ۇلتتىق مەرەكە قارساڭىندا موڭعوليا ۇكىمەت ۇيىندە بۇلعىن ايماعىنان تابىلعان ء«حۇيىس تولگوي» ەسكەرتكىشىنىڭ سالتاناتتى ورناتۋ ءراسىمى ءوتتى دەپ حابارلايدى موڭعوليانىڭ «حورين ءدورۆون تساگ» اقپاراتتىق ارناسى. اتالعان شاراعا موڭعوليانىڭ پرەمەر-ءمينيسترى ۋ.حۇرەلسۇح, موڭعوليا عىلىم اكادەمياسىنىڭ پرەزيدەنتى د.رەگدەل, اكادەميك د. تومورتوگوو, موڭعوليا عىلىم اكادەمياسىنىڭ تاريح جانە ەتنولوگيا ينستۋتىنىڭ ديرەكتورى, اكادەميك س.چۋلۋن, موڭعولتانۋ ۇلتتىق كەڭەسىنىڭ حاتشىسى د.زاياابااتار جانە باسقا دا مەملەكەت قايراتكەرلەرى, دەپۋتاتتار مەن عالىمدار قاتىستى.
ەسكەركىش تۋرالى العاش رەت د.تسەند 1967 جىلى حابارلاعان, م. شينەحۇۇ 1972 جىلى تۇرعان جەرىنە بارىپ, 1974 جىلى «براحمي جازۋلى» دەگەن بولجام ايتىپ, 1-بىتىكتاستىڭ قولسىزباسىن جاريالادى. ودان كەيىن 1978 جىلى نەجات ديەربەكيرلي فوتوسۋرەتىن جاريالادى.
گەرمانيا سانسكريتولوگى ديەتەر ماۋە 2014 جىلى ەسكەرتكىشتەردى ارنايى كورىپ, ء«حۇيس تولگوي-1» بىتىكتاستىڭ ءماتىنى براحمي جازۋلى ەكەنىن تولىق انىقتايدى. ال الەكساندر ۆوۆين ەسكەرتكىشتىڭ ءماتىن ءتىلى «پروتو-موڭعول» تىلىندە دەپ العاشقى وقىلىمىن جاسادى.
بۇل زەرتتەۋ جۇمىستارى تۋرالى حالىقارالىق تۇركى اكادەمياسى مەن يۋنەسكو تاراپىنان پاريج قالاسىنداعى شتاب-پاتەرىندە 2018 جىلدىڭ 30 ءساۋىر كۇنى ۇيىمداستىرعان «رۋحاني جاڭعىرۋ جانە مادەني مۇرا: قادىمدان كەلەشەككە تۇركى ءتىلى» اتتى حالىقارالىق فورۋمدا گەرمانيا عالىمى سولونگود ل. حۋرتسبااتار ەسكەرتكىش ءماتىن تولىق زەرتتەپ, بايانداما جاساعان ەدى.
جازبا ەسكەرتكىشى كونە تۇركى داۋىرىندەگى نيري (ب.ز. 588-599جج) قاعاننىڭ بيلىك قۇرعان كەزەڭىندەگى عۇرىپتىق جوسىندارى جايلى مالىمەت بەرەدى. تومەندە حالىقارالىق تۇركى اكادەمياسىنىڭ «اتالار ميراسى» سايتىندا (http://atalarmirasi.org/17-khuyis-tolgoy-i-ii-bitiktastaryndaghy-brakhmi-zhazuly-matinder) جاريالاعان ەسكەرتكىش تۋرالى تولىق ماعلۇماتپەن تانىسا وتىرىڭىزدار.
