامۋىنا ۇنەمى ەرەكشە كوڭىل ءبولىپ كەلە جاتقانىن اتاپ ءوتتى.
– تۇڭعىش پرەزيدەنت كۇنى سىزدەردىڭ وتباسىلارىڭىز ءۇشىن قونىس تويىن تويلاعان ەرەكشە كۇنگە اينالدى. تاۋەلسىزدىك جىلدارى تۇرعىن ۇيمەن قامتاماسىز ەتۋگە باعىتتالعان 10-نان استام مەملەكەتتىك باعدارلاما جاسالدى. ولاردىڭ ىشىندە «نۇرلى جەر», «7-20-25», «باقىتتى وتباسى», «قولجەتىمدى باسپانا 2020» جانە باسقالار بار, – دەگەن ءوڭىر باسشىسى تەمىرتاۋدا كەلەسى جىلى 150 پاتەرلى ءۇش ءۇي سالىناتىنىن ءمالىم ەتتى. بۇدان بولەك, مەتاللۋرگتەر قالاسىندا ەلباسىنىڭ تاپسىرماسى بويىنشا جاڭا دەنە شىنىقتىرۋ-ساۋىقتىرۋ كەشەنى مەن اۋرۋحانانىڭ قۇرىلىسى جۇرگىزىلىپ جاتىر.
باسپانالى بولۋدىڭ باقىتىنا بولەنگەندەردىڭ ءبىرى – ارباعا تاڭىلسا دا ارمانى اسقاق ونەرپاز,«جۇلدىزدى ءسات» كونكۋرسىنىڭ جەڭىمپازى ارمان قارىنساۋ.
– ءبىزدىڭ تۇرعىن ءۇي كەزەگىندە تۇرعانىمىزعا بيىل 10 جىل بولدى. مىنە, بۇگىن ارمانىمىز ورىندالىپ, باسپانالى بولدىق. بۇعان دەيىن بۇكىل وتباسىمىزبەن تۋىسقانىمىزدىڭ ۇيىندە تۇرىپ كەلدىك. 2019 جىل ءبىزدىڭ وتباسى ءۇشىن ءساتتى بولدى, – دەگەن ول ءوزىنىڭ وتباسى اتىنان وبلىس جانە قالا باسشىلىعىنا العىس سەزىمىن جەتكىزدى.
سول كۇنى كەشكە قاراي تەمىرتاۋدىڭ مادەنيەت ۇيىندە مەرەكەلىك كونتسەرت ۇيىمداستىرىلدى. قالا تۇرعىندارى مەن قوناقتارى قازاق ەستراداسىنىڭ جۇلدىزدارى مەن قالي بايجانوۆ اتىنداعى كونتسەرتتىك بىرلەستىك ارتىستەرىنىڭ ونەرىن تاماشالادى. سونىمەن قاتار, تەمىرتاۋلىقتاردىڭ الدىندا تاياۋدا وتكەن Junior Eurovision بايقاۋىندا 2-ورىن العان ەرجان ماكسيم ءان شىرقادى.
ايتا كەتۋ كەرەك, تۇڭعىش پرەزيدەنت كۇنى مەرەكەسىندە وبلىستىڭ باسقا دا قالالارى مەن اۋداندارىندا تۇرعىندار باسپانالى بولىپ, قونىس تويىن تويلادى. مىسالى, جەزقازعان, ساتباەۆ جانە پريوزەرسك قالالارىندا, بۇقار جىراۋ, اقتوعاي, اباي جانە شەت اۋداندارىندا تۇرعىن ءۇي كەزەگىندە تۇرعان ازاماتتارعا پاتەرلەردىڭ كىلتتەرى تابىس ەتىلدى. سونىمەن قاتار, وبلىس ورتالىعىندا جاڭا مەديتسينالىق ورتالىق پەن شاحتينسك قالاسىندا جەكەمەنشىك بالاباقشا پايدالانۋعا بەرىلدى.
