پرەزيدەنت • 29 قاراشا، 2019

تۇركىستاندى تۇلەتكەن

554 رەت كورسەتىلدى

تۇركىستان قالاسى بۇگىندە كۇن ساناپ كوركەيىپ كەلەدى. اسىرەسە جارىسا بوي كوتەرگەن قالا اۋماعىنداعى تۇرعىن ۇيلەر مەن كوزدىڭ جاۋىن الارداي كوركەم عيماراتتار ءوڭىر ەكونوميكاسىنا جاڭا سەرپىن بەرۋدە. وسى تۇرعىدان كەلگەندە تاۋەلسىزدىك جىلدارى ەلباسى نۇرسۇلتان نازارباەۆتىڭ قولداۋى مەن باستاماسى كيەلى تۇركىستاننىڭ جاندانا تۇسۋىنە، بۇگىنگىدەي ىزگىلىكتى ىستەرگە باستى نەگىز بولعانى ەلگە ءمالىم.

تۇركىستاندى ورتالىق ەتۋ يدەياسى

ءيا، وتكەن جىلدارعى دەرەكتەر­گە كوز جۇگىرتسەك، ەڭ الدىمەن 1985-1988 جىلدارى قازاق كسر مي­نيسترلەر كابينەتىنىڭ باسشىسى قىزمەتىن اتقارىپ جۇرگەن تۇستا ن.نازارباەۆ قوجا احمەت ياساۋي كەسەنەسىنە ارنايى ات باسىن بۇرىپ، مۇنداعى اتقارىلىپ جات­قان ءىس-شارالارمەن تانىسادى. سودان بەرى قازاقستاننىڭ تۇڭ­عىش پرەزيدەنتى تاراپىنان جاڭا يدەيا­لار، تىڭ باستامالار ۇسىنىلىپ، جۇزەگە اسىرىلا باس­تادى. ەلىمىز تاۋەلسىزدىگىنە ەندى قول جەتكىزىپ، ەگەمەندى مەملەكەت رە­تىندە ەڭسەسىن تىكتەپ جاتقان جاۋاپتى كەزەڭدە ەلباسى ن.نازارباەۆ تۇركىستان قالاسىنىڭ ابىرويىن اسقاقتاتار، كۇللى تۇركى جۇرتىنىڭ با­سىن قوسۋعا باعىتتالعان جوبا­لار­دى بەكىتتى. ءتىپتى ەلورداعا لايىق­تى قالالار قاتارىندا قاراس­تى­رىلعانى دا جۋىردا جاريا ەتىل­گەنى ءمالىم. ياعني، قازاقستاننىڭ تۇڭعىش پرەزيدەنتى نۇرسۇلتان نازارباەۆ بىرقاتار بۇقارالىق اقپارات قۇرالدارى باسشىلارىنا بەرگەن سۇحباتىندا ەلوردانى كوشىرەتىن كانديدات قالالاردى تاڭ­داعان كەزدە تۇركىستان دا قا­راستىرىلعانىن ايتتى. «ول كوپتەن ويلاپ جۇرگەن ماسەلە ەدى. ءتىپتى ەلور­دانى تاڭداعان كەزدە دە ويىم­دا بولدى. ول كەزدە كىشىگىرىم قالا. ەلوردانى وندا اپارا المايتىن بولدىق. سەبەبى ول – ءبىزدىڭ رۋحاني ورتالىعىمىز، ءتىپتى تۇركى الەمىنىڭ رۋحاني ورداسى»، دەدى ن.نازارباەۆ.

ەلباسى باستاماسىمەن كيەلى مەكەننەن قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى اشىلدى. سونى­مەن قاتار كەسەنەنىڭ كورىك-كەل­بەتىن قالپىنا كەلتىرۋگە كۇش جۇمىلدىرىپ، 2000 جىلى تۇر­كىستان قالاسىنىڭ 1500 جىل­دىق مەرەيتويىن  يۋنەسكو دەڭ­گەيىندە اتاپ وتۋگە بارلىق جاع­دايدى جاسادى. پرەزيدەنتتىڭ ازىرەت سۇلتان كەسەنەسىنە جاساعان قامقورلىعىنىڭ ارقاسىندا،  «ما­دەني مۇرا» باعدارلاماسىنىڭ اياسىن­دا كونە شاھاردىڭ شىنايى شە­جىرەسىن ايقىنداۋ قولعا الىندى.

جالپى، بۇگىندە ساراپشىلار­ قازاقستان رەسپۋبليكاسىنىڭ تۇڭ­عىش پرەزيدەنتى – ەلباسى نۇر­سۇلتان نازارباەۆتىڭ تۇركىستان قالاسىن وبلىس رەتىندە تانىپ، وعان مارتەبە بەرۋ ارقىلى حا­لىقارالىق دەڭگەيدە ناسيحاتتاۋى كەشە كوتەرىلگەن تاقىرىپ ەمەس ەكەنىن ايتۋدا. سەبەبى «تۇركىستان يدەياسى» العاش ەل استاناسىن بەكىتۋ كەزىندە پايدا بولعانىن ەلباسىنىڭ جوعارىدا ايتىلعان سۇحباتىنداعى ءوز ءسوزى دە دالەل بولا الادى. 1500 جىلدىق تاريحى بار تۇركىستاندى قايتا جاڭعىرتۋ، وبلىستىق دەڭگەيدە مارتەبەسىن كوتەرۋ، بۇكىل تۇركى حالىقتارى ارا­سىندا ورتاق ماسەلە رەتىندە قاراستىرۋ – وسىنىڭ ءبارى كونە قالاعا دەگەن ەرەكشە كوزقاراستىڭ اياسىندا جاسالىپ جاتقان اۋقىمدى ءارى ماڭىزدى شارالار. ەلبا­سى حالىقارالىق بيىك ساياسي فو­رۋمداردا بولسىن، وڭىرلىك ما­ڭىزدى جيىنداردا بولسىن تۇركىستان مۇراتىن ءبىر ءسات تە ەستەن شىعارعان ەمەس. مىسالى، ازەر­بايجان ەلىنىڭ استاناسى باكۋ قالاسىندا وتكەن تۇركىتىلدەس مەم­لەكەتتەردىڭ ىنتىماقتاستىعى كەڭە­سىنىڭ جەتىنشى وتىرىسىندا ەلباسى ەكى ۇسىنىستى ورتاعا سال­عان بولاتىن: بىرىنشىدەن، «تۇركى كەلەشەگى – 2040» باعدارلاماسىن ازىرلەۋ. بۇل قۇجاتقا تۇركىتىلدەس قوعامداستىقتىڭ ۇزاق مەرزىمدى ماقساتتارى مەن وعان قول جەتكىزۋ جولدارى ەنگىزىلۋگە ءتيىس. وسىلايشا تۇركىتىلدەس مەملەكەتتەر ءۇشىن سىرت­قى ساياسات پەن «جۇمساق كۇش» ساياساتى، ساۋدا جانە ترانزيت، تۋريزم جانە ينۆەستيتسيا، ەنەرگەتيكا مەن جاسىل ەكونوميكا، شاعىن جانە ورتا بيزنەس سياقتى باسىم باعىتتارداعى ىنتىماقتاستىقتى نىعايتۋعا ايتارلىقتاي سەرپىن بەرىلەدى. سونىمەن قاتار ەلباسى وسى وتىرىستا تۇركى الەمىنىڭ بەسىگى – تۇركىستان قالاسىن دامىتۋ، ونىڭ ماڭىزدىلىعى تۋرالى ايتىپ ءوتتى. ال بيىلعى قازان ايىنداعى تۇركىستان قالاسىنا جۇمىس ساپارى بارىسىندا تۇڭعىش پرەزيدەنت حالىقپەن كەزدەسۋىندە كونە شاھاردىڭ ەرتەڭىنە دە توق­تالدى.  «وسىدان بىرنەشە جىل بۇرىن تۇركىستاننىڭ 1500 جىل­دى­عىن اتاپ وتەمىز دەپ ءبىراز شارۋانى اتقارعان ەدىك. سوندا وسى الاڭدا كەزدەسىپ، سويلەسكەنبىز. سول كەزدە تۇركىستان ورتالىق بولادى دەپ ايتقانمىن. مىنەكەي، بىلتىر تۇركىستان وبلىس ورتالىعى بولادى دەگەن  جارلىققا قول قويدىم. ەلىمىزدە الماتى، نۇر-سۇلتان جانە شىمكەنت – ءبىر ميل­ليون تۇرعىنى بار قالالار قاتارىندا. بولاشاقتا وسىنداي ۇلكەن قالالاردا ەكونوميكا، مادەنيەت – بارلىعى ءوسىپ-وركەندەي بەرەدى. الداعى ۋاقىتتا ميلليون تۇرعىنى بار قالالار سانى تاعى ارتادى. بۇگىن شاھاردى جانداندىرۋ جۇمىستارى جۇرگىزىلۋدە. تۇركىستان – تۇركى الەمىنىڭ بەسىگى. باۋىرلاس تۇركى مەملەكەتتەرى دە بىزگە كومەكتەسەدى دەپ سەنەمىن. تۇركىستان شاھارى الداعى ۋاقىتتا ءىرى مەگاپوليسكە اينالادى»، دەدى نۇرسۇلتان نازارباەۆ.

سونداي-اق ءتۋريزمنىڭ دامي تۇسەتىنىنە سەنىم ءبىلدىرىپ، وبلىس ورتالىعىنىڭ قۇرىلىسى مەن جاندانۋىنا اتسالىسىپ جاتقان بارشا جۇرتقا العىسىن جەتكىزدى. ء«بىرىنشى كەزەڭدە 175 نىساننىڭ قۇرىلىسى جوسپارلانعان. ونىڭ 102-ءcى بيىل ىسكە قوسىلادى. بۇل پروتسەسكە ەلى­مىز­دىڭ بارلىق وڭىرلەرى قاتىسىپ جاتىر. جۇمىستىڭ قانداي قارقىن­مەن اتقارىلىپ جاتقانىن كورىپ وتىرسىزدار. بولاشاقتا ادەمى قالا بولادى، حالىق سانى وسەدى. قازىر قالا تۇرعىندارىنىڭ سانى 170 مىڭ بولسا، مەنىڭشە از ۋاقىتتىڭ ىشىندە جارتى ميلليونعا جەتەدى. كەيىن ودان سايىن كوبەيەدى دەپ ويلايمىن»، –  دەدى ەلباسى.

ءيا، 1990-جىلداردىڭ اياعىندا ەل­باسىنىڭ ۇيعارىمىمەن تۇر­كىس­تاننىڭ 1500 جىلدىعىنا بايلانىستى دايىندىق شارالارى باستالدى. ال 2000 جىلى 22 ساۋىر­دە ن.نازارباەۆ مەرەيتويعا دايىن­دىق بارىسىمەن تانىستى. بۇل شاراعا تۇڭعىش پرەزيدەنت ايرىقشا كوڭىل ءبولدى، ويتكەنى رۋحاني استانا مەرەيتويىنىڭ جوعارى دەڭگەيدە ءوتۋى ماڭىزدى ەدى. مەرەيتويدى ابىرويمەن وتكىزۋگە وڭتۇستىك حالقى بەلسەنە اتسالىس­تى. قالاداعى ازىرەت سۇلتان كەسەنەسى مەن ونىڭ توڭىرە­گىندە كوپ ءىس اتقارىلىپ، تۇركىستان شاھارى تانىماستاي تۇرلەنىپ، ءسان-سالتانات قۇشاعىنا بولەندى. قاسيەتتى تۇركىستاننىڭ 1500 جىلدىق تورقالى تويى يۋنەسكو دەڭگەيىندە اتالىپ ءوتتى. ءزاۋلىم قۇرىلىستار بوي تۇزەدى. كوشە، اياقجولدار رەتكە كەلتىرىلدى. ەلباسى نۇرسۇلتان نازارباەۆ باس بولعان شىن مانىندەگى تاريحي يگى ىسكە حالقىمىزدىڭ جاناشىر ازاماتتارى ءبىر كىسىدەي اتسالىستى. وبلىس، اۋدان، قالا باسشىلارى ناقتى كومەك كورسەتتى. جان-جاقتان قۇرىلىس ماتەريالدارى اعىلىپ، ۋنيۆەرسيتەت وقىتۋشى-پروفەسسورلارىنا ارنالعان سوڭعى ۇلگىدەگى كەڭ دە جارىق، جايلى كوتتەدجدەر دە بوي كوتەرە باستاعان ەدى. سول ۇيلەرگە الماتى، شىمكەنت قالاسى مەن وزبەكستاننان، موڭ­عوليادان، وزگە دە جەردەن بەكەم بەل بۋىپ، ءبىرجولاتا كەلگەن اتاق­تى پروفەسسورلار قونىس­تانا باستادى. 2000 جىلى تۇركىستان­نىڭ 1500 جىلدىق سالتاناتىنا­ قاتىسقان قازاقستاننىڭ حالىق سۋرەتشىسى ساحي رومانوۆ اقپارات قۇرالدارىنا بەرگەن سۇحباتىندا: «قالانىڭ قىسقا ۋاقىتتا جون­دەلىپ، كەسەنەنىڭ قالپىنا كەل­تىرىلگەنىنە، ەڭ باستىسى، قوجا احمەت ياساۋي رۋحىن قاستەرلەۋ اتموسفەراسى ساقتالعانىنا قايران قالدىم. تۇركىستان دايارلىعى – ەلباسى ن.نازارباەۆتىڭ ءوز ەلىنىڭ حال­قى مەن تاريحىنا، ءداستۇرى مەن­ مادەنيەتىنە دەگەن ىستىق ىقى­لا­سىنىڭ جارقىن بەينەسى»، – دەدى. وسىلايشا جوعارى دەڭگەيدە وت­كىزىلگەن مەرەيتويدان كەيىن دە ەلباسى تۇركىستاننىڭ دامۋىن نازاردان تىس قالدىرعان جوق. جاڭا الەۋمەتتىك نىساندار قۇرىلىسى جالعاسىن تاپتى. مىسالى، ن.نازار­باەۆتىڭ قولداۋىمەن 2002 جىلى تۇركىستان قالاسىندا بەكزات ساتتارحانوۆ اتىنداعى سپورت كەشەنى سالىندى. ەلباسى سپورت­تىق-ساۋىقتىرۋ كەشەنىنىڭ اشىلۋ راسىمىنە قاتىستى. بۇگىندە اتالعان نىسان جاس سپورتشىلاردىڭ شەبەرلىگىن شىڭداۋىنا قىزمەت ەتۋدە. سونداي-اق تۇڭعىش پرەزي­دەنت تۇركىتىلدەس مەملەكەت باسشىلارىمەن تۇركىستاندا كەزدەسۋ وتكىزىپ وتىردى.

 ءبىلىم ورداسى – باۋىرلاستىق باستاۋى

رەسپۋبليكا حالقى، اسىرەسە تۇر­كىستاننىڭ تۇرعىندارى تۇڭ­عىش پرەزيدەنت نۇرسۇلتان نازار­باەۆتىڭ كيەلى قالانى قايتا­ جانداندىرۋ جونىندەگى يدەيا­نى ءوزى كوتەرىپ، ونى ناقتى قام­قور­لىعىمەن جۇزەگە اسىرىپ­ وتىرعانىن جاقسى بىلەدى. ەلباسىنىڭ جارلىعىمەن 1991 جىلعى 6 ماۋسىمدا تۇركىستان مەملەكەتتىك ۋنيۆەرسيتەتىنىڭ شاڭىراق كوتەرىپ، وعان ۇلى ويشىل-اقىن، قوجا احمەت ءياساۋيدىڭ ەسىمى بەرىلۋى تەك ەلىمىزدە عانا ەمەس، بۇكىل تۇركى دۇنيەسىندە تاريحي وقيعا بولدى. پرەزيدەنتتىڭ ءوزى كوتەرگەن يدەيا تۇركىستاننىڭ ۇلى قاسيەتىنىڭ جاندانا تۇسۋىنە نەگىز بولدى. قاسيەتتى قالانىڭ جاسارىپ-جاڭعىرۋىندا، ءوسىپ-وركەندەۋىندە كەزىندە ەلباسىنىڭ ءوزى ۇكىلى ۇمىت­پەن اشقان حالىقارالىق قازاق-تۇرىك ۋنيۆەرسيتەتى ەرەكشە ءرول اتقارىپ وتىرعانىن ەشكىم جوققا شىعارا الماس. ءبىلىم ورداسى كۇللى تۇركى حالىقتارىنىڭ ءبىلىمى مەن عىلىمىنىڭ، مادە­نيەتىنىڭ التىن بەسىگىنە اينالىپ­ كەلەدى. ەلباسىنىڭ ابىروي-بەدەلى ارقاسىندا تۇركيادان قو­ماقتى قارجى تارتىلدى. تۇركى الەمىندەگى تۇڭعىش حالىقارالىق ۋنيۆەرسيتەتتىڭ اشىلۋ سالتاناتىندا ەلباسى: «كەلەشەكتە بۇل تۇركى حالىقتارىنا ورتاق وقۋ ورنىنا اينالادى. تۇركىستاندى وسى ۋنيۆەرسيتەت وركەنيەت بيىگىنە كوتەرۋگە ءتيىستى»، دەگەن ۇلكەن مىندەت جۇكتەدى. ۋنيۆەرسيتەت اشىلعان ۋاقىتتان باستاپ، وقۋ ورداسىنىڭ تىنىس-تىرشىلىگى، دامۋ بارىسى ەلباسى نازارىنان تىس قالعان ەمەس. قاسيەتتى قالاعا جاساعان ساپارلارىنىڭ بارلىعىندا ۋنيۆەرسيتەتكە ارنايى ات باسىن بۇرىپ وتىردى.  سونداي ءىس-ساپارلاردىڭ بىرىندە، 2002 جىلى ۋنيۆەرسيتەت قابىرعاسىندا وتكەن دۇنيەجۇزى قازاقتارىنىڭ ءىى قۇرىلتايىندا نۇرسۇلتان نازارباەۆ: «قاسيەتتى قالانىڭ جاسارىپ-جاڭعىرۋىنا، ءوسىپ-وركەندەۋىنە قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ زور ءرول اتقارىپ وتىرعاندىعىن ريزا­شىلىقپەن ايتامىن. بۇل ءبىلىم ورداسى قازاق ەلى تاۋەلسىزدىگىنىڭ سيمۆولىنا، قازاقستان مەن تۇر­كيا دوستاستىعىنىڭ، ءبىلىم مەن مادەنيەتىنىڭ التىن بەسىگىنە اينالدى. ۋنيۆەرسيتەت قىسقا مەرزىمدە قازاقستان عانا ەمەس، ورتالىق ازياداعى ەڭ ءىرى وقۋ ورىندارىنىڭ قاتارىنا قوسىلدى. رۋحاني استانا – تۇركىستاندا شاڭىراق كوتەر­گەن تۇركى حالىقتارىنىڭ ورتاق وقۋ ورنى – حالىقارالىق ۋني­ۆەرسيتەتتىڭ قابىرعاسىنان تۇلەپ ۇشقان جاستاردىڭ حالىقتار ىن­تىماعى، بەرەكە-بىرلىگى جولىندا قىزمەت ەتىپ، بىرىگۋ كەزەڭى اياق­تالىپ كەلە جاتقان تۇركى دۇنيەسىن قا­لىپتاستىرۋعا لايىقتى ۇلەس قوسا­تىندىقتارىنا كامىل سەنەمىن!»،  دەگەن ەدى. قازىر قوجا احمەت ياساۋي اتىنداعى حقتۋ تەك رەسپۋبليكا عانا ەمەس، ورتالىق ازياداعى ءىرى وقۋ ورىندارىنىڭ بىرىنەن سانالادى.

ال 1998 جىلى ەلباسى ن.نازارباەۆ تۇركىستان قالاسىنا جاساعان ساپارىندا حقتۋ-دا بو­لىپ، تۇركيا پرەزيدەنتى سۇلەي­مەن دەميرەلمەن «تۇركىستان – ىستانبۇل» تەلەكوپىر ارقىلى تىكەلەي سۇحباتتاستى. تەلەكوپىر بارىسىندا ەكى ەل پرەزيدەنتى ۋنيۆەر­سي­تەتتىڭ بۇگىنى مەن ەرتەڭى تۋرالى ءسوز قوزعاپ، ياساۋي كەسەنەسىن كوركەيتۋ، جوندەۋ جانە بولاشاقتا مادەني-رۋحاني ورتالىققا اينالدىرۋ ماسەلەلەرى جايىندا پىكىر الماستى.  سونداي-اق ۋنيۆەرسيتەتتىڭ ستۋدەنتتەر قالاشىعىندا بولىپ، ونداعى قۇرىلىس جۇمىستارىمەن تانىستى. ال 2015 جىلى ساۋىردە تۇركيا رەسپۋبليكاسىنىڭ پرەزي­دەنتى رەجەپ تايپ  ەردوعان قازاق­ستانعا رەسمي ساپارى بارىسىندا تۇركىستانداعى قوجا احمەت ياساۋي اتىن­داعى حقتۋ-عا باردى. وقۋ ورنىنا كەلگەن نۇرسۇلتان نازارباەۆ پەن رەدجەپ تايپ ەردوعان ۋني­ۆەرسيتەت قالاشىعىنىڭ ماكەتىمەن تانىستى جانە مۋزەيدى ارالاپ كوردى. سونداي-اق ەكى ەل پرەزيدەنتى تۇركىستان قالاسىنداعى تۇرىك تاراپىنىڭ قاراجاتىنا سالىنعان 2 مىڭ ادامدىق مەشىتتى ارالاپ كوردى، ءدىن وكىلدەرىمەن جانە قالا تۇرعىندارىمەن اڭگىمەلەستى. مىنە، وسىلايشا ەكى ەلدى جاقىنداستىرا تۇسكەن ءبىلىم ورداسى بۇگىندە ورتا­لىق ازياداعى ىرگەلى وقۋ ورىن­دارىنىڭ ءبىرى سانالادى. قازىرگە دەيىن وقۋ ورنىن 80 مىڭنان استام تۇلەك ءبىتىرىپ شىقتى. وتكەن جىلدان باستاپ ۋنيۆەرسيتەت بارلىق باعىتتار بويىنشا ءىس-شارالاردى تولىق كولەمدە مودەرنيزاتسيالاۋ­دى باستادى. ۋنيۆەرسيتەتتى 2023 جىلعا دەيىن دامىتۋدىڭ جاڭا ستراتەگياسى جاسالىپ، ول حقتۋ-دىڭ ۇكىمەتارالىق وكىلەتتى كەڭەسى تاراپىنان قابىلدانعان. سونىڭ اياسىندا 2018–2019 وقۋ جىلىندا بارلىق پروتسەستەردى جان-جاقتى قايتا قۇرۋ جۇزەگە اسىرىلدى. قازىرگى تاڭدا ۋنيۆەرسيتەتتە 19 ەلدەن 40 ۇلت وكىلى سانالاتىن 10 مىڭنان استام جاس ءبىلىم الۋدا. ونىڭ ىشىندە تۇركىتىلدەس  17 مەملەكەتتەن كەلگەن 1200-دەن استام ستۋدەنت پەن تىڭداۋشى بار. ستۋدەنتتەر نەگىزىنەن قازاق، تۇرىك، اعىلشىن، ورىس تىلدەرىندە ءبىلىم الادى. سونداي-اق بارلىعى 54 ماماندىق بويىنشا ءبىلىم الۋعا مۇمكىندىك بولسا،  30 ماماندىق بويىنشا ماگيستراتۋرا،  4 مامان­دىق بويىنشا رەزيدەنتۋرا جانە 11 ماماندىق بويىنشا دوكتورانتۋرا (PhD) اشىلعان. جىل سايىن قازاقستاندىق تالاپكەرلەرگە تۇركيا رەسپۋبليكاسى تاراپىنان 500 ءبىلىم گرانتى بەرىلەدى. سودان بەرى وتكەن ۋاقىتتا كەڭ ءورىس العان قازاقستان-تۇركيا ارا­سىنداعى ىسكەرلىك بايلانىس­تار ءتۇبى ءبىر تۋىستىقپەن تىعىز استا­سىپ جاتىر. سونىڭ ءبىر عانا جار­قىن دالەلى رەتىندە قوجا احمەت ياساۋي كەسەنەسىن قال­پىنا كەل­تى­رۋ جۇمىستارىن جۇر­گىزۋدى تۇر­كيا ءوز موينىنا الىپ، قىرۋار ءىس اتقارعانىن ايتار ەدىك. ياعني تۇر­كىس­تان قالاسى اجا­­رىنىڭ اشىلا تۇسۋىندە تۇرىك باۋىر­لا­رى­مىز­دىڭ دا ۇلەسى مول.

قازاقستاننىڭ تۇڭعىش پرە­زي­­دەنتى ن.نازارباەۆ ەرەكشە ءمان بەرىپ، مارتەبەسىن وسىرگەن تۇر­كىس­تاندى اباتتاندىرۋ، كور­كەيتۋ با­عىتىندا بۇگىندە اۋقىمدى جۇ­مىس­تار جۇرگىزىلىپ جاتىر. قالا 32 سەكتورعا ءبولىنىپ، وعان جاۋاپتى اۋداندار مەن باسقارمالار وزدەرىنە تيەسىلى ورىنداردى تازالاۋ، ارلەۋ جۇمىستارىن اتقارۋدا. سونداي-اق ء«بىر وتباسى، ءبىر اعاش» اكتسياسى وت­كىزىلىپ، بارشا تۇركىستاندىقتار ءوز ۇلەسىن قوسۋدا. سونىمەن قاتار، تۇركىستان قالاسى دۇنيەجۇزىلىك ۇيىمعا مۇشە بولدى. تاريحي شاھاردىڭ 2050 جىلعا دەيىنگى باس جوسپارى بەكىتىلدى. قالا اكىمىنىڭ مالىمدەۋىنشە، الداعى ۋاقىتتا دامۋ جوسپارى بويىنشا تۇركىستان حالىقارالىق دەڭگەيدەگى قالانىڭ قاتارىنا قوسىلماق، ياعني الەمنىڭ ىستانبۇل، ريم، يەرۋساليم شاھارلارىنىڭ دەڭگەيىنە جەتكىزۋ جوسپارلانىپ وتىر.

 

تۇركىستان وبلىسى

 

سوڭعى جاڭالىقتار

سال-سەرىنىڭ سوڭى

قازاقستان • كەشە

GGG – CANELO: ەر كەزەگى ۇشكە دەيىن...

كاسىپقوي بوكس • كەشە

الاش ارداقتىسىن تۇركى الەمى ۇلىقتادى

احمەت بايتۇرسىن ۇلى • كەشە

ءبىزدىڭ سايىن

ادەبيەت • كەشە

ماعجاننىڭ قاراسوزدەرى

ادەبيەت • كەشە

ساف اۋاداعى سەرۋەن

ەگەمەن قازاقستان • كەشە

ۇقساس جاڭالىقتار