ايتۋلى ونەر وقيعاسىنا وراي كەشە مادەنيەت جانە سپورت ءمينيسترى اقتوتى رايىمقۇلوۆا «Junior Eurovision – 2019» ءان بايقاۋىنىڭ جەڭىمپازى ەرجان ماكسيمدى قابىلداپ, ونەرلى ورەندى مۋزىكا الەمىندەگى تەڭدەسسىز تابىسىمەن قۇتتىقتادى.
– قازاقتىڭ «تالانت تاس جارادى» دەگەن تاماشا ءسوزى وسى ءبىر ەرەكشە ءۇندى ەرجان بالامىزعا ارنالىپ ايتىلعانداي. ەرجان ەۋروپا تورىندەگى ايتۋلى جەڭىسى ارقىلى تۇتاس ۇلتتىڭ, بارشا قازاقستاننىڭ ابىرويىن اسقاقتاتتى. ارينە, جەڭىس ەڭبەكسىز كەلمەيدى. بۇل جولدا ەرجاننىڭ ەسەپسىز تەر توككەنى انىق. ءتىپتى, كاسىبيلىگىن شىڭداۋ ءۇشىن اتا-اناسىمەن بىرگە ماسكەۋگە قونىس اۋدارىپ, سول جاقتىڭ ءبىلىمدى ماماندارىنان ءتالىم الۋى دا جاس دارىننىڭ ونەرگە دەگەن ولشەۋسىز ماحابباتىنىڭ ايعاعى بولسا كەرەك. سوندىقتان كۇللى قازاق ەلى اتىنان ەرجاندى ايتۋلى جەڭىسىمەن قۇتتىقتايمىن. جاس تا بولسا ونەرىمەن كوپكە ۇلگى بولىپ ۇلگەرگەن دارىندى ۇلعا تەك قانا اق جول تىلەيمىن. الداعى ۋاقىتتا دا ەرجاننىڭ ۇلكەن بايقاۋلارعا قاتىسىپ, تالانتىن بارلىق جاعىنان كورسەتۋىنە مادەنيەت جانە سپورت مينيسترلىگى تاراپىنان قولداۋىمىزدى ايامايمىز», – دەدى مينيستر.
ەلوردا تورىندەگى كەزدەسۋگە اناسى گۇلميرا الىبەكپەن بىرگە كەلگەن جەڭىمپاز اتالعان ءان بايقاۋىنىڭ شىعارماشىلىق جولىنداعى كاسىبي ۇلكەن تاجىريبە بولعاندىعىن اتاپ ءوتتى.
– راس, بايقاۋ وڭاي بولدى دەي المايمىن. قارسىلاستارىم دا مىقتى ەكەن. بايقاۋ وتە قىزىق ءارى تارتىستى ءوتتى. جوباعا ىرىكتەلگەن ساتتەن باستاپ-اق, باس جۇلدە الىپ, ەل مەرەيىن ۇستەم ەتسەم دەپ ارماندادىم. الايدا بۇيىرعانى 2-ورىن بولدى. بىراق بۇل دا جامان ناتيجە ەمەس دەپ ويلايمىن. باستىسى, قازاق ءانىن الەم تىڭدادى, تانىدى, – دەپ اقتارىلعان جاس ءانشى ونەر كورسەتۋ كەزىندەگى قىزىقتارىمەن دە ءبولىستى. – ساحناعا شىعار الدىندا دىبىس ۇلعايتقىش قۇرال (ناۋشنيك) قۇلاعىما سىيماي قالىپ, ءبىراز ابىگەرگە تۇستىك. سودان تىعىرىققا تىرەلگەن ماماندار قۇرىلعىنى قۇلاعىما سكوتچپەن جابىستىرىپ قويدى. ءانىمدى وسىلاي ورىنداپ شىقتىم. جالپى, «Junior Eurovision– 2019» بايقاۋىنا قاتىسۋ ماعان ۇلكەن تاجىريبە بولدى. ءان الەمىندەگى ارمانىما ءبىرتابان جاقىنداتتى دەسەم دە ارتىق ەمەس. الداعى ۋاقىتتا دا حالىقارالىق دەڭگەيدەگى جاقسى بايقاۋلارعا قاتىسسام دەيمىن. سونىمەن قاتار ەسىمى دۇنيەجۇزىنە تانىمال اندرەا بوچەللي, لارا فابيان, سەلين ديون, بيللي ايليش جانە ءوزىمنىڭ ونەردەگى ۇلگى تۇتاتىن اعام ديماش قۇدايبەرگەنمەن بىرگە ءان سالعىم كەلەدى. بۇل دا مەنىڭ ءان الەمىندەگى ۇلكەن ارماندارىمنىڭ ءبىرى», – دەيدى ەرجان.
پولشانىڭ گليۆيتسە قالاسىندا وتكەن ايتۋلى مۋزىكا بايقاۋىندا ەرجان ماكسيم دانيار الدابەرگەنوۆتىڭ سوزىنە جازىلعان كومپوزيتور حاميت شاڭعاليەۆتىڭ «ارمانىڭنان قالما» ءانىن جوعارى دەڭگەيدە ورىنداپ, قازىلار القاسىنىڭ ءبىراۋىزدان قولداۋىنا يە بولعانىمەن, ەلەكتروندى داۋىس بەرۋ ناتيجەسىندە قارسىلاسىنا ەسە جىبەرىپ الدى. وسى ءبىر «اتتەگەن-اي» تەك ءانشىنىڭ عانا ەمەس, ءان اۆتورى حاميت شاڭعاليەۆتىڭ دە كوڭىلىن قۇلازىتىپتى.
راس, ەۋروپا تورىنەن ەرجان ءانى توگىلگەندە كوگىلدىر ەكران الدىندا تاقىمىن قىسىپ, جانكۇيەر بولىپ وتىرعان ءار كورەرمەننىڭ كەۋدەسىن ماقتانىش كەرنەپ, قىران كوڭىلىن كوككە ورلەتكەنى انىق. 1925 جىلعى ءپاريجدى تاڭداي قاقتىرعان تۋرا ءبىر امىرەنىڭ انىندەي! مىنە, وسىلايشا شىڭىلتىر ءۇننىڭ شەكسىز مۇمكىندىگىن تانىتىپ, ونەرىنە ەۋروپانىڭ تالعامپاز تىڭدارمانىن باس يگىزگەن امىرە قاشاۋباەۆ فەنومەنى اراعا تۋرا عاسىر ۋاقىت سالىپ ديماشتىڭ دارا داۋىسى, ەرجاننىڭ ەرەك ءۇنى بولىپ ورتامىزعا قايتا ورالعانداي. امىرە ءىزىن جالعاعان دارىندار جولى لايىم داڭعىل بولعاي دەيىك, ەندەشە!
