«الماتى ارەنادا» وتكەن جەكپە-جەك كەشىندە جارىس جولىنا جەتى جەرلەسىمىز شىقتى. سولاردىڭ اراسىنان تەك نۇرسۇلتان قاسىمحانوۆتىڭ عانا ونەرى كوپشىلىك كوڭىلىنەن شىقتى. 66 كيلو سالماقتا كۇش سىناسقان قانداسىمىز رەسەيلىك الەكساندر پەدۋسونمەن ايقاستى. وكتاگونعا شىققان بەتتە ولار بىردەن ءبىر-ءبىرىن اۋىر سوققىلاردىڭ استىنا الدى. ەكەۋى دە تىك تۇرىپ, ەش قايمىقپاي, شەگىنبەي جۇدىرىقتاستى. كوبىنە-كوپ قازاق جىگىتىنىڭ سىلتەگەن سوققىلارى نىساناعا ءدال ءتيىپ جاتتى. قارسىلاسىنا قاراعاندا قاسىمحانوۆتىڭ قارىمدى كورىنگەنى ەش كۇمان تۋعىزعان جوق. ناتيجەسىندە 15 مينۋتقا سوزىلعان «جان الىسىپ, جان بەرىسكەن» ايقاس نۇرسۇلتاننىڭ جەڭىسىمەن اياقتالدى.
وكىنىشكە قاراي, قازاقستاننىڭ وزگە سپورتشىلارى ورەلى ونەرلەرىمەن جەرگىلىكتى جانكۇيەرلەردى قۋانتا العان جوق. تۇساۋكەسەر كەزدەسۋدە فانيل رافيكوۆ بەلارۋسسيالىق يۆان جۆيربليادان ۇپاي سانىمەن ۇتىلدى. بۇل ونىڭ اسا دودالارىندا قاتارىنان ءۇشىنشى مارتە جەڭىلۋى.
قىرعىزستاننان كەلگەن التىنبەك ماماشەۆ جەرلەسىمىز گويتي دازاەۆتى ءبىرىنشى راۋندتىڭ اياعىندا اۋىر نوكاۋتقا جىبەردى. ايتۋلى قوس مەملەكەت وكىلدەرىنىڭ ەكىنشى ءوزارا تارتىسى دا الاتاۋدىڭ ارعى بەتىنەن كەلگەن ورەندەردىڭ پايداسىنا شەشىلدى. بۇل جولى قانات كەلدىبەكوۆ التىنبەك دۋمان ۇلىنان ايلاسىن اسىردى.
جاستار بۋىنى سەنىم ۇدەسىنەن شىعا الماعاننان كەيىن ساقا سپورتشىلارىمىزدىڭ جولىنا ۇكىلى ۇمىتپەن قارادىق. بىراق سول كەشتە ولاردان دا قايىر بولمادى. رەسەيلىك حۋسەين شايحاەۆ ەرجان ەستانوۆتىڭ اياعىنا «اۋىرتۋ» ءتاسىلىن قولداسا, برازيليالىق رودجەر سوۋزا شاحمارال جەتپىسوۆتى قان جوسا ەتىپ سابادى. قازاق جىگىتىنە جانى اشىعان تورەشى جەكپە-جەكتى مەرزىمىنەن بۇرىن توقتاتتى. سول سەكىلدى باشقۇرتستاننىڭ باس جۇلدىزى ۆەنەر گاليەۆ پەن ەرمەك تلاۋوۆ اراسىنداعى باسەكەدە دە جەڭىس وزگە ەل وكىلىنىڭ ەنشىسىندە كەتتى.
